Ч.Хантүмэн: Данс хаачихлаа, дарга нарыг мууллаа гээд ингэв үү
Энэрэл эмнэлэгт коронавирусийн халдвар авсан хоёр настай хүүхэд хэвтэн эмчлүүлж байхад нь 2021 оны арван нэгдүгээр сард хугацаа нь дууссан ампициллин тариа тарьсан тохиолдол гарсан байна. Энэ талаар хүүхдийн ээж Г болон Энэрэл эмнэлгийн эмчилгээ эрхэлсэн орлогч дарга Г.Одончимэгтэй холбогдож тодрууллаа.
Иргэн Г “Нэгдүгээр сарын 7-оос 12-ныг хүртэл манай хүүхэд Энэрэл эмнэлэгт эмчилгээ хийлгээд гарсан. Гарахдаа хийсэн тариаг нь аваачиж өгөх гэж байгаад хугацаа нь дуусчихсан байгааг анзаарч харсан. Ерөнхийдөө тав хоногийн хугацаанд энэ тариаг тарьсан гэсэн үг. Эмнэлгийн зүгээс 2023 онд хугацаа нь дуусах хэвийн тариа байсан. Сүүлийн хоёр хоногт нь буцаалт хийгдэх байсан тариа холилдоод орчихсон байна гэж тайлбарлаж байгаа. Бүх тарианы хугацаа нь 2021 онд дуусчихсан байсан юм уу, үнэхээр сүүлийн хоёр өдөр хугацаа нь дууссан тариа холилдсон юм уу гэдгийг надад мэдэх ямар ч боломж байхгүй. Тарианы хугацаа 2021 оны арван нэгдүгээр сард дууссан. Одоогоор хүүхдийн биед ямар шинж тэмдэг илрээгүй. Эмнэлгийн зүгээс тайлбарлахдаа ампициллиныг тав хоногийн хугацаатай зургаа болон найман цагаар өдөрт гурван удаа манай хүүхдэд хийж байсан байгаа юм.
"Өөрсдөө тайлбарлахдаа ампициллин хугацаа нь дуусчихсан бол үйлчлэл нь байхгүй болчихдог. Сөрөг нөлөө байхгүй гэсэн"
Үйлчлэл байхгүй тариаг манай хүүхдэд эмчилгээ гээд хийгээд байсан байна шүү дээ. Үүсэж болзошгүй сөрөг нөлөөг би ч хэлж мэдэхгүй. Манай хүүхдэд ч хариу урвал илэрсэн зүйл байхгүй болохоор яг одоогоор сайн хэлж мэдэхгүй байна. Айдастай л байна. Үйлчлэлгүй тариа хийсэн юм бол бид яах гэж тав хоног эмчилгээ хийлгэсэн юм бэ? Хоёр настай хүүхэд чинь цагаан хувцастай хүн орж ирэхээр л айгаад уйлчихдаг. Миний бүх анхаарал хүүхдээ тайвшруулж, аргадахад л төвлөрнө шүү дээ. Тэгэхэд ийм нэртэй тариаг танай хүүхдэд хийлээ шүү. Хугацаа нь тэдэн онд дуусна шүү гэж хэлдэг биз дээ. Манай өрөөнд дөрвөн хүн хэвтэж байхад нэгэнд нь ч тэгж тарианы дуусах хугацааны талаар мэдээлэл өгсөн юм байхгүй. Эмнэлгийн сувилагч нар ерөөсөө ямар ч анхааруулах юм хэлдэггүй. Бусад хүмүүс надад тохиолдсон зүйлийг хараад тариагаа шалгаж эхэлсэн” гэж хэллээ.
Хүүхэд анх дүүргийн эмнэлэгтээ очиж үзүүлээд ковидийн шинжилгээний хариу нь эерэг гарсны улмаас Энэрэл эмнэлэгт хэвтэн эмчлүүлсэн байна.
