Б.Анар: Багаасаа монгол дуучдыг шүтэж өссөн маань энд амьдрахад нөлөөлсөн

Энэ сарын 9-нд Монгол бөхийн өргөөний тайзнаа СТА, дуучин Б.Анарын хоёр дахь бие даасан тоглолт болно. Өвөр монголын Хөлөнбуйр аймагт төрж өссөн тэр яагаад монголд амьдрах болсон талаараа болон, уран бүтээлийнхээ тухай ярилаа.

Тэрээр, “Би Өвөр монголын Хөлөнбуйр аймагт төрж өссөн. Их сургуулиа төгстлөө Өвөр монголд байсан юм. Магистраа СУИС-ийн уртын дууч мэргэжлээр хамгаалаад, докторантад сурч ирээд, хувь тавилан гэдэг ч юм уу, нөхөртэйгөө таараад монголд суурин амьдарч байна.

Би багаасаа дуу урлагт дуртай хүүхэд байсан. Манай аавын үлдээсэн кассет бий.  Гурван настай Анараас дуулав гээд өөрийгөө зарлаад дуулдаг хүүхэд байлаа. Дуучин болоод, уран бүтээлээ хийгээд 11 дэх жилдээ болж байна. 60-70 дуу дуулсан, урын сантай. Нөхөр маань монгол хүн. Уг нь энд сурахаар ирсэн хүн чинь амьдраад л, хүүхэдтэй болоод л, монголд амьдрал өрнөж байна. Цаанаасаа хувь тавилан байсан уу, багаасаа монгол дуучдыг сонсож өссөн. Тэр үеийн дуучдыг шүтдэг, сонсох дуртай байдал намайг хөтөлж намайг монголд амьдрахад нөлөөлсөн юм болов уу гэж боддог. Цаашдаа тууштай уран бүтээлээ хийнэ. Зарим хүмүүс сошиалд намайг янз бүрээр хэлнэ ээ. Яах гэж монголд ирж дуулаад байгаа юм. Нутагтаа очиж дуулаач гэдэг. Харахад монгол царайтай ч аялгатай байна гэдэг ч юм уу. Өндөгнөөс өө хайдаг хүн олон байдаг шүү дээ.

Анхны тоглолтоо бол зоригтой л хийсэн гэж хэлж болно. Бодож байгаа юм хийгээд, оносон ч бай, алдсан ч бай өөрт нэг төрөгдөл байна шүү дээ. Анхны тоглолт төсөөлж байснаас маш гоё болсон. 3000 гаруй суудалтай их танхимд тоглолтоо хийнэ гэдэг миний хувьд мөрөөдөл байсан. Тэр маань биелээд, маш олон хүн хүлээж аваад, тоглолт маань сайхан болсон. Гол нь тоглолтоо хийж чадсан маань хоёр дахь тоглолтоо хийх зориг, эрч хүчийг өгч байгаа юм.

Миний хоёр дахь бие даасан тоглолт бөхийн өргөөнд болно. Анхны тоглолт маань 2023 онд, Анар гэж нэртэй болсон. Хоёр жилийн дараа буюу 04 дүгээр сарын 09-нд Монгол бөхийн өргөөнд “Анартай үдэш” нэртэй болно. Анар гэдэг дуучин байдгаа гэдгийг хүмүүст хүргэх зорилготой” гэлээ.