Category: УЛС ТӨР2022-03-30

ХӨГЖЛИЙН БАНКТАЙ ХОЛБООТОЙ МАН-ЫН ГИШҮҮДИЙГ ХУУЛИЙН БАЙГУУЛЛАГАД ШАЛГУУЛНА

Нийтэлсэн: Админ
2022.03.30 15:44

Хөгжлийн Банктай нэр холбогдсон Монгол Ардын намын нэр бүхий гишүүдэд хариуцлага тооцуулах тухай асуудал хөндөгдөөд хоёр сарын хугацаа өнгөрлөө.

2022 оны 1-р сарын 20-нд Хөгжлийн банкны удирдлагууд мэдээлэл хийж, чанаргүй зээлдэгчдээ зарласан. Нийт 66 зээлдэгч байгаагаас тал нь буюу 55.3 хувь нь чанаргүй зээлдэгч байна, хэрвээ энэ хүмүүс зээлээ төлөхгүй бол Хөгжлийн банк дампуурч, тэдний зээлийг улс төлөхдөө тулаад байна хэмээн хатуухан мэдээ дуулгасан.

Тэгвэл МАН-ын ерөнхий нарийн бичгийн дарга, стратегич Д.Амарбаясгалан 2022 оны 1-р сарын 28-нд мэдэгдэл гаргаж, “Зээл авч зориулалтын бусаар ашигласан, санаатайгаар зээлээ төлөхөөс зайлсхийсэн, гэрээний үүргээ биелүүлээгүй аж ахуйн нэгжүүд болон эдгээр байгууллагад зээл авахад эрх мэдлээ урвуулан ашиглаж нөлөөлсөн улс төрчид, албан тушаалтнуудтай аль нам засгийн эрх барьж байсан, аль нам засгийн эрх барьж байгаагаас үл хамааран нам харгалзахгүй хатуу тэмцэх болно” зэргээр тэмцэл эхлүүлсэн. Мэдэгдэл хийснээс хойш хэсэг хугацаанд чимээгүй байсан тэрбээр өөрийн фэйсбүүкээр дамжуулан хариулт өгөв.

Д.Амарбаясгалан "Монгол Ардын нам авлига, албан тушаалын гэмт хэргээс ангид байх, улс төрийн ёс зүйг дээдлэх дэвшилтэт бодлого, зорилт, дүрмээ баримтлан нийгмийн шударга ёсны хүсэл, хүлээлтийг хүндэтгэн ажиллаж байна.

Хөгжлийн Банканд хуримтлагдсан 1.8 их наяд төгрөгийн чанаргүй өр зээлийн асуудал Монгол Ардын нам, ард иргэдийн анхаарлын төвд байгаа билээ. Монгол Ардын Намын Хяналтын ерөнхий хороо 2022.02.18-ны өдөр хуралдан, 21 дүгээр тогтоол гарган, Хөгжлийн Банкны зээлтэй холбогдсон нэр бүхий 10 гишүүнийг тайлбараа заасан хугацаанд ирүүлэхийг шаардсан. Намын бага хурлын гишүүн Ш.Үнэнбат өөрийн хүсэлтээр намын гишүүнээс түдгэлзэж шалгуулахаар болсон.

Мөн хурлаар нэр бүхий таван гишүүнийг намаас гарсанд тооцож, намын таван гишүүнийг Бага хурлын гишүүнээс чөлөөлсөн.

2022.03.23-ны өдөр Монгол Ардын Намын Хяналтын ерөнхий хороо уг асуудлаар дахин хуралдаж, ирүүлсэн тайлбар нэг бүрийг авч хэлэлцээд, Намын дүрмийн 4 дүгээр зүйлийн 4.2.5, 4.2.8, 4.2.9, 4.3.2, 35 дугаар зүйлийн 35.4 дэх хэсгийг тус тус үндэслэн, “Мэдэгдэл хүргүүлэх тухай” 32 тоот тогтоол гаргасан.

Тогтоолд Хөгжлийн Банкны зээлд нэр холбогдсон дараах гишүүдийг өөрийн санаачилгаар дөрөвдүгээр сарын 10-ны дотор хууль, хяналтын байгууллагад хүсэлтээ гарган гэм буруутай эсэхээ шалгуулахыг үүрэг болгосон. Эдгээр намын гишүүдийг дөрөвдүгээр сарын 10-ны дотор хуулийн байгууллагаар шалгуулах хүсэлтээ гаргаагүй бол намын гишүүнээс түдгэлзүүлнэ. Гэм буруутай нь тогтоогдвол намын дүрмийн дагуу гишүүнээс хасна.