Б.Жавxлан: Энэ жил xарьцангуй бага алдагдалтай төсөв батлагдсан
Хэрэглэгчийн нэг ч дуудлага, мессежийг алдахгүй хариулах нь бизнесийн борлуулалтыг өсгөх гол боломж. Олон компаниудын хэрэглэгчтэй харилцах үйлчилгээг хариуцан ажиллаж байгаа “SabaX” компанийн үүсгэн байгуулагч, захирал Б.Сарантуяатай “Бизнес өрөг” нэвтрүүлгээрээ ярилцлаа.
Бизнесүүд ковидийн үед цахим хэлбэр рүү эрчимтэй шилжсэн. Бүх үйл ажиллагаагаа өөрсдөө хийх боломжгүйгээс call center гэх үйлчилгээг эхэлж байна. Call center гэдэг бизнесийн ард юу байдаг вэ?
Манай компанийг Сall center дуудлагын төв, лавлах төв гэдгээр нь бизнес эрхлэгчид түгээмэл мэддэг. Гэхдээ бид хэрэглэгчидтэй илүү ойр ажилладаг. Тэд л дуудлагын төв рүү залгадаг. Ямар ч байгууллагын мэдээлэл хэрэгтэй болоход дуудлагын төв рүү залгадаг. Бид дуудлагын төвийг арай өргөжүүлсэн байдлаар монголд анх удаа хэрэглэгчтэй харилцах төв гэдэг энэ концепцийг бий болгохыг зорьсон.
Хэрэглэгчтэй харилцах төв, Сall center хоёрын ялгаа нь Сall center гэхээр сall гэдэг үгнээсээ зүгээр л дуудлага хийнэ гэж ойлгогдоод байгаа юм. Сая хэлсэнчлэн ковидийн үед бүгд алсын зайнаас бараа, үйлчилгээгээ борлуулах хэрэгтэй боллоо. Уулзаж чадахгүй ч бизнесүүд бараа бүтээгдэхүүнээ хэрэглэгчдэдээ танилцуулах хэрэгтэй.
Мөн алсын зайны буюу дижиталд суурилсан сувгууд дуудлагаасаа илүү түрж орж ирж байна. Жишээлбэл, бидний түгээмэл ашиглаж байгаа фэйсбүүк, инстаграмм, и-мэйлээр хүртэл бизнесийг хэрэглэгчтэй нь холбож өгөх шаардлага тулгарч байна. Энэ харилцаа цаашаа борлуулалтын гол суурь нь болдог.
Үүний цаана яг юу болдог вэ гэхээр, манай бизнес эрхлэгчид нэг ажилтан суулгаад, утсаа аваад боллоо гэж боддог. Гэтэл үүний цаана маш том IT-н систем ажилладаг. Технологид суурилсны давуу тал нь алсын зайнаас цаг хугацаа, орон зай үл хамааран маш бага зардлаар өөрийнхөө зорилтот хүн рүү холбогдох, дуудлага, чат бүрээ бүртгэж дата үүсгэн анализ хийх боломж олгоно. Яг аль үед хүмүүс чат бичиж, залгаж байна, аль үед нь бид хүний нөөцөө яаж хуваарилах вэ гээд цогцоороо том нөөцийн менежмент байдаг. Бизнесүүд маань эхнээсээ ойлгоод цаг хугацаагаа товчлоод өөрөө маш олон төрлийн мэдлэг, ур чадварыг эрж хайхгүйгээр манай компаниас үйлчилгээ авч байна.
Зөвхөн дуудлага биш, сошиал, и-мэйл-ээр бүгдийг нь хариуцах уу?
Тэр компани өөрөө зах зээлд хэрэглэгчтэйгээ харилцах гээд ямар сувгуудыг бий болгосон байна, тэр сувгуудаар нь бүгдийг нь авна гэсэн үг.
ДУУДЛАГЫН ТӨВИЙГ ӨРГӨЖҮҮЛЭН МОНГОЛД АНХ УДАА ХЭРЭГЛЭГЧТЭЙ ХАРИЛЦАХ ТӨВ ГЭДЭГ КОНЦЕПЦИЙГ БИЙ БОЛГОХЫГ ЗОРЬСОН
Компаниуд нэг дуудлага аваагүй л биз. Өөрсдөө л хоёр хүн суулгаад, дуудлагадаа хариулт өгчихье. Тэр хоёр ажиллаагүй үеийн дуудлага цөөхөн байгаа гээд тоохгүй орхидог. Дуудлага бүрийг алдахгүй авах нь бизнест ямар давуу тал бий болгох вэ?
