Ч.Хантүмэн: Данс хаачихлаа, дарга нарыг мууллаа гээд ингэв үү
Take Off хамтлаг Цасан дээр дуу хэрхэн бүтсэн тухайгаа ярилаа. Хамгийн сонирхолтой нь уг дууг цацаж байх үед Цасан аялгуу, Шинэ жилийн цагаан шөнө, Guys-ийн Цас зэрэг маш олон цасны тухай дуу гарсан байна. Харин тэдний хийсэн Цасан дээр дуу нь эдгээр дуунуудтай өрсөлдөж олон долоо хоног хит болсон ажээ. Бичлэгийг нь энд дарж үзнэ үү.
Хамтлагийн гишүүн Э.Бат-Эрдэнэ: Цасан дээр нь манай хамтлагийн хийсэн гурав дахь дуу. Анхны хийсэн дуу нь Зүүдний минь шөнө. UB Palace-ийн дэргэдэх Take Off хамтлаг гэж нэртэй байлаа. Одоогоор бол Laserland-ийн хойд талын өрөөнд бид дөрөв чинь нэг нэгнийгээ бүртгэдэг, өглөөнөөс үдэш хүртэл хамт суудаг, хүсэл мөрөөдлөөрөө нэгдсэн залуучууд байлаа.
Хоёр дахь дуугаа хийчихээд гурав дахь дуугаар Цасан дээр нэртэй энэ дууг дуулахаар болсон. Тухайн үед их гайхсан. Монгол Улсын урлагийн гавьяат зүтгэлтэн Б.Бат-Эрдэнэ ахаасаа энэ дууг авчихаад шуудхан хэлэхэд ямар ч дуу дуулах гээд байна даа гэсэн бодолтой байсан.
Тэгээд энэ дууг цацаад арав орчим хоносны дараа Монголын бүх Chart-ыг тэргүүлж эхэлсэн. Бид дөрөв үнэхээр шоконд орсон. Их гоё мэдрэмж байсан.
Хамтлагийн гишүүн Б.Нарангэрэл: Хамтлагаараа хоёрхон дуу дуулчихаад байсан. Гурав дахь дуу маань хит болж төсөөлөөгүй амжилт үзүүлсэн. Эхэндээ гадуур явж байхад ганц, нэг сонсогдож байсан бол сүүлдээ таксинд суусан ч, дэлгүүр орсон ч сонсох болсон. Тухайн үед хөгжмийн нэвтрүүлгээр яг ижилхэн шинэ жилийн сайн дуунууд гарсан. Харин нэг сэтгүүлч Сараа эгчээс яг одоо аманд тань аялагдаж байгаа дууг дуулаач гэхэд манай хамтлагийн Цасан дээр дууг дуулсан. Бид нар том шоконд орсон. Манай хамтлагт найдвар төрүүлсэн урам зориг нэмсэн гол уран бүтээл болсон.
Хамтлагийн ахлагч Э.Сүхжаргал: Тухайн үед чадалтай дуунууд гарч байсан. Ариунаа эгчийн Цасан аялгуу, Сараагийн Шинэ жилийн цагаан шөнө, Guys-ийн Цас зэрэг маш олон цасны тухай дуу гарсан. Бидний хийсэн Цасан дээр дуу нь эдгээр дуунуудтай өрсөлдөж олон долоо хоног хит болсон.
Хамтлагийн гишүүн Э.Бат-Эрдэнэ :Хамтлагуудын нэрийн хуудас байдаг. Камертоны 18 нас, Номин талст хамтлагийн Бид гэдэг ч юм уу, бидний нэрийн хуудас бол яах аргагүй Цасан дээр дуу юм. Одоо бодоод байхад тухайн үед шинэлэг юм хийчихсэн юм шиг байгаа юм. Анх бол өөрсдөө ийм дуу хийж болох юм уу гэж бодож байсан.
Хамтлагийн гишүүн Б.Нарангэрэл: Энэ дууны тухай сонирхолтой баримт ярихад, найзтайгаа хоол идэхээр нэг газар орсон чинь явж байсан. Гэтэл Цасан дээр дуу дуусаад ахиад эхнээсээ эхэлсэн. Энэ байдал нэлээн олон удаа давтагдсан. Тэгээд албаар миний дуулсан дууг дахиж тавиад байгаа юм байх гэж бодсон чинь тэр газрын бармен охин дууг маань кассетаа дүүртэл бичсэн байсан.
Хамтлагийн ахлагч Э.Сүхжаргал: Хамтлагууд логогоо янз бүрийн хэлбэрээр гаргадаг. Бидний хувьд Take Off нэрээ албан ёсоор биежүүлж тавуулаа зүүлт болгон хийлгэсэн. Зүүлтдээ сэтгэл хангалуун байгаа. Энэ зүүлт нь хамтлагийн 20 жилийн ойд зориулан хийгдэж байгаа олон зүйлийн нэг. Хамтлагийн ой албан ёсоор гуравдугаар сард болно. Тун удахгүй шинэ уран бүтээлээрээ та бүхэнтэйгээ уулзах болно. Ойдоо зориулан бэлдэж байгаа маш олон зүйл бий. Та бүхэн хүлээж байгаарай. Шинэ ондоо шинэ уран бүтээлээр уулзацгаая. Хамтлагаараа мэндчилгээ дэвшүүлье.
Хамтлагийн гишүүн Д.Баясгалан: 2023 он маш сайхан жил байна. Хамтлаг маань эргээд таван хүний бүрэлдэхүүнтэй боллоо. Энэ бол бидний хувьд маш том үйл явдал байлаа.
20 жилийн ойд зориулаад таван гишүүн соло альбом, цомог гаргаж байна. Сүхээ ойдоо зориулаад цомог гаргана. Хамтлагийн гишүүдийн кино уран бүтээл, шинэ дуу, цомгууд ар араасаа гарна. Та бүхэн шинэ оноо аз жаргалаар дүүрэн угтаарай. 2024 онд бүгдээрээ эрүүл энх, аз жаргалтай байж уран бүтээлээр дахин уулзъя.
Хамтлагийн гишүүн Э.Бат-Эрдэнэ: 2024 онд уран бүтээлийн олз омог дүүрэн байна гэж найдъя. Мөн урлагийн гэр бүл Take Off хамтлаг маань олз омог ихтэй байна гэж итгэе. Гэр бүлээрээ элбэг хангалуун сайхан жил байгаасай гэж хүсэж байна.
0
0
0
0
0
0
0
0
