Үс шинээр үргээлгэх буюу засуулбал нас уртадна
Улсын их баяр наадмын амралтын 4-5 өдөрт зам тээврийн ослоос үүдэж 15 хүн амь насаа алдсан байна. Хурд хэтрүүлэхгүй явах, бүсээ зүүх, гэрлээ шилжүүлэх гэх мэтчилэн замын хөдөлгөөний дүрмээ биелүүлээгүй, тоомжиргүй хандсанаас үүдэж хайртай дотны хүнээ алдсан, бие эрхтэн, сэтгэл санаа, эдийн засгаараа хохирсон иргэдтэй бид ярилцаж, дараах сэрэмжлүүлгийг хүргэе.
“ЭЭЖ ЭЭ БИ АМЬДАРНА БИЗ ДЭЭ” ГЭЭД УЙЛЖ БАЙГАА ОХИНОО БОДОЖ Л ӨНӨӨДӨР БИ АМЬД СУУЖ БАЙГАА БАЙХ
Иргэн Б:
Бид Увс аймгийн Хэцүү хадыг зориод найзуудтайгаа хоёр машинтай явж байсан. Завхан аймгийн Сонгино сумын нутаг дэвсгэр дээр нэг хайрхны өөдөө даваа байдаг юм байна.Урд талын машины улаан гэрэл дөнгөж харагдахаа болингуут цагаан гэрэл гялс гээд л ороод ирсэн. Газар дээрээ хоёр амьд хүнээ алдсан. Нэг гэрийн дөрвөн хүн сэхээнд амьсгалын аппараттай, 2-3 удаа дараалан хагалгаанд ороод биеийн байдал маш хүнд байна. Бид өөрсдөө сайхан аялаад, хүүхдүүддээ дурсамж бүтээгээд ирье гэж бодсон ч ийм зүйл болно гэж огт бодоогүй.
Өөд болсон хоёр хүн бол миний арван жилийн хамгийн хайртай найз, мөн түүний хүүхэд. Би хоёр хүнээ шороонд булаад хаячихсан. Дахиад гурав нь сэхээнд хүнд байдалтай байна. Уйлаад амь гуйж байгаа миний охин… “Ээж ээ би амьдарна биз дээ” гээд уйлж байгаа охиноо бодож л өнөөдөр би амьд сууж байгаа байх.
Найздаа уг нь гоё юм үзүүлээд ирье гэж бодсон юм сан…Орон нутаг руу ерөөсөө аялалд явж үзээгүй гэхээр нь гоё юм үзүүлээд, гоё аваад ирье гэсэн боловч ар гэрт нь цогцсыг нь л өгсөн. Тэр бол төсөөлшгүй аймшигтай зүйл. Энэ яг зүүд байх аа. Би яг маргааш сэрэнгүүт байж байх байх аа. Энэ явдал болоогүй байх аа. Яг л унтаад босчихвол, өглөө болоход энэ явдал байхгүй болчих байх аа гэдэг зүйлийг би найм хоног бодож байна. Энэ зүүднээс би сэрэхгүй байна. Энэ тэгэхээр амьдрал юм шиг байна.
Тийм учраас хүн хүнийхээ амь насыг хайрлаад, нойр нь хүрэх юм бол замаасаа гараад сэрүүлэг тавиад 30 минут унтчих л даа. Хурдны хязгаарыг битгий дав л даа. Эрдэнэт хүний амь насыг хариуцаж явж байгаа учраас хариуцлагатай байж өгөөч ээ. Аажуу явбал хүрнэ шүү дээ. Юунд яарна вэ. Яагаад сүлэлдэж, цухалдаад байна вэ. Аймшигтай эвдрэлтэй зам дээр дээгүүр доогуур яваад л. Замын хажууд маш их осол болж байна. Өөрөөсөө шалтгаалахгүй ч гэсэн надаас муу жолооч байгаа гэсэн бодолтой явж байгаач ээ гэв.
НЭГ ГЭРТ ХОЁР ЦЭЦЭГ ШИГ ХҮҮХДЭЭ ӨСГӨЖ ТОРНИУЛЧХААД, НУРУУ НЬ ХУГАРХАЙ БОЛГОЧИХЛОО. ЯМАР ИРЭЭДҮЙ ХҮЛЭЭЖ БАЙГАА БОЛ ГЭХЭЭС ЭМТЭРЧ БАЙНА
Иргэн А: Биеийн байдал хүнд байна. Нэг гэрийн дөрвөн хүн дөрвөн газарт байгаа. Хоёр хүний нуруу, нэг хүний дунд чөмөг хугаралтай. Миний дөрвөн хавирга хугарч, хөл бүтэн түлэгдсэн. Бид аялж явсан юм. Хурд хэтрүүлсэн зүйл байхгүй гэдэг нь цагдаагаар шалгагдаад, машинаа 100 мянган төгрөг өгөөд ачуулсан байгаа. Орон нутагт аялах боломжийг нь иргэдэд олгож өгөхгүй бол гэр бүлүүд сүйрэх юм байна. Харамсалтай байна. Бид зам дээр нүх байна гэдгийг харсан. Нүхээ тойроод гарах гэхээр араас олон цуваа машин явж байсан. Гүйцэт түрүүлж орж ирээд осол гаргачих байх гээд…
Тэр нүхийг бөглөчихсөн бол асуудал ингэж үүсэхгүй шүү дээ. Хүний төлөө бид ажиллаж амьдардаг баймаар байна. Хаа яваа газраа ажил үүргээ гүйцэтгэж байгаа хүмүүс, хүн зорчино, хүний эрүүл мэнд эрсдэхгүй байна гэдэг зүйлийг бодмоор байна. Хүн мөргөөгүй, өөрсдөө амьд байгаадаа л бид баярлаж байгаа. Харин цаашдаа… Нэг гэрт хоёр цэцэг шиг хүүхдээ өсгөж торниулчхаад, нуруу нь хугархай болгочихлоо. Ямар ирээдүй хүлээж байгаа бол… Эх хүний хувьд хэцүү байна.
ХҮҮ МИНЬ ХИЙЖ БҮТЭЭХ НАСАНДАА УХААНГҮЙ БАЙНА ГЭДЭГ АЙМШИГТАЙ ХҮНД АСУУДАЛ
Иргэн Т: Миний хүү ажлаа тараад, явган хүний гарцаар гарч явж байгаад жолоочийн буруутай үйлдлээс болж осолд ороод, одоо ухаангүй байна. Техник бол тоглоом биш. Хүний алтан амь эрсдэх, тэр хүний ард гэр бүл үр хүүхэд байгаа. Амиа алдсан хүмүүсийн ар гэрт сэтгэлийн асар их дарамт байна. Тэр айл гэрийг сүйрлийн эрмэгт авчирч байна гэж л бодож байна. Авто тээврийн тухай хуулийг чангатгаж өгөх хэрэгтэй. Энэ чинь хүний алтан амь, амьдралтай холбоотой асуудал. Үүн дээр хатуу хяналт тавиад, хатуу хууль гаргаж, түүнийгээ мөрдүүлдэг байх хэрэгтэй байна. Өөрийнхөө гэр бүл болон бусдын гэр бүлийг хайрлаасай гэж би маш их хүсэж байна. Хүү минь осолд орсон байгаа учраас би үнэхээр харамсаж байна. Сэтгэл өвдөж байна. Залуу хүний хувьд хийж бүтээх насандаа ухаангүй байна гэдэг гамшиг. Би үүнд маш их гомдолтой байгаа.
0
0
0
0
0
0
0
0
