В.Зоригт: Ажилтнууд чөлөөтэй байдлаас сэтгэл ханамж мэдэрдэг

Өрөг.мн сайтын сурвалжлах баг энэ удаа Хүнс группийн оффисыг онцоллоо. Чанартай, органик бүтээгдэхүүнүүдийг хэрэглэгчдэд хүргэж байгаа 33 жилийн түүхтэй Хүнс группийн алсын хараа, зорилго юунд чиглэж байгаа талаар бид ярилцсан юм.

Энэ талаар Хүнс группийн, Борлуулалтын газрын захирал В.Зоригт ярихдаа,

“Бид элдэв химийн нэмэлт бодисгүй хүнс үйлдвэрлэхийг хичээдэг. Хамгийн чухал байгууллагын соёлыг бий болгодог зүйл бол ажилтан буюу хүн. Сайн тоног төхөөрөмж, үйлдвэртэй байлаа гээд түүнийг удирдаж зохион байгуулах, гүйцэтгэх нь ажилтнууд байдаг учраас, бид ажилтныхаа хөгжлийг илүү анхаардаг. Сүүлийн үед Монгол-Япон төвтэй хамтраад, удирдлагын түвшинд суралцаад төгссөн. Харин одоо дунд түвшний менежерүүдээ тухайн сургалтад хамруулаад, хөгжүүлэх тал дээр анхаарч байгаа. Мөн бүтээгдэхүүнийг чанартай үйлдвэрлэхийн тулд аль болох  хүний оролцоог багасгаж, автоматжуулах тал дээр илүү төвлөрч байна. Бид ISO 9001, ISO 22000 стандартыг 2016 оноос хойш нэвтрүүлсэн.

Манай оффисын тухайд задгай зохион байгуулалттай. Нийт 30-40 хүн энд ажилладаг. Цайны хэсгээ маш тухтай байлгахыг зорьсон. Энд чөлөөт цагаа өнгөрөөж болно. Ажилтнууд маань, гаднаас хооллох биш өөрсдөө хийгээд иддэг. Залуус сүүлийн үед илүү чөлөөтэй ажлын байр хүсдэг болоод байгаа шүү дээ. Тийм ч учраас амрах, унтах, тухтай байх орон зайг  төлөвлөж өгсөн. Бид баасан гаргийн орой “enjoy” байлгах үүднээс, энэ буландаа багахан пиво уулгаж, чөлөөтэй байх нөхцөлийг бүрдүүлдэг. Бухимдлаа гаргах, чанга ярих булан ч бий. Компани бол ажиллаж байгаа ажилтнуудаа тодорхой хэмжээнд нийгэмшүүлж, үр дүн үзүүлж, хүмүүжүүлдэг боловсролын байгууллага гэж би хардаг. Ажилтнууд ихэвчлэн хийж бүтээснийхээ үр шимийг хүртэхэд л илүү урам зориг авна.

Бид алсын хараагаа, Хүн бүрийн итгэлтэй сонголт, аз жаргалтай дурсамж бүрийн нэг хэсэг нь байна гэж тодорхойлсон. Энэ нь энгийн үг юм шиг мөртөө, үг утга бүрийг нь сонсохоор, маш их хариуцлага бий. Нэмээд хэрэглэгчдийн чанартай, итгэлтэй сонголт байхын тулд бүх үйл ажиллагаа нь өндөр түвшинд байх ёстой. Үүнийг хангаж ажиллахын тулд бид нэгж хэсэг болгон дээрээ хөрөнгө оруулж, жил ирэх тусам сайжруулахыг хичээж байна. Манай бүтээгдэхүүн, үйлчилгээг хэрэглээрэй. Бид итгэл алдахгүйн төлөө хичээх болно” гэлээ.