Э.Амартүвшин шилдэг баритон шагнал хүртлээ

Ардын жүжигчин, алдарт баритон Энхбатын Амартүвшин өчигдөр “Дуурийн Оскар” гэгддэг “Opera star-International Opera Awards-2025”-аас шилдэг баритон шагналыг гурав дахь удаагаа хүртлээ. Энэ удаа Италийн Ром хотын дуурийн театрын тайзнаа гардан авч, гала тоглолтод оролцжээ. 2010 оноос олгосон эл шагналыг Э.Амартүвшин 2020 онд анх удаа хүртсэн бөгөөд 2023 онд Германы Берлинд хоёр дахь удаагаа хүлээн авсан.

Манай дуучны хувьд дэлхийн шилдэг театруудын тайзнаа тогтмол уригдан тоглож буй. Мөн суут Ж.Вердийн бүтээлүүдийг хоолойн хүч, жүжиглэлт зэрэг бүхий л талаараа төгс амилуулж ирснийг мэргэжилтнүүд тодотгодог. Цаашлаад зөвхөн дуулах бус, түүний урлагт үзүүлэх нөлөө, шинэ үеийн дуучдад үзүүлж буй үлгэр жишээг нь үүгээр үнэлж буй бөгөөд дэлхийн хэмжээний баритон болсны бас нэгэн баталгаа юм.