Манай улс НҮБ-ын Хүний эрхийн зөвлөлд дөрөв дэх тайлангаа хүргүүлнэ
“Тэнгисийн өвөө” нэрээр залуус, хүүхдүүдийн хүндэтгэл, хайрыг хүртэж, таталбар зургийн төрлөөр хүн зурдаг түүнийг Д.Сүхбаатар гэдэг. Тэрбээр өдгөө 72 насыг зооглоод буй юм. Нөхөрсөг шог зураач, зэвсэгт хүчний офицер, боксын спортын мастер Д.Сүхбаатар гуай, хүнийг гурван минутанд багтааж зурдаг. “Өдий насандаа хүнд үйлчилж, хөгширсөн гэж бодолгүй өөрийгөө хөгжүүлэн, залуу үеийнхээ урмын үгэнд тэтгэгдэн, залуужиж байна” гэж ярих тэр ямар нэгэн зургийн сургууль төгсөөгүй ч, хоббигоороо ажиллаж байгаадаа сэтгэл хангалуун байдаг тухайгаа ярьсан юм.
Тэрбээр ярихдаа, “Би уг нь цэргийн дарга хүн байгаа юм. Цэргийн сургууль төгссөн улсын ажилтан гэсэн үг. Хүн ухуулдаг, ярьдаг тийм л мэргэжилтэй. Миний хувьд тэтгэвэрт гарахаасаа өмнө зурж эхэлсэн. Би хүүхэд байхаасаа зураг зурах сонирхолтой, үүндээ их дуртай байсан юм. Яг хүн зурах ажлыг 1977 оноос эхэлсэн. Одоо би долоо дахь үзэсгэлэнгээ хийж байгаа. Хэзээ гаргахаа сайн мэдэхгүй л байна.
Цөөхөн зураасаар хүн зурна гэдэг их явдалтай, амар биш ажил. Оновчтой зураас гаргана гэдэг их чухал шүү. Нэг зураас алдахад л хүний дүрс гарахгүй шүү дээ. Би үзгэн бал, тосон балаар, баллуур хэрэглэхгүй зурдаг юм. 1991 оноос хойш харандаа хэрэглэхээ байсан.
Зуруулж байгаа хүмүүс надад итгэдэг нь тун сайхан. Зурсны дараа залуус дандаа талархлын үгээр мялаадаг. Өндөр нас зооглосон надад үүнээс өөр урам, аз жаргал өгөх юу байх билээ. Би хөдөлмөрийнхөө хөлсийг хүртээд сууж байгаа жирийн л нэг ахмад настан шүү дээ. Чихэнд чимэгтэй үг сонсоно гэдэг үгээр хэлэмгүй сайхан. Залуусын баяр бахдал, хайран дунд умбаж байгаа болохоор, би өтлөхгүй байх гэж боддог.
Миний хувьд Тэнгис кино театрт тав дахь жилдээ зурж байна. “Тэнгисийн өвөө” гээд далайчин шиг нэртэй болж авсан. Манайхны ярьдгаар ард түмний гавьяат гэдэг шиг “Тэнгисийн өвөө” гэж дуудуулах нь надад их таатай байдаг” гэлээ.
0
0
0
0
0
0
0
0
