Н.Номтойбаяр: Ц.Даваасүрэн төсвийн байнгын xорооны дарга xэвээр байвал өөрчлөлт гараxгүй
Хэрвээ та хүчирхийлэлд өртөж байсан эсвэл өртсөөр байгаа бол, үүнийгээ нуух хэрэггүй. Ил гарга. Бусдын төлөө амьдрах гэж төрөөгүй учраас, өөрийгөө хамгаал. Гашуун яриа нэвтрүүлгийн зочин, өсвөр насандаа төрсөн эцгийнхээ хүчирхийлэлд өртөж, “магадгүй” үүнээс шалтгаалан эрэгтэй хүнийг үзэн ядах, эмэгтэй хүнд татагдах болсон тухайгаа ярилаа.
-Ямар ч нийгэмд хөшигний цаана, нуугдмал байдаг асуудлуудын нэг бол гэр бүлийн хүчирхийлэл байдаг. Хэдэн настайгаасаа эцгийнхээ хүчирхийлэлд өртсөн бэ?
-Тухайн үед насанд хүрээгүй 14-15 настай байсан. Энэ хүчирхийлэл гэр бүлийн дунд маш чимээгүй явагддаг байсан юм. “Гэрийнхэн, ээждээ хэлбэл асуудал үүснэ шүү”, “ээжийг чинь ална”, “өөрийгөө егүүтгэнэ” гэх дарамт үзүүлсээр ирсэн. Насанд хүрээгүй хүүхэд байсан учраас үүнээс их айна. Үнэхээр тийм зүйл болчих байх гээд. Өөрийгөө золиослоод хэн нэгнийг хамгаалах ёстой ч юм шиг жаахан хүүхдийн сэтгэхүйгээр хандаж байгаад сүүлдээ тэсэхгүй болсон. Энэ явдал даамжирч байлаа. Тэр хүн нэг өдөр согтуу орж ирээд байдал хүндэрсэн. Тухайн үед би байдал хүндэрч байгааг мэдрээд шууд гараад гүйсэн. Цагдаа дуудаж амжсан юм. Гараад гүйж байхад өөдөөс хоёр цагдаа ирэхтэй зэрэгцэн тэр хүн араас гарч ирсэн. Яг юу болсныг сайн санадаггүй. “Тэр хүнийг бариад аваарай” гээд ухаан жолоогүй гүйж байснаа л санадаг. Замдаа ээжтэй таарахад, “хаашаа явах гэж байгаа юм” гэж байсан санагддаг. Тэгэхэд нь “би зугтлаа, явлаа” гээд л. Тэр бүхнээс эхлээд шүүх цагдаагаар явсан.
-Таны төрсөн эцэг үү?
-Тийм. Төрсөн эцэг байсан. Ийм зүйл байж болно гэж үү гээд байж боломгүй санагддаг юм билээ.
-Дур хүслээ хангаад байгаа тэр хүний хувьд эрүүл байдаг юм уу, согтууруулах ундаа хэрэглэсэн байдаг юм уу?
-Аль аль нь байсан. Тэр хүний бага насны амьдралын хувьд, эцэг эхийн хайр мэдрээгүй, харгислал дунд өссөн юм билээ. Тийм байсныг нь мэдээд өрөвдөх сэтгэл төрж эхэлсэн. Мэдээж би өөрөө сэтгэл зүйгээрээ маш удаан хугацаанд чимээгүй хохирч явсан шүү дээ. Өөрөө ч түүнийгээ анзаарахгүй байсаар байгаад бие муудаж унадаг болж эхэлсэн. Зүгээр байж байгаад л хамаг бие салгалж чичрээд, амьсгаа боогдож, дайвалзаад, үргэлж түргэн дууддаг байлаа. Эмч нар амин үзүүлэлт үзээд, “зүгээр, эрүүл байна, яагаад ингээд байдаг юм” гэх зэргээр гайхдаг. Үргэлж тайвшруулах эм тариа хэрэглэдэг. Их хэрэглээд ирэхээр сүүлдээ эм тарианаас халширч эхэлсэн. Улмаар сэтгэл зүйчид хандаж урт хугацааны туршид угжирсан сэтгэл зүйн асуудалтайгаа ойлгосон.
-Дур хүслээ хангадаг байсан гээд ярьж байна. Ямар үйлдэл гаргадаг байсан юм?
-Яг хүчирхийлээгүй ч, хийж байгаа мэт төсөөлөл өөртөө аваад, илж таалдаг байсан. Эсэргүүцэх юм бол зоддог. Гомдох гэдэг үг багадахаар, гомдохоос илүү хүнд үг хаана байдаг юм. Бие сэтгэлийн хувьд асар их шаналалтай байсан. Зүйрлэж хэлэх үг олдохгүй байна.
-Олон жилийн өмнөх үйл явдал байна. Өнгөрсөн хугацаанд юу хийж байв?
