Улсын xарцага Д.Одсүрэнгийн нэрэмжит барилдаан зоxион байгуулагдана
Жүдо бөхийн насанд хүрэгчдийн УАШТ-ий эмэгтэйчүүдийн 48 кг-д ОУХМ Бавуудоржийн Баасанхүү түрүүлж, улсын хошой аварга боллоо. Хөдөлмөрийн баатар М.Уранцэцэгийн үргэлжлэл болж, 48 кг-ын орон зайг нөхөж яваа түүнтэй ярилцлаа.
-Улсын аваргын бэлтгэлээ хэрхэн хийв. Хошой аварга болно гэдэгтээ хэр итгэлтэй байв?
-Улсын аваргад хоёр дахиа түрүүлсэндээ баяртай байна. Бэлтгэлээ үндэсний жүдо бөхийн шигшээ баг дээрээ бэлтгэлээ тасралтгүй хийж байгаа. Улсын аваргын бэлтгэлээ мөн шигшээ баг дээрээ хийгээд түрүүллээ.
-Хошой аварга болох мөчид юу бодогдож байв?
-Бэлтгэл, сургуулилалтаа тасралтгүй хийснийхээ үр шим юм болов уу гэж бодогдлоо.
-Аваргын төлөө Г.Наранцэцэгтэй барилдлаа. Өмнө нь хэдэн удаа учраа таараад байсан билээ?
-УАШТ-д бид хоёр дөрвөн удаа таарсан. Одоо ингээд ялалт, ялагдлын харьцаа 2:2 боллоо.
-Өмнө нь 2:1 байсан. Энэ удаа яаж ялахаар төлөвлөв?
-Бэлтгэл сургуулилалт дээр давтдаг мэхээ хийнэ гээд гарсан.
-Хэдэн оноос жүдогоор барилдаж байгаа билээ?
-2014 оноос хойш барилдаж байна. Анх 2015 онд өсвөрт барилдаж байсан. Үндэсний шигшээ баг дээр жил гаруй бэлтгэл хийж байна.
-Бусад спортоос жүдо юугаараа таны сонирхлыг татав?
-Найзуудтайгаа явж байгаад сонирхоод хичээллэсэн. Оноо авалца, мэх, техникүүд нь их сонирхолтой санагдаад тэгээд орсон доо, жүдод.
Анх бэлтгэлд явахад манай аав, ээж хоёр дургүй байсан. Тэмцээнээс медаль аваад, амжилт гаргаад эхлэсний дараа сайн дэмждэг болсон.
-Одоогоор ямар, ямар амжилт гаргаад байгаа вэ?
-Парис, Анталия, Тель Авив, Унгарын Их дуулгаас хоёр мөнгө, хоёр хүрэл медаль авсан. Бакугийн гран прид V байрт орсон.
-Жүдогийн спортын хамгийн үнэт зүйл нь юу вэ?
-Хүнийг хүмүүжүүлнэ, ёс суртахуунтай болгоно, хүндлэл гэж юу байдгийг мэдрүүлдэг сайхан спорт доо.
-Одоогоор дэлхийн шилдгүүдээс хэн, хэнийг ялаад байгаа вэ?
“Би энийг ялсан даа” гэж боддоггүй. Муу өрсөлдөгч гэж байхгүй. Тийм болохоор өрсөлдөгчөө бодохгүй, бэлтгэлээ сайн хийчихсэн бол чаддаг юмаа дэвжээн дээр гараад хийхэд л болно гэж боддог.
-Тэгэхээр дэвжээн дээр гарахдаа “Олимп, дэлхийн аваргатай таарчихлаа” гэж айж, бэргэдэггүй юм байна, тийм үү?
Тийм ээ. Би бэлтгэлээ чадах чинээгээрээ тултал нь хийсэн. Тэрнийхээ үр шимийг үзнэ, чаддаг юмаа хийнэ гээд л барилддаг.
-Жүдогоор барилдахын хажуугаар сурдаг уу?
-Би одоо 23 настай. “Идэр” дээд сургуульд спортын сэтгүүлчээр сурдаг.
-48 кг-д өмнө нь М.Уранцэцэг гавьяат барилддаг байсан. Түүний амжилтыг үргэлжлүүлэх, орон зайг нь нөхөх үүрэг энэ жингийн жүдочдод оногдож байна. Үүнийг хэр ухамсарлаж байгаа вэ?
-Ухамсарлалгүй яах вэ. Одоогоор М.Уранцэцэг эгчийнхээ хаана нь ч хүрэхгүйгээ мэдэж байгаа. Эгчийнхээ юмнуудыг сайн сурна, судална. Дэлхийд эгчийнхээ залгамж халаа ямар байгааг харуулахыг хичээнэ.
-Цаашдын зорилгоосоо хуваалцахгүй юу?
-Мэдээж олимп, дэлхийн аварга болохын төлөө барилдана. Бэлтгэл, сургуулилалтаа сайн хийгээд, шантрахгүй, алдаагаа засаад явбал болох байх гэж бодож байна.
0
0
0
0
0
0
0
0
