Монгол Улсын арслан М.Мөнгөн агсаны нэрэмжит xүчит бөxийн барилдаан болно
Монголын чөлөөт бөхийн холбооноос зохион байгуулж буй 2024 оны УАШТ өнөөдөр Буянт-Ухаа спорт цогцолборт эхэлсэн. Өнөөдөр тус тэмцээний дэвжээн дээр эрэгтэй 57, 70, 97, эмэгтэй 53, 59, 63 кг-ийн жингийн өрсөлдөөн боллоо. Ингээд өнөөдөр болсон жин жингийн ангиллын финалд өрсөлдөх бөхчүүдийн нэрс тодорлоо. Онцолбол эрэгтэйчүүдийн 97 кг-ын финалд 23 хүртэлх насны ДАШТ-ий хүрэл, Азийн наадмын хүрэл медальт Г.Ганхуяг өрсөлдөгч бөх, ДАШТ-ий V байрын шагналт Л.Төртогтохыг 7:0 оноогоор ялж, финалд шалгарлаа.
Тэрбээр өнгөрсөн жил улсын наадмаар харцага цол хүртэж, Азийн наадмаас хүрэл медалиар энгэрээ мялаасан бол шинэ оныг амжилттай эхлүүлж, улсын аваргын төлөө өрсөлдөхөөр болж байна.
Хагас шигшээгийн нөгөө хос барилдаан тун сонирхолтой өрнөж, ДАШТ-ний 5-р байр, Ази тивийн аварга шалгаруулах тэмцээний хошой мөнгөн медальт ОУХМ Ө.Батзул өрсөлдөгч бөх, өнгөрсөн жилийн улсын аваргын мөнгөн медальтай Б.Бадамдоржийг цэвэр ялсан юм. Ингэснээр маргааш Г.Ганхуяг, Ө.Батзул нар аваргын төлөө өрсөлдөж, олимпын эрхийн тэмцээнд хэн нь явахаа шийдвэрлэх чухал барилдаан юм. Ингэж хэлдгийн учир нь МЧБХ-ны удирдлагын түвшнээс гаргасан шинэчилсэн дотоод журамд заасны дагуу энэ жилийн Улсын аварга шалгаруулах тэмцээнд түрүүлж аваргын алтан медаль хүртсэн тамирчдыг "Парис 2024" зуны олимпын наадмын эрх олгох тэмцээнд илгээх ажээ. Иймээс олимпын жиндээ шилдэг нь байж аваргалсан тамирчид хилийн дээс алхана гэсэн үг.
Эрэгтэй 57кг-ын аваргын алтан медалийн төлөө ДАШТ-ий хүрэл медальт З.Занабазар финалд “Төгс” дэвжээний бөх Б.Мөнх-Эрдэнэтэй өрсөлдөх болно. Харин эрэгтэй 70кг-ын жингийн алтан медалийн төлөө Э.Тэмүүлэн, Ц.Чинзориг нар өрсөлдөнө.
Эмэгтэйчүүдийн 68кг-ын жингийн алтан медалийн төлөө Ази тивийн аваргын медальт П.Номин-Эрдэнэ, өсвөрийн Ази тивийн аварга Э.Одзаяа нар өрсөлдөхөөр шалгарч үлджээ. Тэгвэл эмэгтэйчүүдийн 53кг-ын жинд аваргын төлөө олимп, дэлхийн хүрэл медальт Б.Болортуяатай ДАШТ-ий мөнгөн медальт Б.Хулан барилдана. Мөн эмэгтэй 59кг-ын жинд залуучуудын ДАШТ-ий хүрэл медальт Б.Болор-Эрдэнэ залуу тамирчин Б.Анударь өрсөлдөхөөр тус тус финалд шалгарч үлдсэн байна.
Энэ удаагийн УАШТ-д олимп, дэлхийн медальтай 14, мөн гавьяат цолтой зургаан бөх УАШТ-д зодоглож байна. Олон онцлогтой 2024 оны УАШТ-д 269 тамирчин эрэгтэй, эмэгтэй тус бүр зургаан жинд өрсөлдөж байгаа юм.
0
0
0
0
0
0
0
0