Хүмүүс ямар тохиолдолд хандаад байна гэдэг дээр мэдээлэл, туршлагатай болсон. Хэрэглэгчид мэдээлэл сайтай болсон болохоор дуудлага хийнэ гэдэг худалдан авах эцсийн шийдвэр гаргах гэж залгаж байгаа гэсэн үг. Бүх зүйл сошиалд байдаг учраас эхэлж бүгдийг нь уншчихаад, тэр компанийн нэг зүйл сонирхол татвал чатаар юм уу, шууд дуудлага хийгээд хандаж эхэлнэ. Энэ бол алдаж болохгүй боломж. Тухайн бараа бүтээгдэхүүн, үйлчилгээг нь сонирхоод, тэр хүн өөрөө сэдэлжээд залгаж байгаа. Яг сонголтоо хийх гэж байгаа учраас энэ дуудлага маш үнэ цэнтэй.
Компаниуд урамшуулал зарласан ч юм уу, эсвэл тэр хүнд тохирсон өөр гоё сайжруулсан бүтээгдэхүүн гаргавал яг тэр харьцсан хүн рүүгээ датагаа ашиглаад өөрсдөө залгаж болно. Уламжлалт байдлаар сонирхсон сонирхоогүй бүх хүмүүс рүү рекламаа цацаад, фэйсбүүкээр бүүст хийгээд, телевизийн рекламууд хийж үргүй маркетингийн зардал гаргадаг. Харин одоо хэрэглэгчийн датагаа үндэслэн яг сонирхсон хүмүүст маркетингаа хүргэх ёстой.
Таны хувьд энэ бизнесийг эхлүүлсэн нь амьдралын гол эргэлтийн цэг байсан гэсэн. Яагаад энэ салбарт орж бизнес эрхлэх болов?
Хүмүүс ажиллаж байх хугацаандаа карьераа өөрөөр солиод байдаг. Өөр газруудад ажилладаг. Би нэг газраа л тууштай ажилласан. Анх Мобиком компанид оператороос эхэлж ажилласан. Холбооны инженер мэргэжилтэй болохоор инженер болно л гэж бодож байлаа. Намайг ажилд орсны дараа Мобиком компани Сall center төв байгуулж, намайг хариуцаж ажиллуулахаар томилсон. Түүнээс хойш дэд захирал болтлоо тууштай ажилласан. Өөрийгөө хөгжүүлэх ёстой гээд Австралид бизнесийн удирдлагын мастер хамгаалж ирээд хамгийн сайн чаддаг ажлаа бизнес болгоод явж байна.
Өөрөө бизнес болгоод аваад явах, том компани удирдах хоёрын ялгааг яаж мэдэрч байна?
Мэдээж маш том, системжсэн, мундаг компани дотор ажиллах, өөрөө гараад юу ч байхгүйгээс эхлүүлж хийх гэдэг хоёрын хувьд асар их ялгаа бий. Хамгийн гол нь би өөрөө үүнийг мэргэших хүртлээ хийж байсан нь боломж, давуу тал юм. Би ерөөсөө Сall center-н бизнес хийнэ гэж бодоогүй ч санал орж ирсэн. Манай хамгийн анхны харилцагч “Амар” даатгал. Тухайн үед би байгууллагуудад зөвлөх үйлчилгээ үзүүлдэг байв. Яаж харилцагчийн үйлчилгээгээ сайжруулах, яаж энэ дуудлагын төв, хэрэглэгчтэй харилцах төв байгууллагад ямар үнэ цэн оруулдаг вэ гэдгийг ойлгуулах гээд, байгууллагууд дээр зөвлөх үйлчилгээ хийдэг байсан. Тэр үед надад манай компанийн хэрэглэгчтэй харилцах хэсгийг чи аутсорсинг хийгээч гэхэд нь өөрийнхөө давуу талыг бизнес болгох ёстой юм байна гэдгийг ойлгосон. Бид байгуулагдаад хоёрхон жил болж байгаа ч эрэлт их байгаа болохоор хурдтай тэлж байна. Одоо үйлчилгээгээ төрөлжүүлж, давхар оператор бэлтгэдэг болж байна, системийн шийдэл санал болгож байна. Хэрэглэгчтэй харилцах мэдээллийн төвийн цогц үйлчилгээг үзүүлж байна.
0
0
0
0
0
0
0
0
