ТЦА: Их тэнгэрт болсон ослын улмаас нэг хүн амиа алдсан
Рио тинто Монгол, Оюу толгой ХХК хамтран, геотехникийн салбарын оюутан, профессоруудад зориулан, компьютерийн иж бүрэн лаборатори байгуулж ШУТИС-д хүлээлгэн өглөө. Энэ нь гурван талт хамтын ажиллагааны гэрээний хүрээнд хэрэгжиж буй 2.42 сая ам.долларын санхүүжиттэй төслийн нэг хэсэг юм.
Энэ талаар ШУТИС-ийн Геологи, уул уурхайн сургуулийн захирал К.Хавалболот, "Бидний хэрэгжүүлж буй төслийн зорилго нь монголын уул уурхайн салбарт, геотехникийн мэргэжилтэнг олон улсын түвшинд бэлтгэх, олон улсад хүлээн зөвшөөрөгдсөн сургалт, судалгааны лаборатори байгуулахад оршиж байгаа. Төслийн хүрээнд компьютерт суурилсан 17 нэр төрлийн программ хангамж бүхий уул уурхайн геотехникийн сургалт, судалгааны лабораторийг байгууллаа. Энэ манай оюутан багш нарын хувь шат ахисан сайн үр дүнг бий болгох болно” гэв.
Харин Рио тинто Монгол ХХК-ийн гүйцэтгэх захирал Х.Амаржаргал дараах мэдээллийг өглөө.
Тэрбээр "Рио тинто Монгол компани боловсролын салбарт хөрөнгө оруулж, нийгмийн хариуцлагын хүрээнд олон ажил хийдэг. Үүний нэг хэсэг нь ШУТИС-тай хамтарч бий болгосон геотехникийн мэргэжилтэн бэлтгэх хөтөлбөр юм. Зөвхөн монголд төдийгүй дэлхийн уул уурхайн салбарт ажиллах боломжтой, чадварлаг мэргэжилтнүүд энэхүү хөтөлбөрөөс гарна гэдэгт бид итгэж байгаа гэсэн юм.
Түүнчлэн бид Оюу толгойн сургалтын хэлтсийн боловсролын төсөл хариуцсан мэргэжилтэн Б.Дашдоржоос доорх мэдээллийг авсан юм.
Тэрээр ярихдаа “Монголд геотехникийн мэргэжил бий болоод гурван жил болж байна. Анхны оюутнууд маань одоо гуравдугаар курс гэсэн үг. Энэ мэргэжлээр төгсөж байгаа оюутнууд маань ажлын талбарт гараад танихгүй программ биш, дадлага, тооцооллоо хийж байсан программ дээрээ ажиллах нь маш том давуу тал болно гэлээ.
Энэ үеэр Геотехникийн салбарын оюутнууд компьютерийн иж бүрэн лабораторитой болж байгаадаа талархаж буйгаа илэрхийлсэн юм.
ШУТИС-ийн геотехникийн ангийн гуравдугаар дамжааны оюутан А.Дөлгөөн:
Геотехник бол уурхайн амин сүнс гэж нэрлэгддэг мэргэжил. Тухайн уурхайн аюулгүй байдал, осол, эндэгдэл, гулсалт, нуралт үүсгэхгүй байх, тэнд явагдаж байгаа уулын ажлыг эрсдэлгүй явуулах чухал ач холбогдолтой мэргэжил юм. Энэ мэргэжил нь олон улсад ховордож байгаа. Гурван талт хамтын ажиллагааны үр дүнд төслийг амжилттай хэрэгжүүлж байгаад баяртай байна.
ШУТИС-ийн геотехникийн ангийн гуравдугаар дамжааны оюутан Б.Цэлмүүн:
Миний хувьд геотехникийн мэргэжлээр суралцаж байгаа анхны элсэгч. Энэ хөтөлбөр маань цааш үргэлжилж, уул уурхайн салбарын чадварлаг инженерүүдийг гаргаж ирээсэй гэж боддог. Төгсөгчид маань дотооддоо болон олон улсад ажиллаасай гэж хүсэж байна. Энэ боломжийг олгосон Рио тинто Монгол, Оюутолгой ХХК-ийн хамт олон, ШУТИС-ийн багш нартаа баярлалаа гэж хэлмээр байна.
0
0
0
0
0
0
0
0
