Монгол Улсын арслан М.Мөнгөн агсаны нэрэмжит xүчит бөxийн барилдаан болно
Монголын спортын түүхэнд ДАШТ-ээс дөрвөн медаль хүртсэн анхны тамирчин Очирбатын Насанбурмаа 1989 оны 4 сарын 14-нд Улаанбаатар хотод Л. Очирбат, Т. Цэрэндолгор нарын 7 хүүхдийн отгон нь болон мэндэлжээ. О.Насанбурмаа багаасаа Монгол ахуйтай ойр өссөн, малд нүдтэй, бяртай, спортод дуртай ч багш болно гэж мөрөөддөг хүүхэд байв. Анх спортод оруулсан хүн нь хүндийн өргөлтийн Хөхөө багш байсан гэдэг.
О.Насанбурмаагийн сургуулийн биеийн тамирын багш нь “10 литр сүү юм уу айраг нэг гартаа барьчихаад моринд мордоод явчихдаг охиныг спортод оруулмаар байна” гэж хэлснээр чөлөөт бөхийн улсын 7 удаагийн аварга, спортын олон төрлөөр хичээллэдэг эгч Мягмарсүрэнгээр нь дамжуулан олж 2002 онд анх хүндийн өргөлтийн спортоор спортын мастер Хөхөө багшийн удирдлага дор хичээллэж эхэлсэн гэдэг. Чөлөөт рүү орох чиглэлийг нь эгч Мягмарсүрэн нь өгчээ. Тийм ч учраас 2003 оноос чөлөөт бөхийн “Замчин” спортын хороонд Т.Сүхбаатар, спортын мастер Дамбарагчаа нарын удирдлага дор хичээллэн өсвөр, залуучууд, насанд хүрэгчдийн ангилалд олон тэмцээнд орж түрүүлж байв. Хамгийн анхны тэмцээн нь 14 настайдаа насаа нэмээд орж байсан гэдэг. Дараа нь 2005 онд Японд болсон өсвөрийн Азийн аварга шалгаруулах тэмцээнд багаараа хүрэл медаль, дараа жил нь насныхаа ангилалд барилдсан мөчөөсөө хойш ер нь цаашид спортоор хичээллэнэ гэсэн шийдвэр гаргаад тууштай хичээллэжээ. О.Насанбурмаа 73-р дунд сургууль, ШУТИС-ийн МИС-ийг Тээврийн удирдлагын менежмент мэргэжлээр 2009 онд төгссөн. 63, 67, 72 килограммд барилддаг энэ 3 жиндээ 3-ууланд нь медаль авахдаа өдөрт 2-6 цаг техник, тактик, хурд, хүч, тэсвэрийн, зарим үед хөнгөн гээд олон төрлийн бэлтгэл, тооцоолол, нарийн төлөвлөгөө гаргадаг байв.
Түүнд Олимпын медалиас бусад залуучуудын аваргын, Азийн наадмын, Азийн аварга шалгаруулах тэмцээний алт, хошой мөнгө, ДАШТ-ий 4 медаль бий. Монгол Улсаас дэлхийн аварга шалгаруулах тэмцээнээс /олимпийн төрлийн/ 4 медаль хүртсэн анхны, мөн 3 өөр жинд медаль хүртсэн ганц бөх болсон юм. 2012 оноос хойш цагдаагийн ерөнхий газрын харьяа төмөр замын цагдаагийн байгууллагад харьяалагддаг 13 дахь жилдээ ажиллаж байгаа.
