Шинжлэх ухааны салбарын эрдэмтэн судлаачдаас бүрдсэн зөвлөл байгууллаа
Шивээсчин Э.Сүхбаатар “Чарлаа” нэрт хэрээгээ үүрнээсээ унаад, бэртчихсэн байхад нь анх олж тэжээжээ. Одоо тэр Монголын хамгийн од хэрээ болсон. ThunderZ-ийн клипэд тоглож, өөрийнхөө хоолны мөнгийг олсон гэнэ.
Хүний л адил баярлаж, гомддог эл хэрээг “зүс нь хар, зүрх нь цагаан” амьтан хэмээн эзэн нь тодотгож байна. Мөн Монголын ард түмэнд хэрээг хараад муу ёр гэж мухар сүсэглэхгүй байхыг уриалж байсан юм.
Ингээд эзэн нь болох шивээсчин Э.Сүхбаатарын ярилцлагыг хүлээн авна уу.
– “Чарлаа”-тай анх яаж учрав?
– Нэг өдөр найз маань залгаад, “үүрнээсээ унасан нэг жижигхэн хэрээ байна, чи авах уу?” гэж асуусан. Би багаасаа хэрээ тэжээхийг хүсдэг байсан болохоор “авъя” гэж хэлсэн. Тэр үед Чарлаа бэртэлтэй, сул дорой байсан. Гэхдээ анхнаасаа л тэр над руу итгэлтэй харж байсан шүү.
– Хэрээ тэжээхэд хэцүү юу?
– Эхэндээ амар байгаагүй. Хэрээ бол маш ухаантай, бас ааштай амьтан. Заримдаа надад гомдоод хэд хоног дуугаа хураадаг, ажилдаа гарахдаа анхаарал тавихгүй бол “чар чар” гээд уурладаг. Тиймээс л “Чарлаа” гэдэг нэр өгсөн юм.
– ThunderZ-ийн клипэнд тоглосон гэл үү?
– Тийм ээ, тэгсэн. Камер, гэрэл, дуу чимээ дунд анх удаа орсон ч Чарлаа айгаагүй. Харин ч тайван, итгэлтэй байсан. Клип цацагдсаны дараа олон хүн “энэ ямар ухаантай шувуу вэ?” гэж гайхаж байсан. Зарим нь бүр “хиймэл шувуу юм уу?” гэж хүртэл асуусан шүү (инээв).
Зарим бичлэг, сурталчилгаанд орсон хөлс нь түүний тэжээлийн зардалд хүрдэг. Гэхдээ энэ бол ашиг гэхээсээ илүү хүмүүсийн хандлагыг өөрчлөх нэг арга. Би хүмүүст “хэрээ муу ёрын амьтан биш, ухаантай, хайр татам шувуу шүү” гэдгийг харуулахыг хүсдэг.
– Тэр ямар зан ааштай вэ?
– Чарлаа бол үнэхээр сайхан сэтгэлтэй шувуу. Заримдаа надаас анхаарал хүсэж, тоглоом нэхэж, бүр инээж байгаа юм шиг дуу гаргадаг. Хүмүүс итгэхгүй байх л даа, гэхдээ тэр хүний сэтгэлийг мэдэрдэг.
– Монголчууд хэрээг муу ёрын гэж үздэг. Та үүнийг яаж хардаг вэ?
– Бидний дунд ийм мухар сүсэг байдаг. Гэхдээ хэрээ бол хамгийн ухаантай шувуудын нэг. Байгальд хог цэвэрлэж, орчноо хамгаалж байдаг чухал амьтан. Зүгээр л хар өнгөтэй болохоор муу ёр гэж боддог нь өрөөсгөл.
Миний Чарлаа зүс нь хар ч, зүрх нь цагаан.
– Чарлаа таны амьдралд ямар өөрчлөлт авчирсан бэ?
– Итгэл, энэрэл, тэвчээрийг надад заасан. Амьтанд хайр өгвөл тэр ч гэсэн хариу өгдөг юм байна. Өглөө сэрэхэд мөрөн дээр ирээд “чар чар” гээд сэрээдэг. Тэр мөч миний хувьд хамгийн үнэ цэнтэй үе.
Тиймээс амьтдыг хайрлаарай. Хэрээ, муур, нохой гээд бүгд сэтгэлтэй. Хэрээг муу ёрын гэж битгий бодоорой. Тэд ч бас бидний адил баярладаг, гомддог, хайрладаг амьд оршнолууд юм шүү.
2
0
1
0
0
0
0
0
