Жил бүр халуун ус тасалж, засвар хийдэг гэх шүүмжлэл иргэдийн дунд гардаг. Тэгвэл Улаанбаатар хотын төв МУБИС, Бага тойруу орчмын айлууд энэ зун дээрх асуудлаас салах нь ээ. Учир нь, Дэлхийн банкны хөнгөлөлттэй санхүүжилттэй төслийн хүрээнд дулааны шугамыг бетонон хоолой, сувагчлалтай болгож байна.
Ингэснээр, дахин дахин нүх ухаж, засвар хийдэг, иргэдийг бухимдуулдаг асуудал арилна гэж мэдээллээ. Багшийн дээдийн баруун талын уулзвар, мөн Урлан бүтээх төвийн зам дагуу хэсгийн засварыг наадмын амралтын өдрүүдээр хийхээр хийхээр төлөвлөж байна. Энэ онд Нийслэлийн 9 хорооны хэмжээнд нийт 4,8 км дулааны шугамыг бетонон хоолойтой болгож шинэчлэх гэж байна.
Энэ талаар Улаанбаатар дулааны сүлжээ ТӨХК-ийн төслийн нэгжийн ахлагч Д.Баяртогтох хэлэхдээ “ Улаанбаатар хотын ашиглалтын хугацаа дууссан, 30 гаруй жил болсон шугам сүлжээг шинэчлэх солих ажил явагдаж байна. Энэ ажлын нэг хэсэг нь 4А,Б магистралын 300 мм хос диаметртай шугам сүлжээг 500 болгон өргөтгөж байгаа энэ ажил юм. Ингэснээр шугам сүлжээний найдвартай ажиллагаа хангагдана. Өвлийн хүйтэн үед гэмтэл гардаг асуудал байхгүй болно. Дээрээс нь,бага тойруу орчмын хэрэглэгчдийн дулааныг жил болгон тасалдаг, иргэдийн шүүмжлэл дагуулдаг асуудал шийдэгдэнэ. Гуравдугаарт, 300-гийн шугамыг 500 болгож өргөтгөж байгаа учраас дулаан хангамж сайжирна” гэлээ. Харин ажлын гүйцэтгэлийг хариуцаж байгаа “Есөнталст оргил” компанийн талбайн инженер Б.Бат-Отгон “Бид наадмын өдрүүдэр буюу 10-17-нд гол ажлуудаа хийнэ. 3-4 ээлжийн хуваарилалттайгаар ажиллана. Одоогоор засварын материалаа татаж аваад байна” гэсэн юм.
Мөн Дэлхийн банкны төслийн мэргэжилтэн Б.Азжаргал “Засгийн газар Дэлхийн банкны хөгжлийн агентлагтай хөнгөлөлттэй зээлийн гэрээ байгуулсан. Санхүүжилтээр 5 жилийн хугацаанд дулааны магистраль шугамуудыг өргөтгөн шинэчлэн ажлыг хийнэ. 2023 онд 6 дүүргийн 9 хороонд 6 магистраль шугам өргөтгөн шинэчлэх ажил хийгдэж байгаа. Одоогоор ажлын явц 7 хувьтай байна. 8 сарын 1-нээс 5-ны хооронд дулааны шугамыг залгах төлөвлөгөөтэй ажиллаж байна. Цаг уур, бороо хураас шалтгаалаад, зарим ажил нь хойшлогдох эрсдэлтэй байгаа хэдий ч баяр наадмын өдрүүдээр тасралтгүй ажиллаж, хугацаанд нь ашиглалтад оруулахаар зорьж байна” гэлээ.
Видеог дээрээс үзнэ үү.