Дуучин Э.Хосбаяр Буриадын алдарт “Тоонто нютаг” дууг шинэчлэн дуулжээ
Ядамсүрэнгийн Билгүүнсар нь Монголын театрын урлагийн залуу үеийн төлөөлөл болох жүжигчин, найруулагч, мөн Соёл Урлагийн Их Сургуулийн Театрын урлагийн сургуулийн багш юм. Энэ жил дааж авсан анги болох 4в курсийнхнээ дипломын ажиллаар нь зургаан жүжиг толилуулжээ.
Найруулагчийн ангид суралцаж буй оюутнууддаа “Хүнд таалагдах гэж оролдоод эхэлбэл тэр цагтаа чи амь тавина” гэж хэлдэг юм. Уран бүтээлчдийг билиг танхай байж, хийхийг хүссэнээ зоригтой гүйцэлдүүлэх ёстой гэж боддог. Тэгэхээр шавь нартаа “Багш нь хүссэн зүйлээ л гүйцэлдүүлсэн. Бусад хүмүүст таалагдана уу, таалагдахгүй байна уу надад хамаагүй ээ” гэж хариулан захидаг. “Би бүх л бүтээлээ үнэн байлгахыг хүсдэг” хэмээн нэгэн хэвлэлд өгсөн ярилцлагадаа дурджээ.
Түүнийг театрын хүрээнийхэн зоримог туршигч гэж хардаг. Тэрбээр моно буюу нэг хүний жүжгийн төрлөөр дагнан уран бүтээл туурвидаг бөгөөд нийгэмд чиглэсэн өвөрмөц перформанс үзүүлбэрүүдээрээ олон нийтийн анхаарлыг татдаг уран бүтээлч билээ.
Түүний гол уран бүтээлүүд ба ололтуудыг дурдвал “Ашгүй бүх юм дууслаа” моно жүжгээрээ моно жүжгийн Улсын уралдаанд тэргүүн байр эзэлж байсан.
Ө.Үлэмжтөгсийн зохиол “Амьгүй биет” жүжгийг Монголд анх удаа жүжигчингүйгээр тайзнаа тоглуулан найруулж, багагүй шуугиан тарьсан.
“Намайг оршуулаач”, Японы алдарт найруулагч Акира Куросавагийн зохиолоос сэдэвлэсэн “Долоон самурай”, Б.Сүнжидмаагийн зохиол “Хүүхэлдэй”, Д.Урианхайн зохиол “Ханануудын амьдрал” зэрэг моно жүжгүүдийг найруулж, дүрд нь тоглосон.
“Хана бодит уу?” төсөл дээр Я.Билгүүнсар нь Орфей театртай хамтран Монголд анх удаа контемпорари урлагийн “перформанс арт”, инсталляци төрлийн амьд үзэсгэлэнг Ялалтын талбайд байрлуулан хэрэгжүүлсэн. Уг төслийн хүрээнд шилэн хоргон дотор долоо хоногийн турш амьд үзүүлбэр үзүүлж, “Улс төр, засгийн газрын бүтээсэн энэ нийгэм иргэдэд эрх чөлөө бус дөрвөн хана өгсөн. Тэр ханан дотор амьдрахын тулд хүмүүс өөрсдийгөө золиосолж байна” хэмээх санааг нийгэмд илэрхийлж байна. Уг бүтээлийнхээ талаар лавласан хүмүүст шилэн хоргоны цаанаас бичгээр хариулахдаа Д.Урианхайн “Ханануудын амьдрал” зохиолыг уншихыг зөвлөж байна.
Б.Уранзаяа
0
0
0
0
0
0
0
0
