Н.Номтойбаяр: Ц.Даваасүрэн төсвийн байнгын xорооны дарга xэвээр байвал өөрчлөлт гараxгүй
Үндсэн хуулийн нэмэлт, өөрчлөлтийн төслийг өчигдөр Засгийн газраас УИХ-д өргөн барилаа. Ингэснээр ирэх сонгуулийг холимог тогтолцоогоор явуулж, УИХ-ын гишүүдийн тоог хоёр дахин нэмэгдүүлж магадгүй болоод байна. Одоо өргөн барьсан төслөөр УИХ-ын гишүүдийн тоо 152 болохоор байна. Гэхдээ хэлэлцүүлгийн явцад гишүүдийн тоог үүнээс бууруулахаар ҮАБЗ-ийн гишүүд тохирсон гэх мэдээлэл ч гарч байна. УИХ-ын дарга Г.Занданшатар өнгөрсөн долоо хоногт улстөрийн намуудын төлөөлөлтэй уулзахдаа 2019 оны Үндсэн хуулийн нэмэлт, өөрчлөлтийг үргэлжлүүлэх боломжтой. УИХ-ын гишүүнийг 5 жилээр сонгох, 99 гишүүнтэй болох хувилбар оновчтой хэмээн мэдэгдсэн юм. Зургаадугаар сарын сүүл гэхэд хуулиудаа цэгцэлж дуусах шаардлагатай тул ийнхүү УИХ Үндсэн хуулийн нэмэлт, өөрчлөлтийн төслийг өргөн барьсан даруйд нь хэлэлцэж эхэллээ.
Өчигдөр ЗГХЭГ-ын дарга Д.Амарбаясгалан хэвлэлийнхэнд мэдээлэл өгөхдөө “1991-1992 онд Монгол Улсын Үндсэн хуулийг хэлэлцэж батлах үед Улсын Их Хурлын гишүүдийн тоог тухайн үеийн нийт хүн амын тоонд үндэслэн нэг гишүүн дунджаар 27 мянган иргэнийг төлөөлөхөөр тооцоолж, 76 гишүүнтэй байхаар хуульчилсан. Харин өнөөдөр нэг гишүүн дунджаар 44.7 мянган иргэнийг төлөөлөх болсон байна. Ингэснээр нэг гишүүний төлөөлөх иргэдийн тоо бараг хоёр дахин нэмэгдэж, парламентын төлөөлөх чадамжийг бууруулж байна. Цөөн гишүүнтэй парламентуудын хувьд хууль тогтоомж цөөн гишүүний саналаар батлагдах, нэг гишүүнд эрх мэдэл төвлөрөх, зүй бус нөлөөлөл орох, хуулийн биелэлтэд тавих хяналт сулрах зэрэг эрсдэл үүсдэг. Олон улсад парламент нь дунджаар 150-аас доошгүй гишүүнтэй байдаг нь хууль тогтоох болон гүйцэтгэх эрх мэдлийн хуваарилалт, хяналт-тэнцлийг хангахад үр нөлөөтэй байна. Тиймээс иргэдийг төлөөлөх парламентын чадамжийг сайжруулах зорилгоор Улсын Их Хурлын гишүүдийн тоог 152 болгон хүн амын тоотой уялдуулан нэмэгдүүлэхээр төсөлд тусгалаа.
Мажоритар сонгуулийн тогтолцоог дангаар хэрэглэх нь иргэдийн санал гээгдэх, тойргийн ашиг сонирхол улс орны эрх ашгаас өндөрт тавигдах, олон нийтэд танигдсан, хөрөнгө санхүүгийн боломжтой хүмүүст давуу байдал үүсгэх зэрэг сөрөг талыг бий болгож ирсэн. Пропорциональ аргыг сонгуулийн тогтолцоонд хэрэглэх нь сонгогчдын санал бага гээгдэх, нийгмийн бүлгүүдийн төлөөлөл жигд орох, бодлогын намыг төлөвшүүлэх зэрэг давуу талтай. Иймд мажоритар болон пропорциональ аргын давуу талуудыг тусгасан сонгуулийн тогтолцоотой болох, Улсын Их Хурлын нийт гишүүний тавин хувийг мажоритар, тавин хувийг пропорциональ аргаар сонгох зохицуулалтыг оруулсан.
Монгол Улсын Үндсэн хуульд оруулах өөрчлөлтийн төсөл батлагдсанаар ард түмнийг төлөөлөх парламентын чадавхыг сайжруулах, хууль тогтоомжийн биелэлтэд тавих хяналтыг чанаржуулах замаар Монгол Улсын тусгаар тогтнол, үндэсний аюулгүй байдлын баталгаа болсон парламентын засаглалыг төгөлдөржүүлнэ. Монгол Улсын Үндсэн хуульд сонгуулийн тогтолцоог тодорхой зааж баталгаажуулснаар Монгол Улсын Их Хурлын сонгуулийн тогтолцоо тогтвортой байх, намууд сонгуульд шударгаар өрсөлдөх, иргэдэд ойлгомжтой байх, гадаадад байгаа иргэний сонгох эрхийг баталгаажуулах ач холбогдолтой гэж үзэж байна” гэсэн юм.
0
0
0
0
0
0
0
0
