Ч.Хантүмэн: Данс хаачихлаа, дарга нарыг мууллаа гээд ингэв үү
Ардчилсан нам өнөөдөр /2023.01.19/ Үндэсний бодлогын хороогоо хуралдуулж, намын шинэ даргаа сонгох гэж байна. Намын даргын сунгаанд С.Баярцогт нэр дэвшээд байгаа нь анхаарал татаж буй. Учир нь түүний хувьд гурван шатны шүүхээс ял сонссон мөртлөө нэг л өдөр хэргээ “аргалж”, шүүх "Буруугүй байжээ" гээд цайруулчихсан. Ингэж тэр хэргийн бөөн ул мөр, баримт үлдээгээд асуудлаас холдсон хүн.
Өрөг.мн сайтын үүсгэн байгуулагч, сэтгүүлч У.Болортуяа С.Баярцогтын хэргийн талаар цувралаар хөндсөн. Хамгийн сүүлд буюу 2022 оны 11-р сарын 16-нд, 12-р сарын 05-нд түүний хэрэгтэй холбоотой хоёр цуврал нэвтрүүлэг бэлтгэн цацсан. Эхний нэвтрүүлэгт С.Баярцогт гурван шатны шүүхээс ял сонссон ч учир битүүлэг шалтгаанаар ялгүй болж, улс төрд эргэн ирэхээ зарласан тухай, хоёр дахь нэвтрүүлэгт С.Баярцогтын хэргийг хөдөлбөргүй нотлох баримтгүй гээд буцаасан хоёр шүүгчийн нэрийг зарлаж, зургийг дэлгэсэн юм. Гэвч тэрбээр “Би буруугүй. Нэр цэвэр хүн. Бардам байна” хэмээн өөрийгөө хаацайлж, өөрийнх нь асуудлыг хөндөж тавьсан хүн бүхнийг “Гүтгэгч” хэмээн цоллож байна. Түүнийг өчигдөр орой АН-ын даргын сонгуульд өрсөлдөх батламжаа гардан авах үеэр нь ярилцлага авсан ч “Гүтгэлэг” гэхээс өөр тоймтой хариулт хэлсэнгүй.
Та өөрийгөө улс төрд эргэн ирлээ гэж зарласан. Улмаар АН-ын даргын сонгуульд нэр дэвшиж байна. Та өөрийгөө ингэх хэр ёс зүйтэй хүн гэж харж байна вэ?
Би маш их хатуужсан. Туг ч барьсан, тугал ч хариулсан хүн. Ёс зүйн талаасаа өөрийгөө үлгэр жишээ болж байгаа байх гэж л бодож байна.
Та гурван өөр хэргээр шалгуулсан улс төрч. Гэвч та ганцхан хэргийн тухай л ярьдаг. Оффшорын хэрэгт намайг буруугүй гэсэн гэж л яриад байдаг. Эхнэрийнхээ компаниар дамжуулж, Оюутолгойгоос 63 тэрбумын ашиг олсон асуудалд холбогдуулж, танд гурван шатны шүүхээс ял өгсөн шүү дээ. Үүнийгээ яагаад тайлбарладаггүй юм бэ?
Энэ бол цэвэр гүтгэлэг байсан. Хоёр зохиомол хэргийг надад тохох гэж оролдсон. Чи судлаагүй юм шиг байна.
Судалсан.
Манай эхнэр тэр компанийг огт эзэмшиж байгаагүй. Надаас асууж байгаагүй мөртлөө шүүх рүү явуулахдаа нэмээд оруулчихсан материал.
Швейцарийн прокурор С.Баярцогтын оффшорын хэргийг хэрэгсэхгүй болгожээ гээд л мэдээлэл цацдаг. Гэтэл үүний эх хувь нь ерөөсөө олдоггүй. Та харуулж чадах уу?
Би тэр шийдвэрийг Нийслэлийн прокурорын газарт аваачиж өгсөн. Мөн АТГ-т файлаар өгсөн. Миний хэргийг шалгах үед Монголд хууль засагладаггүй, хүн засагладаг байсан. Х.Нямбаатар сайд ч энэ талаар хэлж л байсан. Бүх хэргийг ордны гурван давхарт шийдэж байна гэж хэлсэн удаатай. Үүнийг би хариуцлагатай мэдэгдэл гэж харж байгаа.
Та улс төрийн хүрээнд тохироо хийж, наймцаалцаж, хэргээ шүүх дээр аргалуулсан гэж олон нийт дүгнэж байна. Нэр бүхий улс төрчдийн хувьд ч шууд л таныг нэрлэж хэлж байна?
Би бардам байгаа. Монголд, Швейцарийн холбооны улсад, Хонгконг, Австралийн хууль хүчний байгууллагууд нэгдэж шалгаад, хэргээ цэгцлүүлээд, цагаадсан хүн одоогоор байхгүй байх аа. Намайг Оюутолгойн гэрээг ашиггүй хийсэн гэж буруутган шалгасан. Гэвч явцын дунд хэрэгсэхгүй болгосон.
Сэтгүүлч У.Болортуяа таны хэргийн баримтуудыг харуулсан нэвтрүүлэг цувралаар бэлтгэсэн. Та үзсэн үү?
Үзээгүй.
Энэ мэтээр дансандаа сая доллараа мартсан, гурван ч шатны шүүхээс ял сонссон ч, нэг л өдөр “энхийн цагаан тагтаа болж” хувирсан С.Баярцогт баримт бүхний өөдөөс сөрж, даналзаж байна. Шүүх нөлөөнд автсан уу гэдэг олон нийтийн эргэлзээ, хардлага бий. Нөгөө талаас С.Баярцогт буруутайг батлах баримтууд олон бий. Гэвч өөрийгөө ёсзүйтэй улстөрч хэмээн цоллосоор улстөрийн тавцанд тэр дахин гарч ирж байна. Баримт нь бэлхэн байхад үгүйсгэж “Би нэр цэвэр хүн” хэмээн мэдэгдсээр Ардчилсан намын дарга болохоор бүртгүүлээд байна. Харин Шүүхийн Ерөнхий зөвлөл С.Баярцогтын "өмнөөс" сэтгүүлч У.Болортуяад гомдож, цагдаагийн байгууллагад хандаад байгаа билээ.
Сэтгүүлч У.Болортуяагийн бэлтгэсэн С.Баярцогтын хэрэгтэй холбоотой нэвтрүүлгийг энэ холбоосоор үзнэ үү. https://www.urug.mn/news/21471
0
0
0
0
0
0
0
0
