Өрөг.мн сайтын сурвалжилгын үр дүнд хүчирхийлэгч багш ажлаас чөлөөлөгдөв

Өрөг.мн сайтын сурвалжлах баг Монгол-Солонгосын политехник коллежийн багш сурагчдаа удаа дараа зодож, гэмтэл учруулсан гэх мэдээллийн мөрөөр болон дотуур байрны асуудлын талаар дөрвөн сурвалжилга бэлдэж бай. Улмаар сурагчдаа хүчирхийлдэг багш н.Содоо ажлаас чөлөөлөгдөж, дотуур байрны хоол хүнс болон ариун цэврийн асуудал шийдэгдсэн юм.

Ингээд нийт сурвалжилгыг үзэгч та бүхэнд хүргэе.

Сурвалжилгыг бүтнээр ЭНД дарж үзнэ үү

БАГШ СУРАГЧДАА ЗОДОЖ, НЭГ ХҮҮХДИЙН ХЭНГЭРГИЙГ ХАГАЛСАН ГЭВ /2023.04.02/

Монгол-Солонгосын политехник коллежийн гагнуурын ангийн багш н.Содоо сурагчдаа зоддог, дээрэлхдэг, алгаддаг гэсэн мэдээллийг сурагч бидэнд гурван долоо хоногийн өмнө явуулсан юм. Тэр ч бүү хэл нэг сурагчийн чихний хэнгэргийг хагартал алгадсан талаар хэллээ. Ингэхдээ тухайн багш хүүхдүүдийг жагсаан алгадаж буй бичлэгийн хамт илгээсэн. Гэсэн ч сурагчдыг зодож, дарамталдаг багшид өнөөдрийг хүртэл сургуулиас ямар нэгэн арга хэмжээ аваагүй байна.

Бид энэ асуудалтай холбогдуулан сургуулийн сургалтын менежерээс тодруулга авахыг хүсэхэд, ёс зүйн хороо удахгүй хуралдана. Үүний дараа нэгдсэн тайлбар мэдээлэл өгнө гээд тайлбар өгөхөөс татгалзав. Мөн асуудалд холбогдсон багш н.Содоогоос тодруулахад, “хүүхдүүдтэй ёс бус харьцсан удаагүй. Хүүхдүүдийг алгадаж байгаа бичлэгийн тухайд, хүүхдүүд өөрсдөө болохгүй зүйл хийсэн учраас хариу арга хэмжээ авсан нь энэ” гэж тайлбарлалаа.

Асуудлын талаар Монгол-Солонгосын политехник коллежийн сургалтын менежер Б.Баттогтохоос тодруулсан нь:

-н.Содоо багш сурагчдыг зодсон талаар та мэдэж байгаа юу?

-Тийм. Ёс зүйн хурлаа өнөөдөр чадвал зарлана.

-21 хонож байхад яагаад өнөөдөр хуралдах гэж байна вэ?

-21 хоног бол зодсоноос хойш хугацаа. Бид өнгөрсөн долоо хоногт л мэдсэн.

-Тухайн багш, багшлах эрхтэй юу?

– Бид сонгон шалгаруулалтаар, шалгуур шаардлага хангасан багшийг авдаг.

-Та өөрөө багштай уулзсан уу? Яагаад ийм асуудал гарсан бэ?

-Манай арга зүйчид уулзсан.

-Содоо багш хэр удаан ажиллаж байгаа вэ?

-Гурван сар болж байгаа.

-Шинэ багш хүүхдүүдээ зодсон асуудал гарч байхад яагаад одоог хүртэл арга хэмжээ аваагүй байгааг тайлбарлаач?

-Өнөөдөр хурал хийгээд та бүхэнд мэдээлэл өгье.

-Өнөөдөр хэдэн цагаас хурал хийх вэ?

-Хурлаа хийхээр л болъё.

Харин Монгол-Солонгосын политехник коллежийн гагнуурын багш н.Содоогоос,

-Сурагчид танд алгадуулж зодуулдаг талаараа манай сайтад мэдээлсэн. Та тайлбар өгөх үү?

