Голомт банк 2024 оны “Онцлох ТоС Банк”-аар шалгарлаа
Монгол Улсын парламентат ёс, хууль тогтоох үйл ажиллагааны өв, түүх, эдгээртэй холбоотой судалгаа, боловсуулалт, хөгжүүлэлт, төрт ёсны зарчим, дэг журам, үүнийг сахиулах, хадгалах, бэхжүүлэхтэй холбогдох шийдвэр, тогтоомж, бичиг баримт, ном бүтээлийн сан хөмрөгийг УИХ-ын Тамгын газар эрхлэн, бүрдүүлж ажилладаг.
Зөвхөн хууль тогтоох үйл ажиллагаа, хэлэлцэн буй асуудал, түүнд холбогдох бүхий л сэдэв, агуулгаар шаардлагатай судалгаа, өгөгдөл мэдээлэл, лавлагаа, олон улсын түвшний баримтлал, гадаад улсуудын туршлага, түүхэн сургамжтай холбоотой ном товхимлыг цуглуулж, хуулийн хэлэлцүүлгүүдээс үүсэж буй баримтын санг бүртгэн бүрдүүлээд зогсохгүй Монгол Улсын Ерөнхийлөгч, Засгийн газрын үйл ажиллагаатай холбоотой бичиг баримт, эмхэтгэл, бүтээлийг Парламентын номын сан хариуцан эрхэлж, төрийн байгууллагууд, олон нийтэд үйлчилж байна.
Дээрх үйл ажиллагаагаа олон улсын парламентын номын сангуудын жишгийн дагуу өргөжүүлэн хөгжүүлэх зорилгоор өнөөдөр УИХ-ын Ерөнхий нарийн бичгийн дарга Л.Өлзийсайхан, Үндэсний номын сангийн захирал Б.Ичинхорлоо нар хамтын ажиллагааны санамж бичигт гарын үсэг зурлаа. Санамж бичгин хүрээнд талууд цахим номын сангийн КОХА систем нэвтрүүлэх, сан хөмрөгийг хадгалах, хамгаалах, хамтран ашиглах, сэлбэн засах, сэргээн засварлах болон мэдээллийн сан, каталоги хөтлөх талаар харилцан мэргэжил, арга зүй, техникийн туслалцаа үзүүлэх, хүний нөөцийг чадавхжуулах, ур чадварыг дээшлүүлэх чиглэлээр хамтран ажиллах юм.
Санамж бичиг байгуулах үеэр УИХ-ын Ерөнхий нарийн бичгийн дарга Л.Өлзийсайхан Парламентын номын сангийн талаар танилцуулж, мэргэжлийн болон олон улсын стандарт, жишгийн дагуу Үндэсний номын сантай хамтран ажиллахаар болж буйд баяртай байгаагаа илэрхийлсэн юм. Тэрбээр УИХ-ын даргын ивээл дор болж буй 33 дахь Номын баярын өдөр хамтын ажиллагааны санамж бичигт гарын үсэг зурж байгаадаа бэлгэшээж буйгаа илэрхийлээд, УИХ-ын дарга Г.Занданшатарын санаачилж, зохиолч, яруу найрагч Р.Эмүжингийн туурвисан “Үндсэн үлгэр” номыг Үндэсний номын сангийн захирал, яруу найрагч, Соёлын гавъяат зүтгэлтэн Б.Ичинхорлоод гардуулав.
0
0
0
0
0
0
0
0
