ДЭЛХИЙН ТҮҮХЭНД ЭНЭ ӨДӨР

Нийтэлсэн: Админ
2021.08.21 16:05

Энэ өдөр дэлхийн түүхэнд болсон онцлох үйл явдлуудаас хүргэе

1911 оны энэ өдөр алдарт зураач Леонардо Давинчигийн "Мона Лиза" бүтээл Луврийн музейгээс хулгайд алдагдаж байжээ. Итали гаралтай гурван хулгайч шөнө дөлөөр Луврийн музей руу нэвтэрсэн байна. Тэдний нэг нь тус музейд ажилдаг Винчензо Перугиа байсан юм. Тэрээр уран зургийн талаар өндөр мэдлэгтэй уран бүтээлч байжээ. Уг зургийг 1913 он хүртэл олж чадаагүй байсан. Эцэст нь нэгэн тосгоны хар захаас олсон байна. "Мона Лиза" бүтээлийг алдагдсан байх хугацаанд хэвлэлүүд түүнийг улам олонд таниулж байжээ.

1959 оны энэ өдөр Хавай арал АНУ -ын хамгийн сүүлчийн буюу 50 дахь мужаар бүртгэгджээ. АНУ-ын эргээс 3200 км-ын зайд орших энэ арлыг Английн судлаач Жэймс Күүк 1778 онд илрүүлж байжээ. 137 галт уулын арлаас бүрдэх Хавай нь өдгөө аялж зугаалахад тохиромжтой, дэлхийн хамгийн үзэсгэлэнт газруудын нэг болоод байна.

1942 оны энэ өдөр "Диснэй" компани алдарт “Бэмби” хүүхэлдэйн киноныхоо нээлтийг хийсэн байна. Феликс Салтоны “Бэмби ойд амьдарсан нь” зохиолоос сэдэвлэн бүтээсэн энэ кино нь тухайн жилдээ хамгийн их ашиг олсон хүүхэлдэйн киногоор нэрлэгдэж байсан юм. Байгаль эх, ан амьтан хайрлах сэдлийг төрүүлэх энэ бүтээл олон кино наадмуудаас дээд шагнал хүртэж байсан.
1991 оны энэ өдөр Бүгд Найрамдах Латви Улс ОХУ-ын харьяанаас гарч тусгаар тогтнолоо зарлаж байжээ. Дэлхийн нэгдүгээр дайны дараа буюу 1918 оны арван нэгдүгээр сарын 18-нд Латви Улс Оросын эзэнт гүрнээс салж, тусгаар тогтнолоо зарлаж байсан. Харин дэлхийн хоёрдугаар дайны дараа буцаад ЗХУ-ын мэдэлд орсон билээ. Ингэж бүгд найрамдах 15 улсын нэг болсон юм. 1987 оноос эхлэн "Дуулж буй хувьсгал" нь Балтийн улсуудыг тусгаар тогтнолоо зарлахыг уриалсан. Улмаар 1991 онд тусгаар тогтнолоо албан ёсоор зарласан билээ.

1987 оны энэ өдөр дэлхийн кино сонирхогчдын хамгийн дуртай бүтээлүүдийн нэг “Бохир бүжиг” кино нээлтээ хийжээ. Тухайн үедээ 4.5 сая доллараар бүтээж байсан энэ киногоор дэлхийн зах зээлээс нийт 213 сая долларын ашиг олжээ.