-Тайлбар өгөхгүй ээ.

-Яагаад өгөхгүй билээ. Та хэр удаан багшилж байгаа вэ?

-Зургаан сар.

-Та яагаад хүүхдүүдтэй ёс бус харьцаад байдаг юм бэ?

-Ёс бус харьцдаг зүйл байхгүй.

-Танд багшлах эрх гэж бий юу?

-Байгаа. Биед нь халдсан зүйл байхгүй.

-Сурагчийн хэнгэрэг хагарсан гэдэг мэдээлэл ирсэн. Энэ үнэн үү? Та тайлбар хэлээч?

-Та нар хүний ажлын цаг тарсан тохиолдолд юм аа ярь.

-Хүүхдүүдтэй ёс бус харьцаагүй. Сурагчдыг зодоогүй гэсэн үг үү?

-Тийм.

-Бичлэгийг юу гэж тайлбарлах вэ?

-Тэр бичлэг бол… Хүүхдүүд ямар үйлдэл хийснээ мэдэхгүй байна. Өөрсдийнхөө эрхийг мэдэж эдлэх гэж байгаа бол үүргээ ухамсарлах хэрэгтэй.

-Хүүхдүүд ямар үйлдэл хийсэн бэ?

-Ангид тамхи татсан, зодоон хийсэн.

-Хүүхдүүд буруу зүйл хийсэн гээд гар хүрэх нь зөв үү?

-Тийм зүйл байхгүй.

Бид өмнө нь мөн Монгол-Солонгосын политехник коллежийн дотуур байрны хоолны асуудлаар сурвалжилж байсан. Тэгэхэд мөн сургалтын менежер тайлбар өгөхөөс татгалзаж, надад хамаатай зүйл биш. Би сургалтын албаа хариуцдаг гэж байсан. Бид энэ удаа сургалтын албатай холбоотой асуудлаар тайлбар авахаар ирэхэд дахин татгалзлаа.

СУРАГЧАА ЗОДОЖ, ХЭНГЭРЭГИЙГ НЬ ХАГАЛСАН БАГШ, БАГШЛАХ ЭРХГҮЙ ГЭВ 

2023.04.19

Бид хоёр долоо хоногийн өмнө Монгол-Солонгосын политехник коллежийн гагнуурын багш Содоо сурагчаа алгадаж, хэнгэрэгийг нь хагалсан гэх мэдээллийн дагуу сургууль дээр ирж, сурвалжилга мэдээллийг та бүхэнд хүргэсэн. Тухайн үед гагнуурын багш Содоод ямар нэг арга хэмжээ аваагүй, хүүхэд хохирч үлдсэн нөхцөл байдалтай байсан юм. Тэр үед сургалтын менежер Б.Баттогтох, “өнөөдөр ёс зүйн хороо хуралдана. Хурлын дүн гарсны дараа та бүхэнд мэдээлэл өгнө өө” гэж байв. Улмаар хоёр долоо хоногийн дараа дахин ирэхэд Б.Баттогтох менежер тайлбар өгөхөөс мөн л татгалзлаа.  Бид түүний өрөөний гадаа 30 минут уулзахаар хүлээхэд, дотроосоо хаалгаа түгжин асуудалд ямар нэгэн тайлбар өгсөнгүй.

Харин хэнгэргээ хагалуулсан сурагч О тухайн сургуулийн дотуур байранд амьдардаг. Өөрөөр хэлбэл гэр бүлийнхнээсээ хол, санаа тавих хүнгүй сурагч юм. Сурагчийн зүүн чихний хэнгэрэг цоорч, чихээр нь хатгаж өвдөх, яриа сул сонсогдох гэх мэт зовуурьтай байгаа. Мөн эмнэлгээс мэс заслын заалттай гэж оношилсон байна. Бид багш Содоогоос сурагчийн эмчилгээний зардал, хохирлыг барагдуулсан эсэх талаар асуухад, “Би захиргааны арга хэмжээ авахуулсан. Бусад зүйлсийг удирдлагаас тодруул. Би яриа өгөх албагүй” гэлээ.