Иргэн Г “Дүүргийн эмнэлгийн хүлээх авахад анх очиход ларингит байж болзошгүй гээд шууд хэвтэх заалттай байсан боловч түргэвчилсэн тестээр ковид эерэг гараад Энэрэл эмнэлэгт хуваарилагдаж очсон. Эмчлэгч эмч гурав хоног байлгаад хүүхдийг чинь хянъя гэсэн. Хамгийн гол нь тэр хэсэг ковидийн улаан бүс. Дахиад халдвар, өвчин авах эрсдэлтэй. Том хүний тасагт хүүхэд хэвтээд байхаар өөр халдвар авч ч болзошгүй. Эмнэлгээс гарахдаа рентгенд харуулахад бронхиттой байна гэсэн. Эмчилгээ нь сайн хийгдээгүй юм чинь яаж эмчлэгдэх юм бэ? Тийм биз дээ. Азаар тэр тариа нь ямар нэгэн гаж, сөрөг нөлөөгүй байсан ч гэсэн ямар ч хэрэггүй тариа хийх бүрдээ гурван удаа хүүхдийн минь судсыг хагалсан. Тэгэхэд юу ч болоогүй юм шиг тарианы үйлчлэл нь багасчихсан. Танай хүүхдэд ямар ч сөрөг нөлөөгүй гэж ичих ч үгүй хэлж байгаа юм даа. Энэ эмнэлгийн сувилагчид үнэхээр чадваргүй. Ямар шалгуураар авдаг эсэхийг нь мэдэх юм алга. Нэгдүгээр сарын 7-ны өдөр бид хоёроос шинжилгээ авсан хэрнээ эмнэлгээс гарах гэсэн чинь шинжилгээ дутуу байна дахиж шинжилгээ авна гэсэн. Бид хүүхдийнхээ шинжилгээг 7-нд өгчихсөн гэсэн чинь мэдэхгүй, байхгүй байна. Тэгээд бид хоёр эмнэлгээс гарч байгаа юм чинь дахиж шинжилгээ өгч яах юм бэ гэхэд стор дээрээ байх ёстой юмаа гэлээ. Тэр эмчийн бичиг баримтыг бүрдүүлэхийн төлөө би хүүхдээ хатгуулаад шинжилгээ дахиад өгнө гэнэ. Би дургүйцээд өгөхгүй гэж байснаа тарианы асуудал гараад янз бүрийн юм хүүхдэд минь болчихсон байх вий дээ гэж бодоод шинжилгээ өгсөн. Шинжилгээ авахдаа надаар хүүхдийн минь хөлийг бариулчихсан. Өрөөний эгчийг дуудаад тариагаа бариулчихсан. Сувилагч өөрөө спиртээр арчингуутаа тариагаа хийхдээ салганасаар байгаад судсыг нь хэд хэд хагалсан. Өмнөх өдөр нь уян зүүгээ солиулахад ч гэсэн өөр нэг сувилагч салгалаад, чичрээд мөн л манай өрөөний эгч нараар нэгэнд нь хөвөн, нэгэнд нь уян зүү, наалт бариулж бөөн юм болж байж уян зүүгээ тавьсан. Тэгсэн манай хүүхдийн цус урсаад хөнжлийн даавуу цус болчихсон. Гэтэл сувилагч хүүхдийн цус ийм шингэн байдгийг мэдсэнгүй гэж хэлж байгаа юм даа. Тийм чадваргүй хүн ажиллаж болдог юм уу. Ийм хариуцлагагүй.
"ЭНЭРЭЛ ЭМНЭЛЭГТ МАШ ИХ ГОМДОЛТОЙ БАЙНА"
Энэрэл эмнэлгийн Мөнхбаяр гээд эмч бий. Тэр эмчид ч гэсэн би гомдолтой байгаа. Яагаад гэхээр 11-ны өдөр өглөө манай хүүхдийг үзээд ийм хөөрхөн сэргэлэн болчихсон юм чинь гарч болно гэсэн юм. Төд удалгүй залгаж хоёр эмийн нэр хэлснээ үргэлжлүүлээд хоёр хоног уугаарай тэгээд болоо шүү гэсэн. Тэгснээ дахиад нэг минутын дараа залгаснаа өө та хоёр чинь рентгенээр хатгаатай гэж гарсан байна. Дахиж рентгенд харж байж гаргахгүй бол болохгүй юм байна. Маргааш харъя гэсэн. Тэгэхээр тэр эмч манай хүүхдийн сторт шинжилгээ нь байхгүй байсныг мэдэхгүй. Рентгений зургийг нь ч хараагүй байж манай хүүхдийн яг юун дээр үндэслэж эмчилгээ хийгээд байсныг би мэдэхгүй байна. Ерөөсөө л эмч, сувилагчид бүгд маш замбараагүй. Ямар ч сэтгэлгүй. Эмнэлэгт хэдэн хүмүүс ирдэг. Энэ хүмүүстээ “цайны” хэдэн тариа хийдэг. Тэрийгээ ч олигтой хийж чаддаггүй тийм хүмүүс л гэж би ойлгосон. Миний хувьд Энэрэл эмнэлэгт маш их гомдолтой байна” гэсэн юм.
