Реппер Гинжин, Mrs.M нарын хамтарсан “Энэ мөч” тоглолт нийслэлийг доргионо

Энэ зуны наймдугаар сар гал гарсан, фэнүүдээ доргиосон олон шоу тоглолтоор дүүрэн байхнээ. Наймдугаар сарыг “цоглог хаалтын сар” гэж нэрлэе. Ингэж хэлсний учир нь Реппер Гинжин, Mrs.M нарын хамтарсан “Энэ мөч” лайв тоглолт Төв цэнгэлдэхийг доргиохоор бэлтгэл ажилдаа хэдийнээ оржээ. Тэд хамтран наймдугаар сарын 17-ны өдөр зуны нэгэн оройг фэнүүд, шимтэн сонсогчиддоо гайхалтай дурсамжийг бэлэглэхээр бэлджээ.

2019 оноос Реппер Гинжин, Mrs.M нар хамтарч эхэлсэн бөгөөд анхны дууны нэрээрээ тус тоглолтыг нэрлэжээ.

Уг тоглолтын ерөнхий найруулагч Б.Анар: Тоглолтын онцлогуудын нэг бол агуулгын хувьд “cinematic” буюу кино ертөнцийн стиль, шийдлээр зохион байгуулахаар төлөвлөсөн. Энэ нь үзэгчдэд сонирхолтой болно гэдэгт итгэл дүүрэн байна. Мөн энэхүү тоглолтын хамгийн онцгой нь энтертайнмэнт чиглэлийн холбоосуудыг төв цэнгэлдэхэд хэрхэн хийснийг мэдрэх боломжтой. Тоглолт дөрвөн хэсэг, таван бүлгээс бүрдэх бөгөөд тус бүрдээ артистуудын хит дуунууд, хамтралууд, зочин артистуудын үзүүлбэр гэх мэт өөр өөрийн онцлогтой, шинэлэг мэдрэмж, шийдлийг тусгахыг зорьж байгаа. Тоглолтын дууны найруулга өмнө нь хийгдэж байгаагүй шийдлүүдээр тус оройн уур амьсгалд нийцсэн байх болно.

Я.Учрал: Яг ид үе дээрээ явж байгаа туршлагатай артистууд маань өөрсдийн хит болсон дуунууд мөн бусад хуучин дуунуудаа шинээр найруулан 50:50 харьцаатай дуулах болно. Урилгаар Icetop, Lumino, Хар сарнай хамтлагууд болон бусад артистууд ирнэ.

Реппер Гинжин: Төв цэнгэлдэхэд болж байсан бусад тоглолтууд шиг өөр артистуудыг эхэлж гарган дуулуулах буюу хөгжилтэйгөөр хэлэхэд “панчан” байхгүй. Зөвхөн бидэнтэй холбоотой хүмүүс болон Mrs.M бид хоёр дээр бүх анхаарал төвлөрнө. Мөн энэ нь миний “Гинжин” гэдэг нэртэй байх сүүлийн тоглолт ч байж магадгүй.

Mrs.M: Бие даасан шинжтэй хамгийн анхны том тоглолтоо хамтрагчтайгаа таван жил хамтарсны эцэст хийх гэж байна. Манай баг, тоглолтонд ирж буй үзэгчдэдээ хамгийн гоё тоглолт үзүүлэхээр хичээн ажиллаж байна. Тоглолтын өмнө тус тусын дуунууд болон хамтралууд цацагдана.

Тасалбарыг биетээр авах бол GS25 сүлжээ дэлгүүрийн бүх салбараар болон бүх цахим платформуудаар зарагдаж байна. (Shoppy.mn, Ticket.mn, EventX.mn, Money application)