СУРАГЧИЙН ХЭНГЭРГИЙГ ХАГАЛСАН БАГШ АЖЛААС ЧӨЛӨӨЛӨГДӨХ ӨРГӨДЛӨӨ ӨГЧЭЭ 2023.04.30

Монгол-Солонгос политехник коллежийн гагнуурын багш н.Содномпил сурагчдаа алгаддаг, зоддог. Нэг сурагчийг алгадаж чихний хэнгэргийг нь хагалсан талаар асуудлыг бид өмнө нь мэдээлсэн. Тэгвэл Содномпил багш ажлаас чөлөөлөгдөх өргөдлөө өгсөн байна. Ингэхдээ энэ асуудал дээр багш өөрөө гомдол гаргах тухай сургуулийн хүний нөөцийн мэргэжилтэн Г.Тэгшжаргал хэллээ. Түүнээс бид дараах тайлбарыг авсан юм.

-Яагаад багшлах эрхгүй хүнийг ажиллуулж байгаа юм бэ?

-Энэ багш маань манай төгсөгч шүү дээ. Сэтгэл зүйн хувьд маш хүнд байна. Өөрөө ч гэсэн энэ асуудал дээр гомдол гаргана. Яагаад гэвэл энэ асуудлыг ганцхан өнцгөөс та бүхэн харж байна.

-Бидний хараагүй ямар өнцөг байгаа вэ?

-Түүнийг би энд ярихгүй. Ер нь зүгээр, багшийн хувьд манай сайн төгсөгч нарын нэг. Тухайн үед харилцааны алдаа гаргасан. Харамсалтай байна. Яалт ч үгүй манай  сайн төгсөгч нарын нэг. Багш бэлтгэж авахаар бид ажиллаж байсан. Надад багшийнхаа эрх ашгийн үүднээс харах асуудал байгаа. Бичлэг байсан шүү дээ. Тэнд чихний хэнгэрэг яригдаж байгаа хүүхэд байхгүй.

-Тэгэхээр олон удаа ийм үйлдэл гаргасан байгаа биз?

-Хэнгэрэг хагарсан эсэх нь шүүх эмнэлгээр тогтоогдсон байна уу, та нар хараарай. Эмчийн бичиг бол тэр хүүхэд осолд орсон хүүхэд байсан. Гэхдээ энэ талаар ярих нь илүүц биз.

Харин бид сургуулийн дотоод чанарын баталгаажилт статистик хариуцсан мэргэжилтэн Г.Болормаагаас асуудалд сургуулийн удирдлагууд ямар байр сууринаас хандаж байгаа талаар тодрууллаа.

Тэрбээр, “Ёс зүйн хороо асуудлыг хэлэлцсэн. 11 хүний бүрэлдэхүүнтэй зөвлөл хуралдаад багшийн цалинг хасах арга хэмжээ авсан. Давхар арга зүйч нарыг шинэ багштай ажиллаж арга зүйн зөвлөгөө өгөөгүй дээр асуудал үүсгэж, шаардлага тавин ажиллаж байгаа. Содномпил багш өөрөө өргөдлөө өгсөн, ажлаас чөлөөлөгдөж байгаа. Манайхан үүн дээр өөрсдөө буруу ажилласан байх гэж бодож байна. Хоёр нийгмийн ажилтан хүүхдүүдтэй илүү тулж ажиллаж байгаа” гэлээ.

ОЮУТНУУД: ХООЛНООС ҮРГЭЛЖ ҮС, ӨТ, ЖООМ ГАРЧ ИРДЭГ УЧРААС ИДЭХЭЭ БОЛЬСОН

2023. 04.15

Сурвалжилгыг ЭНД дарж үзнэ үү

Монгол солонгосын политехник коллежийн дотуур байранд амьдардаг оюутнууд сургуулийнхаа хоолны асуудлаар мэдээлэл өглөө.  Оюутнуудын хоолноос жоом, үс, өт зэрэг гарч ирсэн гэж тэд хэлж байна. Энэ асуудлаар сургуулийн тогооч болон холбогдох мэргэжилтнүүдэд шаардлага тавьдаг боловч, “3000 төгрөгт ийм хоол идэж байгаадаа баярла” гэх зэргээр тайлбарлаж, гомдол саналыг нь хүлээж авдаггүй талаар оюутнууд ярилаа.

