“Огцрох амархан” жагсаал 13 дахь өдрөө үргэлжилнэ

 “Огцрох амархан” жагсаалд нэгдэж буй залуус шаардлагаа улам лавшруулж, гүнзгийрүүлэх талаар мэдэгджээ. Өнөөдрийн жагсаал Тэнгис кино театрын хажууд буюу “Эрх чөлөөний” талбайд 16:00 цагт болно. Энэ сарын 14-нөөс залуус нэгдэн Сүхбаатарын талбайд тайван жагсаал хийхээр цуглаж эхэлсэн юм.

Жагсаалд нэгдсэн иргэд Ерөнхий сайд Л.Оюун-Эрдэнийг огцрох цаг болсон гэж үзэн дараах найман үндэслэлийг гаргасан. Үүнд,

• Инфляц, үнийн өсөлтийн эсрэг үр дүнтэй тэмцэж чадаагүй.
• Ажилгүйдэл, ядуурал буураагүй.
• Түүхэнд байгаагүй өндөр төсөв баталсан ч төсвийн зарцуулалт ил тод бус байна.
• Хамтарсан Засгийн газар байгуулснаар сөрөг хүчний үүрэг алдагдсан.
• Ардчилалын индексээр Сонгуулийн автократ ангилалд шилжсэн. “DEMOCRACY REPORT 2025” тайланд дурдсанаар 2024 оны байдлаар 45 орон автократ дэглэмд шилжиж байгаа бөгөөд эдгээрийн нэг нь Монгол улс юм.
• Хэвлэлийн эрх чөлөө хумигдсан. Олон нийтийг санаатайгаар талцуулах, хагаралдуулах зорилготой зохион байгуулалттай худал мэдээлэл түгээх болсон.
• УИХ-ын гишүүн Ж.Баярмаад Ерөнхий сайдын гаргасан зохисгүй хандлага нь эмэгтэйчүүдийн эрх, парламентын соёлд ноцтойгоор халдсан гэж олон нийт, улс төрийн хүрээнд хүчтэй шүүмжлэл дагуулсан.
• Ерөнхий сайд Л.Оюун-Эрдэнийн хүү О.Тэмүүлэнгийн тансаг хэрэглээний эх үүсвэр тодорхойгүй. Ерөнхий сайд Оюун-Эрдэнийн хүү, түүний найз бүсгүйн хэрэглээ нь албан ёсны орлоготой нийцэхгүй байгаа зэрэг нь Ерөнхий Сайдыг огцруулах хангалттай үндэслэл гэж үзэж байна.