Categories: ОНЦЛОХ МЭДЭЭ, УЛС ТӨР2025-04-03

С.Батдөл өнгөрсөн оны 9 сараас хойш амралтын газар галчаар ажиллажээ

Нийтэлсэн: Э.Булган
2025.04.03 16:06

УИХ-ын гишүүн Б.Энхбаяр “УБТЗ-ын Тээвэр зохион байгуулалтын албаны орлогч дарга асан С.Батдөл Богд уулын амралтын газар ял эдэлж байна. Энэ хүнийг амрааж байгаа мөнгө мэддэг сайдыг шийтгээрэй” хэмээсэн юм. Харин өнөөдөр /2025.04.03/ “Мөнгө мэддэг ганцхан сайд байгаа шүү дээ” хэмээгээд Сангийн сайд Б.Жавхлангийн нэрийг хэдэндээ дурдаад амжив.

Харин Б.Жавхлан сайд “С.Батдөлийн аав, ээжийг танина. Тэрнээс болж надад хар буруу юм наах гэж байгаа бол ёстой амжихгүй шүү, Б.Энхбаяраа. Ярьсан зүйлээ нотол, харъя” хэмээн уурссан юм.

Нэг Засгийн газарт хамт гар нийлэн ажиллаж байсан тэд яагаад ийн ам мурийх болов.

Тэдний мэдэгдэлтэй холбоотойгоор Хууль зүй, дотоод хэргийн сайд О.Алтангэрэл энэ талаар ам нээлээ.

Тэрбээр “Б.Энхбаяр гишүүний мэдээлэлтэй холбоотойгоор хэн нэгэн хүнд давуу тал үүсгэсэн юм байна уу гэдгийг тодруулж байна. ШШГЕГ аж ахуйн газруудтай. Хоригдлууд өөрсдөө ажиллаж, шагналын хоног авдаг гэсэн үг. ШШГЕГ-ын харъяа сувилал, амралтын газар байдаг. Тэнд тийм юм болсон уу гэдгийг тодруулж байна. Хэрэв тийм юм болсон бол холбогдох албан тушаалтнууд хариуцлага хүлээх ёстой шүү дээ” гэв.

Харин ШШГЕГ-ын дарга Б.Нандинболор “409 дүгээр хорих ангид ялаа эдэлж байгаа. ШШГЕГ-ын харьяа “Төр хурх“ амралтын газар байсан. 2024 оны есдүгээр сарын 29-ны өдөр амралтын газрын аж ахуйн хэсэгт галчаар дөрвөн хоригдол харуул хамгаалалтын ажилтны үүрэг гүйцэтгэж эхэлсэн. Амралт биш ахмад настан болон алба хаагчдаа амраадаг аж ахуйн тооцоот үйлдвэрийн газар гэж явдаг. Тэр нь хуулиар хориглосон юм байхгүй. Прокуророос зөвшөөрөл авч, аж ахуйн хэсэг рүү гаргадаг. Прокурорын тогтоолоор 2024.11 сард хорих анги руу нь татсан. Нэг сар 20 хоног галчаар ажилласан юм билээ” гэв.