Энэ талаар дотуур байранд амьдардаг оюутнууд ярихдаа,

• Ноднин миний хоол идэж байсан аяганаас нэг удаа жоом гарч ирсэн. Ер нь үс, утас, аяга таваг угаагчийн төмөр зэрэг зүйлс байнга гарч ирдэг. Өдөрт 3000 төгрөгийн хоол өгдөг юм шиг байна билээ. “Ийм хоол олдохгүй харин чанартай гоё хоол өгч байгаад баярлаарай” л гэдэг. Өрөөндөө хоол хийж идэхийг хориглодог. Энэ нь бидэнд их хүндрэлтэй байдаг.
• Нэгдүгээр курсийн хүүхдүүдийн хоолноос “үс гарч ирлээ, жоом гарч ирлээ, өт гарч ирлээ” гэдэг зүйл их сонсогдох болсон. Миний хувьд дотуур байранд ороод хоёр жил болж байна. Үс бол үргэлж гарч ирдэг. Өлссөн үедээ нүдээ аниад л иддэг. Бусад үед идэж чадахаа байсан.
• Зарим орой хоолны төмс, ногоо, гоймон нь түүхий байдаг. Заримдаа хоолноос үс гарч ирдэг. Энэ нь их муухай санагддаг. Бид нар “за яах вэ” гээд л хаячихдаг юм. Гэсэн ч их онцгүй мэдрэмж төрдөг дөө.

ХООЛНООС ЯГ Ч ЖООМ ГАРААГҮЙ

Бид энэ асуудлаар сургуулийн тогооч Б.Энхтуяагаас тайлбар авахад “ийм зүйл байхгүй. Оюутнууд зохиомол зүйл хийж, худал ярьж байна” гэсэн тайлбар өгсөн юм.

Тэрбээр, Хүүхдүүдэд өдөрт дөрвөн хоол өгдөг. Жоомны тухайд бол яг жоом байгаагүй. Хүүхдүүд намраас хойш л ийм асуудал ярьж орж ирэх болсон. Аль болох чанар стандартын дагуу хийж байгаа. Хүүхдүүд өөрсдөө хоолондоо элдэв зүйл хийж байгаа. Энэ нь хоолны 90 мянган төгрөгөө өөрсдөө авахыг хүсэж буйн илрэл. Манайх жоомгүй гэлээ.

Мөн бид сургуулийн удирдлагуудаас энэ асуудалтай холбогдуулан тайлбар авах гэсэн боловч нэг нэг рүүгээ нялзааж, “энэ асуудлыг мэдэхгүй, мэддэг хүнтэй холбогд” гэсээр бидэнд тайлбар мэдээлэл өгөхөөс татгалзсан юм. Сургалтын менежерийн тухайд, энэ асуудалд ажлын хэсэн гаргасан. Судалж байгаа. Үр дүнгийн талаар эргэн мэдээлэл өгнө гэж байв.

Бидэнд ярилцлага өгөхөөс татгалзаж байсан Дотоод чанарын баталгаажилт, статистик хариуцсан мэргэжилтэн Г.Болормаа 30 минутын дараа бидэн рүү залгаж дараах мэдээллийг өгсөн юм.

Тэрбээр ярихдаа, энэ хоолны асуудлаар сургуулийн удирдлагад гомдол, өргөдөл ирсэн. Өргөдөлд 184 хүүхдийн гарын үсэг байсан боловч эдгээр хүүхдүүд юунд гарын үсгээ зурж байгаагаа мэдээгүй юм билээ. Нэр бүхий хүмүүсийн явуулга гэж ойлгож болно. Манай сургуулийн захирал хараахан томилогдоогүй байгаа. Үүнтэй холбоотой ийм асуудлыг гаргасан гэж үзэж байна гэв.