-Цагдаад мэдэгдсэнээс хойш би гадаад руу явж тэтгэлгээр сурах боломжтой болсон. Үүнийгээ амжилт мэтээр бодож хүсээгүй мэргэжлээ сонгосон хэрэг. Өөрийгөө түрхэн зуур хуурч байсан гэсэн үг. Хар бараан амьдралаасаа зугтах гэж л явсан байх. Хүсээгүй зүйлээ хийж гадаадад байх эсвэл хүсээгүй амьдралтайгаа нүүр тулж Монголд ирэх хоёр сонголт надад байсан. Ингээд буцаж ирэхдээ би вагон дотор маш их уйлж билээ. Очиж байна даа гэж бодохоор хамаг бие арзайгаад л. Гэсэн ч өөрөө л тэмцэхгүй бол хэн ч миний өмнөөс тэмцэхгүйг ойлгож эхэлсэн.Одоо бодоход ирчхээд буруу замаар орох гээд явж байсан. Согтууруулах ундаа их хэрэглэдэг болсон. Хэтрүүлж хэрэглэсэн үедээ ээждээ агсан тавих, юм авч шидэх, тэр хүнийг харахдаа өөрийгөө гэмтээх, цонх хагалах зэрэг асуудал мэр сэр болно. Би өөрөө ч мэдэлгүй тийм үйлдэл гаргаж эхэлсэн.
Ингээд нэг л өдөр намайг хүчирхийлж байсан тэр хүний замаар явах гээд байна уу даа гэдэг бодол төрж, өөрийгөө барьсан. Ингээд цагаа өөр зүйлд зарцуулж эхэлсэн. Тэр хүн одоо надад гар хүрэх байтугай харах нүүр ч байдаггүй.
-Одоо уулздаг гэсэн үг үү?
-Байж л байдаг. Уулзсан ч яриа байхгүй, юу ч байдаггүй. Байсан ч байгаагүй юм шиг зөрдөг.
Би яагаад үүнийг яриад байгаа гэхээр, Хэн нэгэн хүчирхийллийн шинжтэй нэг үйлдэл хийсэн л бол давтагддаг. Тиймээс нуухгүй байж, хэлэх ёстой хүндээ заавал хэл. Хортой үйлдлийн үндсийг таслахгүй бол өөрийг чинь эргээд барьж иддэг юм билээ.
-Бага насандаа мэдэрч байсан эдгээр мэдрэмж, дурсамжаас үүдэлтэй зовуурь байдаг уу?
-Миний хувьд ямар ч газрын хаалганы бариул дуугарахаар хамаг бие арзайдаг. Тийм мэдрэмж суучихсан. Одоо үүнийг засах гэж хичээж байгаа ч гэсэн хаалганы бариул ч юм уу, хэн нэгэн цочооход үхтлээ айдаг. Юмс мартагддаггүй шүү дээ. Дурсахгүй байх гэж л хичээдэг.
-Ийм зүйл мэдэрч, үзсэнээрээ буруудсан эсвэл таны амьдралыг өөрчилсөн зүйлс байгаа байх?
-Үүн дээр миний бэлгийн чиг хандлага яригдана. Түрүүн шүүх цагдаагаар явсан гээд хэлсэн дээ. Хэдхэн жил болоод гараад ирсэн. Түүнээс хойш эрэгтэй хүнтэй танилцах, хамт байхад дотор арзгануулах мэдрэмж төрдөг болсон. Гараас барих үед ч юм уу хамаатны ах хүрч байгаа юм шиг мэдрэмж төрөөд л. Нэг эрэгтэй хүнээр бүх эрэгтэй хүнийг дүгнэж болохгүй. Гэхдээ мэдрэмж гэдэг зүйлийг хорьж болдоггүй юм шүү дээ.
-Чиг хандлагаа өөрчлөгдсөнийг хэзээнээс анзаарч эхлэв ээ?
-Тухайн үед жаахан байсан юм. Санамсаргүйгээр нэг эмэгтэйтэй танилцсан. Ийм мэдрэмж дурлал байдаг юм уу гээд их гайхаж байсан. Нөгөө ижил хүйстнүүд ч бил үү, тэр нь юм байх даа гэж бодоод мэдээлэл цуглуулж эхэлсэн. Сэтгэл зүйчдийн зүгээс, эрэгтэй хүнийг үзэн яддаг учраас хайрыг хайхдаа, чамайг гэмтээхгүй зөөлөн мэдрэмжийг эмэгтэй хүнээс авдаг байж магадгүй. Түүнээс биш чи хэвийн гэж байгаа юм.
Нөгөө тал нь өөрийгөө битгий хүчил, сайн бод, багадаа эмэгтэй хүнд ямар байснаа сайн бод гэсээр байгаад хоёр талтай болчихсон. Тэр эмчийн хэлэх гээд байгаа нь эмэгтэй хүнтэй уулзмаар байвал уулзаад яв. Эрэгтэй хүнтэй баймаар байвал байгаад үз. Ингээд чи өөрийгөө олно шүү дээ гэсэн. Би бас тэгмээргүй байдаг. Одоо ч дотроо зөрчилдөөд байдаг.
-Таагүй дурсамжуудаа бодохгүй байхын тулд аз жаргалтай болгодог зүйлээ хийх хэрэгтэй гэсэн шүү дээ. Таныг юу аз жаргалтай болгодог вэ?
-Би зураг зурдаг. Хөгжим тоглодог. Кофе ч хийдэг. Маш олон үйлчлүүлэгчид дунд байдаг. Мэдрэмж, харилцаанаас аз жаргал авдаг юм шиг. Тайзан дээр бага байхдаа их гардаг байсан. Яваандаа түүнийг сэргээнэ гэж бодож байгаа. Яг урлагийн хүн болох чиглэлийг хүртэл тэр хүн хааж байсан. Хэзээ ч зөвшөөрөөгүй. Миний амьдрал, ирээдүй, цаг хугацаагаар тоглосныг нь би арай ч дээ л гэж боддог. Гэсэн ч үзэн ядахаа больсон. Хаясан.
0
0
0
0
0
0
0
0
