Ц.Нямдорж: Надад одоогийн байдлаар ямар нэгэн ажлын санал тавиагүй
Хөдөлмөр, Нийгмийн хамгааллын сайд асан А.Ариунзаяаг Ерөнхий сайдын ахлах зөвлөхөөр томилжээ. Тэрбээр Нийгмийн хамгааллын сайдын албан тушаалаа УИХ-ын гишүүн Д.Сарангэрэлд өчигдөр хүлээлгэн өгсөн. Харин Ерөнхий сайдын ахлах зөвлөх Э.Болормаа Ховд аймгийн Засаг даргад нэр дэвшин сонгогдсоноор түүнийг гүйцэтгэх засаглалын тэргүүний зөвлөхөөр ажиллах боломж ийнхүү бүрдэж байна.
А.Ариунзаяаг Л.Оюун-Эрдэнийн Засгийн газрын “гялтайх” ганц сайд байсан гэх яриа нийгмийн сүлжээнд өрнөж байна. Иймээс ч түүнийг дараагийн томилгооны хуваарилалтад “хоосон үлдээхгүй байх” гэсэн таамаг ч улстөрийн хүрээнд өрнөсөн юм.
А.АРИУНЗАЯА ХНХ-ЫН САЛБАРЫГ УДИРДАХДАА ЮУ ХИЙСЭН БЭ?
Түүнийг Хөдөлмөр, Нийгмийн хамгааллын сайдаар ажиллах үед “Цахим Монгол” хөтөлбөр эрчимжсэн. Улмаар, Халамжийн үйлчилгээнүүдийг цахимд шилжүүлж ehalamj.mn системийг нэвтрүүлсэн юм. Ингэснээр 26 төрлийн үйлчилгээг Ehalamj.mn болон E-Mongolia системд цахимаар үзүүлдэг болсон.
Түүнчлэн, Нийгмийн даатгалын дэвтэр, тэтгэврийн дэвтрийг халж, цахимд бүрэн шилжүүлсэн байна. Мөн Нийгмийн даатгалын сайн дурын гэрээг цахимаар байгуулж, шимтгэл төлөлт болон хяналтаа цахимаар хийх боломж бүрдүүлжээ. Эдгээрээс гадна:
- Ажилгүйдлийн тэтгэмж авах хүсэлт
- Жирэмсний болон амаржсаны тэтгэмж авах хүсэлт
- Хөдөлмөрийн чадвар түр алдсаны тэтгэмжийг авах хүсэлт
- Эрүүл мэндийн хуудас буюу листийг тус тус цахимаар авах боломж бүрдсэн байна.
Түүнчлэн, Нийгмийн даатгалын тайланг тоон гарын үсгээр олгодог болж, Хүнс тэжээлийн дэмжлэг олгох журмыг шинэчилсэн зэрэг онцлох шинэчлэлт өөрчлөлтүүд А.Ариунзаяаг сайдаар ажиллаж байх үед хийгджээ. Үүний үр дүнд сард 405 сая төгрөг, жилд 4.8 тэрбум төгрөг хэмнэх боломж бүрдсэн байна.
Сайд А.Ариунзаяа “Халамжаас хөдөлмөрт бодлогыг” дэвшүүлж, “Оролцоо” төслийг эхлүүлсэн, Хүнсний талонгүй сум болох зорилтыг эрчимжүүлсэн зэрэг онцлох ажлуудад төвлөрч ажилласан хэмээн тайлагнажээ.
0
0
0
0
0
0
0
0