Дэлгэрүүлбэл: Цагдаагийн ахлах дэслэгч О.Насанбурмаа нь Токио 2008, Истанбул 2011, Будапешт 2013, 2018 оны Дэлхийн аварга шалгаруулах тэмцээнээс хүрэл, 2013 оны Ази тивийн аварга, Өсвөр үеийн Ази тивийн аварга шалгаруулах тэмцээнээс хошой алт, нэг мөнгө, 2003 онд Ази тивийн өсвөр үеийн FS-GR-WN ангиллын аварга шалгаруулах тэмцээнээс алт, 2004-2008 онд Ази тивийн аварга шалгаруулах тэмцээнээс 3 алт, хоёр мөнгө, нэг хүрэл, 2007, 2008 онд Залуучуудын ДАШТ-ээс мөнгө, хүрэл, “Good like open” ДАШТ-ээс хүрэл, 2008 оны “Golden grand prix senior” цуврал тэмцээн болон 2008 оны оюутан залуучуудын ДАШТ-ээс алтан медаль, Монгол Улсын аварга шалгаруулах чөлөөт бөхийн тэмцээнд 8 удаа түрүүлж алтан медаль хүртсэн.
Цагдаа, дотоодын цэргийн анги, байгууллагын 2019 оны спортын аварга шалгаруулах 19 төрөлт, 210 тамирчид оролцсон цогцолбор тэмцээнийг тээврийн цагдаагийн албаны төмөр зам дахь цагдаагийн газрын цагдаа, цагдаагийн ахлах дэслэгч Монгол Улсын гавьяат тамирчин Насанбурмаагийн нэрэмжит болгон зохион байгуулсан нь түүний гавьяа, хичээл зүтгэлийг цагдаа, дотоодын цэргийн анги, байгууллагын алба хаагчдад алдаршуулж, таниулах, залуу үеийнхнийг чөлөөт бөхийн спортоор хичээллүүлэхийн ач холбогдлыг мэдрүүлэх зорилготой байсан. Мөн 2018 онд дэлхийн бөхийн нэгдсэн холбооноос Будапештийн ДАШТ-ий үр дүнг харгалзан дэлхийн чансааг албан ёсоор гаргаж вебсайтад байршуулахад Насанбурмаа эмэгтэйчүүдийн 72 килограммын жинд 53 оноогоор дэлхийн чансааг тэргүүлсэн билээ.
2021 онд Насанбурмаа Завхан аймгийн харьяат, аймгийн начин С. Доёддоржтой гэрлэсэн. Төв аймгийн Батсүмбэр суманд болсон "Осло-2021" насанд хүрэгчдийн ДАШТ-ий баг тамирчдыг сонгох хяналтын барилдааны үеэр Монгол Улсын гавьяат тамирчин Очирбатын Насанбурмаа зодог тайлсан билээ. Насанбурмаа сайн үйлсийн аянд оролцохоор 2011, 2013 оны ДАШТ-ээс хүрэл, 2013 оны Азийн АШТ, УАШТ, Иван Ярыгиний нэрэмжит “Алтан гран при”-гаас алт, оюутны их наадмаас мөнгөн медаль хүртэхдээ өмссөн өмсгөлөө дуудлага худалдаанд оруулахад чөлөөт бөхийн спортод дуртай нэгэн 3 сая төгрөгөөр худалдаж авья хэмээсэн гэдэг. Нийгмийн сайн сайхны төлөө бусдад туслахыг эрмэлздэг, “Итгэл сэтгэлийн Цагаан гүүр” гэдэг ТББ байгуулсан, зав чөлөө олдвол ном унших, ууланд алхах дуртай.
