Ц.Нямдорж: Надад одоогийн байдлаар ямар нэгэн ажлын санал тавиагүй
Шинээр томилогдсон Засгийн газрын гишүүд Улсын Их Хуралд өнөөдөр тангараг өргөлөө.
Засгийн газрын Хэрэг эрхлэх газрын дарга Д.Амарбаясгалан "Хувь хүний зүгээс сайд болъё гэдэг зорилго илэрхийлдэггүйг минь та бүхэн мэднэ. Энэ цаг үед МАН хоёр дараалан Засгийн эрх барьж байна. Мөн 2024 оны сонгуулийн бэлтгэл ажлаа хангах, өмнөх хоёр сонгуульд амласан мөрийн хөтөлбөрийн хэрэгжилтийг бүрэн хангуулах чиглэлд онцгойлон анхаарч ажиллах шаардлага байна. Иймд Засгийн газрын Хэрэг эрхлэх газарт ажиллахаар зорин ирлээ.
"ТӨР, ИРГЭНИЙ ХАРИЛЦААГ ОЙРТУУЛЖ, АМАР ТАЙВАН УЛС ОРНЫГ БҮТЭЭХИЙН ТӨЛӨӨ АЖИЛЛАНА"
Төрийн анхан, дунд шатанд төрийн хэрэгжилтийг хангаж ажиллах зорилт тавьж байна. Төр, иргэн ойртох ёстой. Төрийн бүтээмжийг сайжруулах чиглэлд нээлттэй ил тод байдлыг эрхэмлэж, ур чадвар дээр үндэслэн төрийн сайжруулалтыг хийнэ гэсэн зорилтыг би харж байна. Монгол улсын хувьд цомхон бүтэцтэй, 3,3 сая хүн амтай улс. Иргэн, төр хоёрын харилцаа төдийлөн хангалтгүй үзүүлэлттэй. Нөгөө талаар, арга барилын хувьд төр, иргэн ААН-д илүү дарамт болж явдаг, ийм тогтолцоо он удаан жил байж ирсэн. Тэгэхээр үүнийг төр аль болох иргэн, ААН-дээ саад болдоггүй, амар тайван амьдрах орчныг бүрдүүлдэг улс орныг бүтээхийн төлөө бид зорин ажиллах ёстой гэж бодож байна.
Нам шинэчлэгдэн, арга барилаа өөрилж байж улс орныг удирдах нөхцөлийг бүрдүүлнэ. Бид үүндээ тааруулсан социологийн болон бодлогын судалгааг удаа дараа хийж ирсэн. Улс төрийн нам институци шинэчлэгдэн өөрчлөгдөж, илүү ёс суртахуунтай болж чадсанаараа төрийн өөрчлөлт, шинэчлэлт эхэлнэ гэсэн итгэл, үнэмшилтэй байдаг. Тиймээс улс төрийн намын шинэчлэлийг зогсоохгүйн төлөө дараа, дараагийн алхмуудыг хийнэ.
ТОМИЛГООНД ЯМАР НЭГЭН УЛС ТӨРИЙН ЯРИА ХЭЛЭЛЦЭЭР БАЙХГҮЙ
Энэ томилгоонд ямар нэгэн улс төрийн яриа хэлэлцээр хийгдсэн зүйл байхгүй. Ер нь нэг зүйлийг хэлье. Албан тушаал хүссэн хүн нь биш, хэрэгцээтэй хүн байснаараа ажил амжуулдаг. Энэ тогтолцоо руу бид шилжих ёстой. Сайд байсан хүн дахин сайд хийж болохгүй гэсэн туйлширсан үзлээр хандахаас илүүтэй улс төрийн болон аж ахуйн туршлагатай, чадварлаг, хурдтай ажиллах боломж бололцоог нээх үүднээс л асуудалд хандаж байгаа гэж ойлгож болно. Мэдээж шинэ сайд нараар кабинетаа бүрдүүлсэн Засгийн газар ойрын 1-3 сардаа илүү бүтээмжтэй ажиллаж чадах уу гэдгээ харуулах байх. Ард иргэдийнхээ итгэл найдварыг тээсэн, илүү хүчирхэг, хурдтай Засгийн газар байхын төлөө ажиллана.
Парламентын засаглалыг улам бүр хөгжүүлж байх ёстой. Парламентын засаглалыг бүрдүүлдэг субъектууд бол улс төрийн намууд. Улс төрийн намууд парламентад оролцсон ч бай, оролцоогүй ч бай илүү чадварждаг байх ёстой. Дангаараа бид ялаад, ажиллаад байвал парламентын засаглалд аюул учруулах алхам хийж байгаа үйлдэл болно. Тийм учраас суудалгүй намуудтайгаа бид нээлттэй хамтран ажиллах зарчмыг байнга баримтална" гэлээ.
0
0
0
0
0
0
0
0
