Сэлэнгэ Бодонс хагас бөмбөгийн зөрүүтэй хожил авав
Волейболын үндэсний дээд лигийн аварга, “Натур мед ноён” клубийн тамирчин Тамираагийн Хангалд Тайландын дээд лигт тоглох урилга иржээ. Улмаар энэ жилийн үндэсний дээд лигийн дараа Тайландыг зорихоор төлөвлөж байгаа гэнэ.
Аавынхаа удирдлагад бэлтгэл хийн, тэмцээнд оролцдог тэрбээр үндэсний дээд лиг, насанд хүрэгчдийн УАШТ, идэрчүүд улсын аваргын үнэ цэнтэй тоглогч.
-Тайландын лигт тоглох гарцыг хэрхэн олов?
-Би саяхан шигшээ багийнхныхаа хамт “Challenge cup”-т оролцсон. Тэмцээний дараа хоёр улсаас легионер тоглогчоо болгох санал ирсэн. Нэг Тайландын лиг. Ер нь саналыг нь зөвшөөрье, тус улсын лигт тоглоё гэж бодож байгаа.
-Хэдийгээр Тайландыг зорихоор төлөвлөж байна вэ?
-Ямар ч байсан “Натур мед ноён” багийнхныхаа хамт аравдугаар сард эхлэх үндэсний дээд лигт оролцоно. Лигийг дуусгачихаад явахаар төлөвлөж байна.
-Тайландын лигийг ямраар төсөөлж байна вэ. Дасахад хэцүү зүйл нь юу бол?
-Судалж л байна. Ер нь дажгүй юм байна лээ. Тайланд халуун орон, уур нь амьсгал нь Монголоос өөр. Хоол нь жаахан тохирохгүй байж магадгүй. Хичээж байгаад орчин нөхцөл, лигт нь хурдан дасна.
-Т.Хангал клубийн түвшинд хэдэн оноос хойш тоглож байгаа билээ?
-2020 оноос хойш тоглож байна. Түүнээс өмнө буюу өсвөр үе, идэрчүүддээ сургууль, дүүргийнхээ багаас тоглодог байсан.
-Волейболын спортоос авдаг хамгийн гоё мэдрэмж тань юу вэ?
-Хамгийн гоё зүйл нь багийн спорт. Бусдынхаа алдааг засаж тоглодог, нэгнийхээ төлөө, багаараа зүтгэдэг нь гоё мэдрэмж төрүүлдэг. Багаараа хамт байж, бүгдээрээ шилдэг байж л хожилд хүрдэг нь хамгийн сайхан.
-Одоогоор ямар, ямар амжилт гаргаад байгаа билээ?
-Үндэсний дээд лиг, насанд хүрэгчдийн болон идэрчүүдийн улсын аваргын шилдэг тоглогч. Тухайн тэмцээнд сайн оролцсонд бус намайг улам сайжраасай гээд шагнадаг гэж боддог.
-Оноо эн тэнцүү яваа чухал мөчид өөрийгөө хэрхэн хурцалдаг вэ?
-Оноо дээр өндөр гарчихсан, тоглолтын төгсгөл ирсэн үед аль болох тайван байж, багийнхантайгаа зөв ойлолцох, ярилцах, багийнхныгаа тайвшруулаад, дэмжээд тоглохыг хичээдэг.
-Таны тоглолтын онцлог гэвэл юу, юугаа онцлох бол?
-Би 20 настай, 192 см өндөр. Бусад тоглогчоос урт мөчтэй болохоор үсрэлт сайтай, солгой гар маань давуу тал болдог.
-Хамгийн олон оноо авсан тоглолт аль нь вэ?
-Үндэсний дээд лигийн нэг тоглолтод 38 оноо авсан. Тэр миний хувийн дээд амжилт.
-МУИС-ийн сэтгэл зүйн ангид сурдаг. Спортын сэтгэл зүйчээр ажиллах уу?
-Байгаа. Спортын сэтгэл зүйчээр ажиллах сонирхолтой. Цаашдаа сэтгэл судлалаар сургуулиа төгсөөд, Европын лигт тоглох сонирхолтой.
-Тоглохыг мөрөөддөг баг бий юү?
-Байлгүй яах вэ. Оросын “Зенит” багт тоглохыг хүсдэг. Миний мөрөөдөл.
0
0
0
0
0
0
0
0