ТҮҮНИЙ ГАРГАСАН АМЖИЛТУУД:
2003 он: Насанд хүрэгчдийн УАШТ-ий хүрэл
– Азийн цомын хүрэл
2004 он: Насанд хүрэгчдийн УАШТ-ий мөнгө
– Азийн АШТ-ий хүрэл
2005 он: Насанд хүрэгчдийн УАШТ-ий алт
– Өсвөр үеийн Азийн АШТ-ий алт
– Залуучуудын Азийн АШТ-ий хүрэл
2006 он: Насанд хүрэгчдийн УАШТ-ий мөнгө
– Өсвөр үеийн Азийн АШТ-ий алт
– Залуучуудын Азийн АШТ-ий мөнгө
2007 он: Насанд хүрэгчдийн УАШТ-ий хүрэл
– Өсвөр үеийн УАШТ-ий алт
– Залуучуудын УАШТ-ий алт
– Залуучуудын Азийн АШТ-ий алт
– Залуучуудын ДАШТ-ий хүрэл
2008 он: Насанд хүрэгчдийн УАШТ-ий алт
– Залуучуудын УАШТ-ий алт
– Залуучуудын Азийн АШТ-ий хүрэл
– Залуучуудын ДАШТ-ий мөнгө
– ДАШТ-ий хүрэл
2009 он: Насанд хүрэгчдийн УАШТ-ий мөнгө
– Залуучуудын УАШТ-ий алт
– МУ-ын Ерөнхийлөгчийн нэрэмжит ОУТ-ий хүрэл
2010 он: Насанд хүрэгчдийн УАШТ-ий алт
– Оюутны УАШТ-ий алт
– Азийн наадмын мөнгө
– Бакугийн “Алтан Гранпри”-гийн мөнгө
2011 он: Иван Ярыгиний нэрэмжит “Алтан Гранпри”-гийн хүрэл
– “Mongolia Open” ОУТ-ий алт
– ДАШТ-ий хүрэл
2012 он: Насанд хүрэгчдийн УАШТ-ий мөнгө
– “Mongolia Open” ОУТ-ий мөнгө
2013 он: Насанд хүрэгчдийн УАШТ-ий алт
– Иван Ярыгиний нэрэмжит “Алтан Гранпри”-гийн алт
– Оюутны УАШТ-ий алт
– “Mongolia Open” ОУТ-ий алт
– Азийн АШТ-ий алт
– “Универсиад” их наадмын мөнгө
– ДАШТ-ий хүрэл
2014 он: “Mongolia Open” ОУТ-ий алт
– Ц.Нацагдоржийн нэрэмжит тэмцээний алт
2015 он: Насанд хүрэгчдийн УАШТ-ий алт
– Иван Ярыгиний нэрэмжит “Алтан Гранпри”-гийн мөнгө
– “Poland Open” ОУТ-ий алт
– Д.Оюунболд агсаны нэрэмжит тэмцээний алт
2016 он: Насанд хүрэгчдийн УАШТ-ий мөнгө
– “Mongolia Open” ОУТ-ий хүрэл
– “Poland Open” ОУТ-ий мөнгө
– Сассаригийн ОУТ-ий алт
2017 он: Иван Ярыгиний нэрэмжит “Алтан Гранпри”-гийн мөнгө
– “Mongolia Open” ОУТ-ий хүрэл
– ОХУ-ын цомын нээлттэй тэмцээний алт
2018 он: Насанд хүрэгчдийн УАШТ-ий алт
– Иван Ярыгиний нэрэмжит “Алтан Гранпри”-гийн хүрэл
– “Mongolia Open” ОУТ-ий мөнгө
– Азийн АШТ-ий мөнгө
– ДАШТ-ий мөнгө
– ОХУ-ын нээлттэй тэмцээний хүрэл
2019 он: Иван Ярыгиний нэрэмжит “Алтан Гранпри”-гийн хүрэл
– “Mongolia Open” ОУТ-ий алт
– “Байгаль Опен” ОУТ-ий алт
– Насанд хүрэгчдийн УАШТ-ий мөнгө
2020 он: Иван Ярыгиний нэрэмжит “Алтан Гранпри”-гийн хүрэл
– Насанд хүрэгчдийн УАШТ-ий хүрэл
2021 он: Иван Ярыгиний нэрэмжит “Алтан Гранпри”-гийн мөнгөн медальтай.
Эх сурвалж: Монголын чөлөөт бөхийн холбоо
0
0
0
0
0
0
0
0
