Голомт банк 2024 оны “Онцлох ТоС Банк”-аар шалгарлаа
Бид энэ удаа “Авьяаслаг монголчууд” шоунаас төрөн гарсан залуу уран бүтээлч О.Энх-Эрдэнэтэй ярилцлаа. Дуулах урлагт ямар ч шалтгаангүй хайртай гэж хэлэх түүний хувьд багаасаа алдарт дуучин Франк Синатраг шүтэн биширч, Эх орныхоо нэрийг дэлхийд гаргасан алдартай дуучин болохыг хүсдэг тухайгаа ярьсан юм. Мөн тэрбээр тун удахгүй дуучин Б.Алтанжаргал, Ч.Бадамханд, The Baatar нартай хамтран “Учиртай дөрөв” тоглолтоо үзэгчдэд толилуулах гэж байна.
“Сүүлийн үеийн уран бүтээл гэх юм бол “Амьдрал баян” гээд цомог гаргасан. Монгол кантри цомог гэсэн үг л дээ. Анх 2016 онд "Авьяаслаг монголчууд" шоу тэмцээнд орсон. Түүнээс хойш 2018 онд Америкт нэг томоохон тэмцээнд оролцсон юм. Энэ хугацаанд дуугаа огт орхиогүй. Хүнээс чи яагаад ээж аавдаа хайртай юм гэхэд шалтгаангүй байдаг шиг яагаад ч юм би дуунд дуртай. Дуртай зүйлээ л хийж байгаа. Миний бодлоор хүн дуртай зүйлээ хамгийн сайн хийдэг гэж би бодог. Тиймээс залуус маань тренд болж байгаа гэдэг ч юм уу, хүнд илүү сайхан харагдах гэхээс илүү өөрийнхөө дуртай зүйлийг хийх юм бол илүү их амжилт хүлээж байгаа гэж боддог.
Миний анх дуунд дурласан шалтгаан гэвэл алдарт дуучин Франк Синатра байсан. Миний мөрөөдөл Франк Синатра шиг, магадгүй Майкл Жексон шиг том од болохыг хүсдэг. Нөгөө талаас том амжилтад хүрэх, улс эх орныхоо нэрийг дэлхийд гаргах нь миний алсын том зорилго.
Заримдаа надад санагддаг юм. Урлагийн хүний гаргаж байгаа зүтгэл нь ил биш болохоор хүмүүс жаахан андуурдаг байх. Магадгүй эцэг эхээс сайхан хоолой заяасан болохоор энэ залуу амархан дуулаад байна гэдэг ч юм уу. Яг үнэндээ түүнийг амархан болгож харагдуулахын тулд маш их хөдөлмөрлөдөг. Би анх дуулж сурснаасаа хойш өдөрт 200-300 удаа дуулдаг байсан. Түүнээсээ сэтгэлийн таашаал гээд бүх гоё сайхан зүйлийг мэдэрсэн. Ямар ч байсан одоо явж байгаа энэ замналдаа огт эргэлзэж байгаагүй.
Би уран бүтээлч ах эгч нартайгаа нэгдэн долоодугаар сарын 4-нд Corporate-д “Учиртай дөрөв” тоглолтоо үзэгчдэд толилуулах гэж байгаа. Тоглоотын маань онцлог нь олон сайхан ардын дуунуудыг шинэчилсэн найруулгаар амьд хөгжим, орчин цагийн хөгжимтэй холбоно. Маш сайхан тоглолт болно гэдэгт итгэлтэй байна. Амьд хөгжим гэдэг нь өөрөө их гоё амьд мэдрэмж байдаг. Тийм болохоор ямар ч байсан үзэгчид үзсэндээ харамсахгүй сайхан тоглолт болно гэдэгт итгэлтэй байгаа” гэв.
0
0
0
0
0
0
0
0
