Өнөөдөр УОК-ын шуурхай штабаас цаг үеийн асуудлаар мэдээлэл хийлээ. Энэ үеэр Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан “Тусгаарлалтаас гарч буй иргэдэд хоёр долоо хоног өөрсдийгөө гэртээ тусгаарла гэсэн заавар, чиглэл өгч байгаа. Харин иргэд ойшоохгүй байна. Халдварт өвчний аюул буураагүй одоо ч хэвээрээ. Нууц, далд үеийн аюул улам удааширсан. Тусгаарлалтаас гарсан иргэдэд гэртээ 14 хоног өөрсдийгөө тусгаарла гэсэн чиг өгөөд байхад тэр шөнөө эрүүлжүүлэх байранд хүргэгдсэн тохиолдол гарсан. Хөл хорионоос гарч буй хүн дайнд яваад ирсэн баатар биш. Тиймээс нийгмийн хариуцлагаа ухамсарлан заавар зөвлөгөөг биелүүлэхийг хүсэж байна. Гэртээ 14 хоног өөрийгөө тусгаарлах журмыг зөрчсөн хүнд Зөрчлийн тухай хуулиар хариуцлага тооцно” хэмээв.