"ХУГАЦАА ДУУССАН ТАРИА ӨВЧТӨНД ХИЙСЭН НЬ ҮНЭН"
Ингээд бид Энэрэл эмнэлгийн эмчилгээ эрхэлсэн орлогч дарга Г.Одончимэгтэй холбогдож болсон явдлын талаар асуухад “Хугацаа дууссан тариа өвчтөнд очсон асуудал гарсан. Энэ бол үнэн. Журмынхаа дагуу эм байнгын хяналтад байдаг. Хугацаа нь дууссан тариаг ашиглалтаас гаргаж албан ёсоор устгалын компанид өгч устгуулдаг. Ковидийн нөөцийн тасагт байсан эм тариаг татан авахдаа дөрөв, таван ширхэг тариаг хугацаа нь дуусах болоогүй байсан эм тариатай нэг хайрцагт хийснээс болсон. Энэ бол ажилтны үйл ажиллагааны буруу. Бид хугацаа нь дууссан ампициллин ямар хоруу чанартай, сөрөг нөлөөтэй эсэх талаар судалж үзсэн. Олон улсын, Монгол улсын судалгаануудаас асууж тодруулсан. Энэ тохиолдолд тухайн эмийн бодисын үйлчлэх хүч нь сулардаг түүнээс биш өөр ямар нэгэн хортой чанартай, гаж нөлөө үзүүлэх үйлчлэл байдаггүй юм байна. Олон янзын судалгаанаас судалсан. Хугацаа дуусчихсан тариа тухайн хүүхдэд нэг, хоёр хийгдсэн үү гэдгийг тодорхойлох боломжгүй байгаа. Хугацаа дууссан, дуусаагүй тариа зэрэг оччихсон байсан. Бид эмийн сандаа дахин хяналт шалгалт хийгээд, эмнэлгийн аудит шалгалт зохион байгуулж байна. Тэгэхэд тийм дөрөв, таван ширхэг тариа хугацаа дуусаагүй эмийн хайрцаг руу ороогүй нь мэдэгдсэн. Тухайн тариаг хийсэн сувилагч, эм зүйчид дотооддоо хуралдаад цалингийн арга хэмжээ аваад асуудлыг лавшруулж байна. Дахиад ийм эрсдэл гаргахгүй байхын тулд сувилагч, эм зүйч нарын дунд хоёр янзын төлөвлөгөөт ажил гаргуулж батлуулаад түүнийхээ дагуу залруулах арга хэмжээг аваад явж байна. Хүүхдийн ээжтэй байнгын холбоотой байгаа. Зөвлөгөө өгөөд, ковидийн дараа үргэлжлэх эмчилгээг хийж байна. Одоогоор хүүхдийн биед янз бүрийн хортой шинж тэмдэг илрээгүй. Ар гэрт нь аль болох тайлбарлаад, уучлалт гуйгаад байж байна.
Ампициллин бол өргөн хүрээний антибиотик. Тухайн хүүхэд ларингиттай гээд хоолой ам нь бачуурсан шинж тэмдэгтэй ирсэн. Тэгээд биеийн байдлаас нь шалтгаалаад антибиотик буюу бактерын эсрэг эмчилгээ хийсэн. Шингэн эмийн хувьд дотор нь тунадас үүсэх зэргээр аюул нь нунтаг эмийг бодоход их байдаг. Ампициллин нь нунтаг эм учраас аюул арай бага гэсэн судалгаанууд бий. Энэ талаар хүүхдийн ээж, аавд нь бас тайлбарлаж хэлсэн” гэв.
Эмнэлгийн ачаалал их байгаа энэ үед эцэг эхчүүд та бүхэн анхааралтай байж эм тарианы хадгалах хугацаа болоод хүчинтэй эсэхийг сайтар шалгаж байхыг зөвлөж байна.
0
0
0
0
0
0
0
0
