Ч.Хантүмэн: Данс хаачихлаа, дарга нарыг мууллаа гээд ингэв үү
Шаргуу хичээж, хөдөлмөрлөж чадвал аутизмтай хүн хэнээс ч дутахгүй амьдарч, амжилтад хүрч чадахыг үлгэрлэж яваа түүнийг Батбаярын Ерөөлт гэдэг. Олон, олон хүнд итгэл найдвар бэлэглэн, үлгэрлэж буй тэрбээр тэрбээр төгөлдөр хуурын анхны бие даасан тоглолтоо хийлээ. Хоёр настайгаасаа хойш төгөлдөр хуур тоглож буй Б.Ерөөлт 13 жилийн хугацаанд сурсан, мэдсэнээ үзэгч олонд тайлагнасан нь энэ. Төгөлдөр хуурыг тун ч донжтой, мэдрэмжтэй тоглодог түүнийг дэлхийн хэмжээний төгөлдөр хуурч болох ирээдүйтэй гэж үзэгч олон үнэлж байлаа. Тоглолтын өмнө түүнтэй ярилцлаа.
Б.Ерөөлт “Нэлээд догдолж, сандарч байна. Анхны бие даасан тоглолтоо хийхэд их доголдог юм байна. Тоглолт эхлэхээр гайгүй болчих байх аа.
Төгөлдөр хуур их гоё хөгжим. Дуугаралт нь ч гоё эгшиглэдэг. Маш сонсголонтой. Тийм учраас би төгөлдөр хуур хөгжимд татагдсан, тоглохоор шийдсэн.
Мэдээж анхандаа амархан, амархан ая суралгүй яах вэ. Амархнаас нь эхэлнэ. “Mary had a little lamb”, “Маамуу нааш ир” гэх мэт энгийн дуунуудыг тоглож сурсан. Одоо тоглож сурсан аяынхаа тоог алдсан. Зөндөө, зөндөө. За, 100 руу бараг дөхнө.
Чөлөөт зохиолуудаас гэвэл, “Queen”-ы “Bohemian Rhapsody”, “Камертон”-ы “18 нас”, “Харанга”-ын “Үзэсгэлэнт минь”-ийг тоглох дуртай.
Сонгодог зохиолоос гэвэл, Шопен, Листийг онцолъё. Учир нь Шопен, Лист хоёрын динамик нь үнэхээр нарийн, их сонирхолтой. Гэнэт чанга болоод, тэгснээ огцом сул болоод. Ньюанс нь аягүй нарийн. Тэр ньюанс нь надад үнэхээр таалагддаг.
Төгөлдөр хуур тоглохдоо хүн аз жаргалтай болдог. Нисэж буй мэт санагддаг. Хамгийн гоё мэдрэмж мэдээж энэ. Аялгуу, эгшигэнд нь уусаад, гоё таашаал, кайф авдаг. Үнэхээр их эрч хүч авдаг,хэнээс ч дутахгүй гэсэн итгэл надад төрдөг.
Хүн тэмцээнд оролцох тусам улам туршлагаждаг юм байна лээ. Төгөлдөр хуурын оролцсон уралдаан нэлээд байна аа. 2015, 2016, 2017 онд дөрвөн сургуулийн дунд болсон “Хамтдаа инээмсэглэе” наадамд оролцсон. Тус наадмаас 2015, 2016 онд алт, 2017 онд мөнгөн медаль авсан.
2016, 2017, 2018 онд хийлч Дээгийгийн хөгжмийн сургуулийн нэрэмжит тэмцээнд оролцсон. Бараг улсын уралдаан гэж ойлгож болно. 2018 онд байр эзэлж, хүрэл медаль авсан. 2018 онд “Forte and piano” гэдэг нэртэй улсын уралдаанд оролцон, насныхаа ангилалд түрүүлсэн. 2022 онд Хөгжим бүжиг дээр, энэ зааланд болсон Бахын тэмцээнд насныхаа ангиалалд түрүүлж, алтан медаль хүртсэн.
Би “Аяыг таа” нэвтрүүлэгт 2017 онд, Хүүхдийн баярын тусгай дугаарт оролцсон. Олон камерын өмнө оролцохоор жаахан эвгүй санагддаг, сандардаг юм байна лээ. Зурагтаар тааж байснаас өөр мэдрэмж төрсөн. “Аяыг таа”-д амжилттай оролцсон, дуунуудыг хурдан таахад хөгжмийн сонсгол нөлөөлөлгүй яах вэ. Нэвтрүүлэгт оролцсоны дараа гоё байлгүй яах вэ. Хүмүүс “Чи нөгөө зурагтаар гарсан хүүхэд байна шүү дээ. Эхний нотыг нь сонсонгуутаа таасан супер хүүхэд” гэдэг байлаа.
Цаашдаа хөгжмөөрөө л явна гэж боддог. Учир нь төгөлдөр хуур тоглоод 13 жил болчихсон, бүхнийг нь тэгээс нь эхлүүлсэн юм чинь одоо зогсоохоор харамсалтай. Тиймээс би төгөлдөр хуураараа л явна гэж боддог. Ирээдүйд мундаг төгөлдөр хуурч болохыг хүсдэг. Том болоод мэргэжлийн олон улсын уралдаанд оркестрын дунд тоглоод оролцоно гэж боддог. Намайг ийм мундаг болгосон төгөлдөр хуурын П.Болормаа багшдаа маш их баярлалаа. Мөн ээж, аавдаа баярлалаа. Аав, ээж минь “Миний хүү битгий бууж өгөөрэй” гэж хэлдэг” гэлээ.
0
0
0
0
0
0
0
0
