УИХ дахь Ардчилсан намын бүлэг гурван өдрийн завсарлага авав
Монгол Улсын нэгдсэн төсвийн нийт орлого, тусламжийн хэмжээ 2026 оны эхний найман сарын урьдчилсан гүйцэтгэлээр 22.9 их наяд төгрөгт хүрч, өмнөх оны мөн үеэс 3.5 их наяд төгрөгөөр буюу 18.4 хувиар өсжээ. Харин төсвийн зарлага, цэвэр зээлийн хэмжээ үүнээс хурдтай нэмэгдэж, 22.2 их наяд төгрөгт хүрсэн байна.
Төсвийн тэнцвэржүүлсэн орлого эхний найман сарын байдлаар 20.1 их наяд төгрөг болж, өмнөх оны мөн үеэс 2 их наяд төгрөгөөр буюу 11.1 хувиар өссөн байна. Гэвч нийт зарлага, цэвэр зээл 2.9 их наяд төгрөгөөр буюу 15.1 хувиар нэмэгдсэнээр тэнцвэржүүлсэн тэнцэл 2.2 их наяд төгрөгийн алдагдалтай гарчээ. Энэ нь өмнөх оны мөн үеийн 1.2 их наяд төгрөгийн алдагдлаас 913.3 тэрбум төгрөгөөр нэмэгдсэн үзүүлэлт юм.
Орлогын өсөлтийн гол эх үүсвэр нь татварын орлого байна. 2026 оны эхний найман сард татварын нийт орлого 18.6 их наяд төгрөгт хүрч, өмнөх оны мөн үеэс 1.9 их наяд төгрөгөөр буюу 11.7 хувиар өсжээ. Үүнд нийгмийн даатгалын орлого 592.8 тэрбум, НӨАТ-ын орлого 564.7 тэрбум, орлогын албан татварын орлого 563 тэрбум төгрөгөөр нэмэгдсэн нь голлон нөлөөлсөн байна. Харин онцгой албан татварын орлого 86.7 тэрбум төгрөгөөр буурчээ.
Татварын орлогын бүтцээс харахад орлогын албан татвар хамгийн өндөр буюу 31.3 хувийг бүрдүүлж байгаа бол НӨАТ 23.4 хувь, нийгмийн даатгалын орлого 21.9 хувь, гадаад үйл ажиллагааны татвар 6.9 хувь, онцгой албан татвар 3.3 хувийг эзэлж байна. Орлогын албан татварын 64.5 хувийг аж ахуйн нэгжийн орлогын албан татвар, 35.5 хувийг хувь хүний орлогын албан татвар бүрдүүлжээ.
Харин төсвийн зарлагын өсөлт орлогын өсөлтийг даваад байна. Эхний найман сарын нийт зарлага, цэвэр зээл өмнөх оны мөн үеэс 2.9 их наяд төгрөгөөр нэмэгдэхэд бараа, үйлчилгээний зардал 1.1 их наяд, хөрөнгийн зардал 991.9 тэрбум, урсгал шилжүүлэг 737.6 тэрбум төгрөгөөр өссөн нь голлон нөлөөлжээ. Нийт зардлын 38.8 хувийг урсгал шилжүүлэг, 33.9 хувийг бараа, үйлчилгээний зардал, 19.2 хувийг хөрөнгийн зардал, 5.2 хувийг хүүгийн зардал эзэлж байна.
Түүнчлэн хөрөнгийн зардал 4.2 их наяд төгрөгт хүрч, өмнөх оны мөн үеэс 991.9 тэрбум төгрөгөөр буюу 30.7 хувиар өссөн байна. Үүний дотор барилга байгууламжийн зардал 702.7 тэрбум, тоног төхөөрөмжийн зардал 81.7 тэрбум, их засварын зардал 42.2 тэрбум төгрөгөөр тус тус нэмэгджээ.
Өөрөөр хэлбэл 2026 оны эхний найман сарын төсвийн зураглалд орлого нэмэгдсэн ч зарлага түүнээс өндөр хурдаар өсөж, төсвийн алдагдал тэлсэн дүр зураг харагдаж байна. Тэнцвэржүүлсэн орлого 11.1 хувиар өссөн байхад зарлага, цэвэр зээл 15.1 хувиар нэмэгдсэн нь төсвийн зарлагын дарамт буураагүйг харуулж байна.
Нийгмийн даатгалын сангийн хувьд эхний найман сарын орлого 5 их наяд төгрөг болж, өмнөх оны мөн үеэс 744.2 тэрбум төгрөгөөр буюу 17.3 хувиар өссөн бол зарлага 4.5 их наяд төгрөгт хүрч, 15.2 хувиар нэмэгджээ. Тус сан 561.8 тэрбум төгрөгийн эерэг тэнцэлтэй гарсан байна.
Эрүүл мэндийн даатгалын сангийн орлого 1.7 их наяд төгрөгт хүрч, өмнөх оны мөн үеэс 14.2 хувиар өссөн бол зарлага 1.6 их наяд төгрөг болж, 1.5 хувиар буурсан байна.
0
0
0
0
0
0
0
0
