Ч.Хантүмэн: Данс хаачихлаа, дарга нарыг мууллаа гээд ингэв үү
Хошин урлагийн “Эмоци” продакшн 10 жилийн ойгоо тохиолдуулан, “Хүлэгү пикчерс”, “Милл кино” компанитай хамтран “Баян боол” уран сайхны киног үзэгчдийн хүртээл болгоод байгаа билээ.
Оросын “Холоп” киноны албан ёсны эрхийг нь авч бүтээсэн “Баян боол”-ыг нээлтээ хийсэн эхний 14 хоногт 100.000 хүн үзсэн. Улмаар 2023 он гарснаас хойш хамгийн олон хүн үзсэн, өндөр ашиг олсон киногоор тодроод байгаа юм. “Баян боол” кино хэрхэн бүтсэн талаар “Милл" кино компанийн продюсер С.Эрдэнэчимэгтэй ярилцлаа.
Тэрбээр” ОХУ-ын “All media” компанийн бүтээл “Холоп” кино 2019 онд нээлтээ хийсэн. Энэ киноны эрхийг дэлхийн найман орон авсны нэг нь Монгол. Мэдээж нэлээд өндөр шалгуурыг давж, хангасны эцэст эрхийг нь авлаа.
Энэ төслийг Боловсрол телевизийн Box хариуцсан захирал, продюсер Энхжаргал анх санаачилсан. “Хүлэгү пикчерс”, “Милл кино” компани өмнө нь 3-4 төсөл дээр хамтарч, гар нийлэн ажиллаж байсан. Тэгээд хамтрахаар шийдлээ. Жүжигчдээ хэрхэн бүрдүүлэх вэ гэж ярилцаж байгаад “Эмоци” продакшнд санал тавьлаа. Тэд аягүй сайхан эергээр хүлээж авсан. Тэгээд гурван тал ямар ч эргэлт буцалтгүйгээр хамтарч, энэ төслийг амжилттай хэрэгжүүллээ.
“Баян боол” кино “Хүлэгү пикчерс”, “Милл кино” компани, “Эмоци” продакшны хамтын бүтээл. Гурван продюсертай. Би “Милл кино” компанийнхаа продюсер нь.
Энэ төслийг хэрэгжүүлье гэдэг санаа гарснаас хойш бүтэн жилийн хөдөлмөр шингэсэн. Сэлэнгэ аймгийн Хүдэр суманд байгалийн сайхныг сонгож, зураг авалтаа хийлээ. Эзэнгүй хээр талд бүхэл бүтэн хүрээ босгосон. Тэр хүрээг босгоход наад зах нь гэхэд 50-60 машин банз орлоо. Их л нүсэр ажил боллоо.
Бид “Баян боол” киноныхоо нээлтийг гуравдугаар сарын 3-нд хийсэн. Түүнээс хойш 14 хоногт, хагас сарын дотор 100.000 гаруй хүн үзсэн. Үзэгчид ямар сэтгэгдэлтэй байгаа бол гэж хамгийн түрүүнд бодогдлоо. Тэгээд театрт очиж тандахад үзэгчдийн сэтгэгдэл 100 хувь байсан. Үзсэн хүн бүхэн сэтгэл хангалуун байсанд баяртай байна. Үзсэн хүмүүс “Хоёрдугаар ангийг нь хийх үү” гэж их асууж байна лээ. Одоогоор тодорхой шийдсэн, ярилцсан юм алга. Тухайн үед нь л шийднэ, энэ талаар ярихад арай эрт байна.
Бид цар тахлаас хойш, “Гангстерууд”-аас хойш кино хийгээгүй байсан. Ковидын 2, 3 жил юмны үнэ их өссөн юм байна. “Баян боол” нэлээд өртөг өндөртэй боллоо. Ойролцоогоор хагас тэрбум төгрөг зарцуулсан.
Би уг нь киноноос тэс хөндлөн, багш мэргэжилтэй хүн. Манай хүнийг Мөнхбат гэдэг, Кино урлагийн дээд сургуулийн төгссөн. Найруулагч хүнтэй ханилаад, тэгээд л урлагийн хүн болсон доо.
Уран бүтээлүүдээсээ дурдвал, “Ээжийн дайсан”, “Микроны босс”, “Приусны босс”, “Шарталт”, “Ээж ээ надтай гэрлээч” гээд нэлээд олон бий. Сүүлд “Гангстерууд”-ыг бас “Хүлэгү”-тэй, Жижигээ, Цогтоо хоёртойгоо хамтраад хийсэн.
“Баян боол” хоёр цагийн кино. Маш олон ухаарал энэ кинонд бий. Эцэг, хүү хоёрын хамгийн нандин хэлхээ, аав хүний хайр бий. Хүний амьдралд байх хамгийн гэгээлэг зүйлүүд “Баян боол”-д байгаа. Мэдрэх боломжтой мэдрэхүйн хамгийн дээд мэдрэмжүүдийг хоёр цагийн хугацаанд авна гэдэгт итгэлтэй байна” гэлээ.
0
0
0
0
0
0
0
0
