ОXУ-ын зүгээс Украин руу тив алгасаx Баллистик пуужин xарважээ
ОХУ-ын Ерөнхийлөгч В.Путины талаарх мэдээллийг бэлтгэн хүргэж байна.
Владимир Путин нь 1952 оны 10 дугаар сарын 7-нд Ленинград хотод төржээ. Түүний ээж Мария Ивановна Путина нь үйлдвэрийн ажилчин, харин эцэг Владимир Спиридонович Путин 1930 оны үед шумбагч онгоцны усан цэрэг байжээ. В.Путины эцэг дэлхийн II дайны үед тагнуулын хорлон сүйтгэх тасагт ажиллаж байв. Тухайн үед харьяалагдаж байсан тасгийнх нь хүнс тэжээл дуусахын даваан дээр В.Путины аав дайсны зэвсгийн агуулахыг нь сөнөөж хүндтэй гавьяа байгуулж байжээ. В.Путин хоёр ч ахтай байсан хэдий ч хоёулаа бага насандаа өөд болжээ.
Ленинградын бүслэлтийн үеэр түүний эх амь үрэгдэж, гэр бүл нь нийтийн байранд нүүж орохоос өөр аргагүйд хүрчээ. Халуун ус, ОО-ын өрөө, ванн ч үгүй нийтийн байрны таван давхрын 200 фут квадрат талбайтай давчуу өрөөнд тэрбээр бага насаа өнгөрүүлсэн байна. “Путины өвөө түүнийг маш сайн хооллож, сайн хүмүүжүүлсэн” хэмээн тэмдэглэжээ. “Улс төрийн асуудалд мэдрэмжтэй, тэнцвэртэй хандах гээд өөрийн сурсан бүхнээ ач хүүдээ сургасан” гэж Спиридон амьд сэрүүн ахуйдаа ярьж байжээ. Өвөөгөө нас барахад В.Путин 13 настай байсан байна. Тэрбээр 12 настайгаасаа бокс, самбо, жудо бөхөөр хичээллэдэг байв. Их сургуульд байхдаа ч спортоо орхиогүй Путин жудо болон самбо бөхийн спортын мастер зэрэгтэй.
Одоо 70 настай тэрбээр 1983 оны долдугаар сард өөрөөсөө тав дүү онгоцны үйлчлэгч бүсгүй Людмилатай гэр бүл болж байжээ. Гэвч, 2013 онд тэд 30 жилийн хамтын амьдралдаа цэг тавьж, тус тусын амьдралаа хөөх болсон байна. В.Путин хоёр охинтой. Том охин Мариа нь 1985 онд төрсөн бол удаах охин нь 1986 онд төржээ. Мариа Биологийн ухааны чиглэлээр суралцсан бол Катерина Дорнын соёл судлалын тэнхимд суралцжээ. ОХУ-ын Ерөнхийлөгчийн гэр бүл, хувийн амьдралын талаарх мэдээлэл тун нууцлагдмал байдаг.
В.Путин Бийтлз хамтлагийн шүтэн бишрэгч. Тэр дундаа Пол Маккартниг шүтэн биширдэг аж. Түүний сонсох хамгийн дуртай дуу бол Бийтлзын хамтлагийн “Өчигдөр”.
В.Путин 1970 онд Ленинградын их сургуульд элсэн орж, таван жилийн дараа хуульч мэргэжлийн цол тэмдгээ авсан байна. Улмаар 22 насандаа Улсыг Аюулаас Хамгаалах Хороонд хуваарилагджээ. Тэнд 16 жил ажилласан. Багаасаа тагнуульч болохыг хүсэж мөрөөдлөө биелүүлсэн ч 1989 онд Берлиний хана нурах үед В.Путины тагнуул хийх хугацаа дуусгавар болсон байна. Тэрбээр нутагтаа буцан ирж, их сургуульдаа дахин сурч, “Оросын холбооны улсын эдийн засаг эрчим хүчний эх үүсвэрээ хэрхэн ашиглахаас хамаарна” гэсэн сэдвээр докторын зэрэг хамгаалжээ. Үүний дараа улс төрд орж, их гүрний удирдагч болох зам түүний өмнө тодоос тод зурайх болсон байна.
Ерөнхийлөгч Борис Ельцин 1999 онд Путиныг Ерөнхий сайдаар томилсон. Ерөнхий сайд болсноос хойш ердөө 5 сарын дараа буюу 1999 оны 12-р сарын 31-нд Борис Ельцин огцорч, Путиныг үүрэг гүйцэтгэгчээрээ нэрлэсэн билээ. Хоёр хүрэхгүй жилийн дотор олонд төдийлөн танигдаагүй байсан Путин дэлхийн хамгийн хүчирхэг орны Ерөнхийлөгч болж чадсан юм.
0
0
0
0
0
0
0
0
