М.Содном өвөө: Шинэ он гарсан ч асуудал хуучнаараа л бий

Эмийн ургамал зардаг М.Содном өвөө: Шинэ он гарсан ч асуудал хуучнаараа л бий хэмээн ярина. Тэрбээр  “Төрөөс манай компанийн дансыг хаах гэсэн ч дотор нь мөнгө байгаагүй. 5–6 ажилтан маань ажлаа хаяад явчихсан. ААН-үүд элгээрээ хэвтэх нь ээ. Гэхдээ өвөө нь зүгээр ээ” гэв.

Багшийн дээдийн автобусны буудал дээр эмийн ургамал зардаг өвөө алга болчихсонд олон хүн гайхсан байж мэднэ.

Тэгвэл эмийн ургамал зардаг М.Содном өвөө Төгөлдөр төвийн хоёр давхарт суух болжээ. М.Содном өвөө өдгөө 67 настай. Бизнес хийж, 5–6 хүнийг цалинжуулдаг байсан ч ТҮЦ-ээ хураалгаж, татварын дарамтад орсноор 20 сая төгрөгийн өртэй болсон гэнэ. Түүний “Тайжийн нуур” компани Хөвсгөл аймгаас 60 гаруй эмийн ургамлыг зохих журмын дагуу түүж, боловсруулж худалддаг байсан ч одоо өөрөөс нь өөр ажилтангүй болжээ.

Бизнес эрхлэгчдэд дарамт болж буй зүйл нь ердөө л их татвар, иргэн, ААН-дээ хайргүй төр хэмээн ярьж байлаа.

Мэдээж ажилчдынхаа нийгмийн даатгалыг төлөхдөө л төлнө. Гол нь битгий хааж боож, ард иргэдээ зовоогоорой. Өвөө нь нүд анитлаа энэ улсынхаа төлөө явна гэдгээ ч хэлэв.

Тэрбээр “Өвөө нь төр засгаас халамж гуйхгүй, гагцхүү бизнес хийх боломжийг минь л өгчих” гэсэн юм.

Түүний байнгын хэрэглэгчид харж байвал: 99956937 Содном өвөөгийн дугаар шүү