Танилц: Тав хоногийн цаг агаарын төлөвтэй танилцана уу
Гашуун яриа нэвтрүүлгийн энэ удаагийн дугаарт “Бест буйдан” ХХК-ийн Ерөнхий захирал Үржинжавын Батбаяр оролцлоо. Түүний хувьд үндэсний үйлдвэрлэл тэр дундаа буйдангийн салбарт 36 дахь жилдээ ажиллаж байгаа юм.
Тэрбээр:
Зах зээл дээр “дотоодын үйлдвэрлэл” гэсэн нэрийн дор гадаадад үйлдвэрлэсэн бүтээгдэхүүн борлуулах үзэгдэл нэмэгдэж, жинхэнэ үйлдвэрлэгчдийн хөдөлмөр, нэр хүнд бүдгэрч байгаад сэтгэл дундуур явдгаа хэлсэн юм.
Хэрэглэгчид үндэсний үйлдвэрлэлээ дэмжиж байна гэж итгэн худалдан авалт хийдэг ч бодит байдал дээр тэр итгэл, тэр мөнгө Монголдоо үлдэхгүй байх тохиолдол цөөнгүй байгаа тул тэдэнд бодит дэмжлэг хэрэгтэй байгаа аж.
Түүний хувьд олон жилийн турш энэ салбарт ажиллахдаа ашиг хөөхөөс илүү чанартай бүтээгдэхүүн бүтээж, хэрэглэгчидтэйгээ урт хугацааны итгэлцэл, эргэх холбоог бий болгохыг эрхэмлэж иржээ.
“Хямд авсан зүйл эцэстээ хамгийн үнэтэй тусдаг” хэмээн тэр хэлэхдээ, үнэ хямд байх нь сонголтын цорын ганц шалгуур биш гэдгийг сануулсан юм. Чанар, баталгаа, хариуцлага нь худалдан авалтын жинхэнэ үнэ цэнийг тодорхойлдог бөгөөд богино хугацааны хэмнэлт урт хугацаанд илүү их зардал дагуулах эрсдэлтэй. Харин монголдоо байгаа үйлдвэрүүд эргэх холбоотой учир чанаргүй зүйл түгээх эрх байхгүй гэдгээ ч хэлж байв.
Үндэсний үйлдвэрлэгчид ашиг ихтэй мэт харагддаг ч бодит байдал дээр тэд зээл, хөрөнгө оруулалтын дарамт дунд үйлдвэрлэлээ авч явж, бүтээгдэхүүн бүртээ өөрсдийн нэр, итгэлийг шингээж байдаг. Тэдний бүтээж буй зүйл нь зүгээр нэг бараа биш, харин айл өрхийн өдөр тутмын амьдрал, тав тух, дурсамжийн нэг хэсэг болдог онцлогтой.
Ү.Батбаярын хувьд багаасаа сэтгэлээ шингээн урлаж ирсэн буйдангаа сэнтий хэмээн өргөмжилдөг. Учир нь сэтгэлээ шингээн бүтээсэн зүйл нь гэр бүлийн гишүүд хамтдаа цагийг өнгөрөөж, амарч, заримдаа орлох зориулалтаар ашигладаг энэ орон зай нь чанар, найдвартай байдал, аюулгүй байдлыг зайлшгүй шаарддаг болохоор хэсэг бүрт нь анхаардаг ажээ. Тиймээс бүтээгдэхүүний цаана юу байгааг үл харгалзан зөвхөн үнээр сонголт хийх нь эрсдэл дагуулдгийг тэр анхаарууллаа.
Мөн Чингис хааны “өөрсдийн хийснийг ид, өөрсдийн оёсныг өмс” хэмээх үгийг иш татан, дотоодын үйлдвэрлэлээ дэмжих нь Монголд үлдэх үнэ цэн, ажлын байр, бүтээх соёлыг хадгалах бодит алхам гэдгийг онцолсон юм.
Ү.Батбаярын хувьд ээждээ сийлбэртэй ор хийж тугалтай үнээ авч өгөхөөс эхлэн, Нарантуул, Дэнжийн мянга дээр зогсож, өдөр шөнөө ч үл ялгатал завгүй хөдөлмөрлөж өнөөдрийн Бест буйданг бий болгон олон гэр бүлийг ажилтай нь залгуулж, улсдаа ч татвараа төлж, үндэсний үйлдвэрлэгч гэх тодотголыг дааж яваа ч эдийн засгийн уналт босолт, дотоодын биш гадны худалдан авалтууд ихсэж байгаа учир шантрах дөхөж байгаагаа ч хэлсэн юм.
Ийнхүү түүний орсон “Гашуун яриа” нэвтрүүлгийг та бүхэн ЭНД дарж үзнэ үү.
0
0
0
0
0
0
0
0
