Н.Номтойбаяр: Ц.Даваасүрэн төсвийн байнгын xорооны дарга xэвээр байвал өөрчлөлт гараxгүй
Монгол Улсын Ерөнхийлөгч У.Хүрэлсүх өчигдөр ОХУ-ын Ерөнхийлөгч В.В.Путин, БНХАУ-ын дарга Ши Жиньпин нартай гурван талт уулзалт хийсэн. Мөн Ерөнхийлөгч У.Хүрэлсүх БНХАУ-ын даргатай хоёр талт уулзалт хийсэн юм. Уулзалтаар хэлэлцсэн асуудлыг УИХ-ын гишүүн, Эдийн засаг, хөгжлийн сайд Ч.Хүрэлбаатараас тодрууллаа
-Энэ удаагийн айлчлалаар манай улсын эдийн засагт эерэг нөлөө авчрах ямар асуудлуудыг хэлэлцэж байна вэ?
-Гурван талт уулзалт нэлээн үр дүнтэй, амжилттай боллоо. Олон жил яригдсан хэд хэдэн асуудлаар тодорхой байр сууриудыг илэрхийлсэн. Юуны өмнө гурван улсыг холбосон коридорын тухай ярья. Монгол Улсын хувьд 3 талт уулзалтаар Улаанбаатар төмөр замын парк шинэчлэл, төмөр замын үйл ажиллагааг сайжруулах чиглэлээр хамтарч ажиллахаар тохирлоо. Дорнодоор дайрах зүүн чиглэлийн, мөн баруун чиглэлийн босоо төмөр зам тавихыг ч дэмжихээ илэрхийлсэн. БНХАУ-ын дарга Ши Жиньпин төмөр замын тухайд холбох боломжтой замуудаа холбоод явъя гэж байна.
Түүнчлэн, гурван улсыг холбосон хурдны замын тухай Монгол Улсын Ерөнхийлөгч байр сууриа илэрхийлсэн. Цаашид нарийвчлан ярих байх. Ерөнхийлөгч У.Хүрэлсүх 2019 онд Ерөнхий сайд байхдаа ОХУ-д очиж хийн хоолойн тухай ярьж байсан. БНХАУ-ын тал хийн хоолойг Монгол Улсын нутаг дэвсгэрээр дамжуулахад нааштай хандаж байна. Аж ахуйн нэгжийн түвшинд эдийн засгийн тооцооллоо хийгээд явцгаая гэсэн. Урьд нь олон удаа ярьж байхад сонсож байгаагүй байр суурийг өнөөдөр илэрхийлсэн нь чухал ач холбогдолтой.
Энэ нь манай бүс нутгийн хөгжлийн интеграцчилал, Монгол Улсын эдийн засгийн хувьд бие даах боломжийг хангаж өгсөн олон зүйл хэллээ. Түүнээс гадна, байгаль орчны чиглэлд хамтарч ажиллах, усан цахилгаан станц барих тухай ярьсан. Мөн БНХАУ-ын дарга “Тэрбум мод” хөдөлгөөн санаачилсныг дэмжихээ илэрхийлсэн гэхчлэн олон зүйлд нааштай үр дүн авчрахаар яриа хэлэлцээ боллоо.
– Ханги чиглэлийн төмөр замыг БНХАУ-ын төмөр замын сүлжээтэй холбохоор тохиролцолоо гэж ойлгох уу?
-Ерөнхийлөгч хэлэхдээ Зүүнбаян-Ханги чиглэлийн төмөр замыг босоо тэнхлэг, баруун, зүүн босоо чиглэлийг хэлээд, мөн Зүүнбаян-Ханги чиглэлийн уулзалтын цэгээ тохироогүй байгааг илэрхийлсэн. Хоёр талын уулзалтаар БНХАУ-ын дарга Ши Жиньпин боломжтой төмөр замуудаа холбоод явцгаая гэж олон тоон дээр хэлсэн. Үүнийг бэлгэшээн, цаашид шуурхай ажиллана.
Монгол улс, БНХАУ-ын харилцаанд ямар эерэг дүн гарахаар яриа өрнөж байна вэ?
Нэг зүйлийг онцлоход, Монгол Улс, БНХАУ-ын харилцаанд шинэ зарчмын өөрчлөлт гарч ирлээ. Өөрөөр хэлбэл, аль нэг нь санаачилж ярих биш, бүх зүйлээ хамтдаа төлөвлөе, түүнийгээ хамтдаа зурж, хийж бүтээе гэсэн санал дэвшүүллээ. Энэ чиглэлд анхаарч ажиллана. Миний хувьд ШХАБ-ын хуралд анх удаа оролцож байгаа. Эдийн засгийн асуудлыг түлхүү ярьж байгаад шинэ яам анхаарч, Монгол Улсын хөгжлийг төлөвлөх, хурдасгах, үр дүн гаргах, монголчуудынхаа амьдралыг дээшлүүлэхэд тодорхой ажлыг зохион байгуулах боломжтой болж байна гэж үзэж байна.
-Гурван талт уулзалтын үеэр Эгийн голын усан цахилгаан станцыг барих асуудалд ОХУ-ын Ерөнхийлөгч В.В.Путин ямар байр суурь илэрхийлсэн бэ?
-ОХУ-ын Владивостокт болсон Алс Дорнодын уулзалтын үеэр Ерөнхий сайд Л.Оюун-Эрдэнэ ОХУ-ын Ерөнхийлөгчтэй уулзаад, Эгийн голын усан цахилгаан станцын хувьд байгаль орчны асуудал эмзэг, нэлээд хэл ам дагуулдаг, ажил удааширч байгаа зүйл бий. Хоёр талаасаа экспертийн түвшинд ажлын хэсэг гарган, хамтарч ажиллаад маргаантай зүйлүүдээ цэглэе гэдэг байр суурь хэвэндээ байгаа.
-Замын-Үүд-Алтанбулагийн хооронд өндөр хурдны автозам тавих талаар хөндсөн үү?
-Цар тахлын жилүүдэд тээвэр ложистик хүндрэлтэй байлаа. Энэ нь хөгжлийг хойш нь татаж, өмнөх ололт амжилтыг нэг, хоёрхон жилийн дотор алга болгодог амаргүй зүйл гэдгийг хэлсэн. Цаашид дэд бүтцийн бүтээн байгуулалтыг нэлээд сайн хийх ёстой. Тэгж гэмээнэ манай улс дэлхийн улс орнуудтай холбогдож, олон оронтой харилцан, бараа бүтээгдэхүүнээ гаргах боломж бүрдэх тул Замын-Үүд-Алтанбулаг чиглэлийн өндөр хурдны автозамын тухайд дахин ярьсан. Эдийн засгийн коридор гэдэг нь 3 орны төмөр зам, нефть, авто зам гээд цогц ойлголт юм.
Онцлоход, энэ удаагийн гурван талт уулзалтад аялал жуулчлалын салбарын талаар ярилаа. Аялал жуулчлал нь ажлын байр олноор бий болгодог, ард иргэдийн орлогыг нэмэгдүүлэх боломж авчирдаг. Энэ салбарт анхаарч ажиллах боломж бий болж байна.
0
0
0
0
0
0
0
0
