Н.Номтойбаяр: Ц.Даваасүрэн төсвийн байнгын xорооны дарга xэвээр байвал өөрчлөлт гараxгүй
Уламжлалт анагаах ухаан гэж юу болох, түүний давуу тал, эмчилгээнд хэрхэн ашигладаг талаар “Энэрэлт манал” эмнэлгийн их эмч Ц.Дарьсүрэнтэй ярилцлаа.
Уламжлалт анагаах ухаан чухам юуг судалдаг, ямар онцлог давуу талтай вэ?
Уламжлалт анагаах ухаан нь олон мянган жилийн түүхтэй. Эрт дээр үеэс эцэг өвгөдөөс маань уламжлагдан ирсэн агуу шинжлэх ухаан юм. Уламжлалт анагаах ухааны судлагдах цар хүрээ маш том. Товчхондоо энгийн үгээр хэлэхэд эмийн бус аргаар алив өвчлөлөөс урьдчилан сэргийлэх, өвчнийг засах засал, дом болон, өвчилсний дараа өвчний сүүлийг таслах буюу дахин өвчлүүлэхгүй байх бүхий л амьдралын хэв маяг, хооллолт, эм засал эмчилгээг судалдаг гэж хэлж болно.
Мэдээж уламжлалт анагаах ухааны онцлог давуу талыг тоочоод баршгүй. Одоо дэлхий нийтээр эрүүл зөв хооллолт, идэвхтэй хөдөлгөөн, байгалийн гаралтай органик хүнс, өвчилсний дараа эмийн бус эмчилгээ зэргийг нэн түрүүнд тавьдаг болсон байна. Тиймээс ч баруун Европ болон Америк зэрэг гадны улсуудад бидний уламжлалт анагаах ухаан Азиудаас ч илүү хөгжиж дэвшиж, олон хүн уламжлалт анагаах ухааныг сонгож үйлчлүүлэх болсон байна.
Уламжлалт анагаах ухааны онцлог давуу тал товчхондоо химийн гаралтай эмт бодис хэрэглэхгүйгээр өвчнийг эмчлэх, аливаа өвчлөлөөс урьдчилан сэргийлэх арга ухаанд ард иргэдийг сургах, амьдралын зөв хэв маягийг түгээн дэлгэрүүлэх зэрэг олон олон ач холбогдолтой юм.
Уламжлалт анагаах ухаан өвчнийг хэдэн янзаар оношилдог вэ. Судас барьж үзсэнээр бүх өвчнийг оношлох боломжтой юу?
Уламжлалт анагаах ухааны оношилгооны нэгэн өвөрмөц арга бол судас, шээс, хэлээр оношлох аргууд юм. Өвчний гадна илрэх шинжээс эхлээд түүний далд мөн чанарыг олж мэдэх, бие махбодын бүтцийн болон үйл ажиллагааны өөрчлөлтийг таньснаар өвчнийг үүссэн хойно нь оношлохоос гадна, өвчнийг эрт буюу урьдал үед нь таньдаг оношилгооны чухал арга юм. Ерөнхийдөө үзэх, хүрэлцэх, асуух гэсэн гурван үндсэн аргаар оношилгоо хийнэ.
Тэгвэл ямар өвчнүүд уламжлалт эм, эмчилгээгээр бүрэн илааршдаг вэ?
Удаан өвдчихсөн архаг хууч, сэдрээгүй байгаа үрэвсэлт өвчнүүд, зүрх судасны зарим өвчнүүд, даралт ихдэлт, харвалтууд, харвалтын дараах саа саажилт, мэдрэлийн ядаргаа зэрэгт уламжлалт эмнэлэгийн нөхөн сэргээх зүү эмчилгээ маш сайн үр дүн өгдөг. Мэдрэлийн ядаргаа, саа, саажилт, мэдрэлийн гаралтай өвдөлтүүд зэргийг уламжлалт эмчилгээгээр бүрэн илааршуулах боломжтой. Яаралтай мэс заслын өвчнүүд болох олгой ургахаас эхлээд зайлшгүй хагалгаа хийх шаардлагатай өвчнүүдийг уламжлалт эмнэлэг яаж ч чадахгүй.
Шар тос хэрэглэх нь ийм ач тустай гээд зөвлөгөө байдаг шүү дээ. Яг үүн шиг хүн бүрийн тэр бүр сайн мэддэггүй уламжлалтын талаар зөвлөгөө өгвөл?
Уламжлалт анагаах ухаанд өвчнийг 3 үндсэн бүлэг болгож хуваадаг. Үүнд : Хий, шар, бадгана багтана. Жишээлбэл хий өвчний үед сэтгэл дотно нөхрөөр асруулж, дулаан тавтай орчинд, шим шүлттэй идээ ундаа хэрэглэх шаардлагатай байдаг. Үүнд дурдсан шимтэй идээ ундаа гэдэгт шар тос орно. Тэгэхээр шар тос нь бүхий л өвчлөлд таарна гэсэн үг биш. Шарын мөн чанартай өвчлөлийн үед шар тос хэрэглэх нь зохимжгүй гэсэн үг. Тиймээс аливаа сайн гэсэн идээ ундаа, ургамал тан хэрэглэхдээ уалмжлалтын эмчид судас оношлогоо хийлгэж, зөвлөгөө авсаны үндсэн дээр хэрэглэж байх нь зүйтэй юм. Тиймээс хэн нэгний хэрэглээд сайн гэсэн болгоныг хэрэглэж өөрийн бие дээр туршилт хийх нь эрсдэлтэй гэдгийг хэлмээр байна. Ямар ч идээ ундаа, эм тан хэрэглэвэл зохих үедээ тун хэмжээ нь таарч байж гэмээнэ эмчилгээ болдог.
Бариулчхаад гам барина гэж юуг хэлж байна вэ?
Уламжлалтын ямар ч эмчилгээний дараа гам дэглэм барих хэрэгтэй байдаг. Олны дунд зүү эмчилгээ хийлгээд гам алдвал бүр дордоно гэсэн цуу яриа байдаг. Энэ ярианаас болж олон хүн зүү эмчилгээний гам дэглэмээс айгаад эмчилгээ хийлгэж чаддаггүй. Үнэн хэрэг дээрээ гам гэж тийм айхтар сүртэй юм байхгүй. Мэдээж эмчилгээ хийлгэж байгаа үедээ ердийн байдгаас илүү дулаан хувцаслаж, шөл устай хоолоо сайн идэж, хэт ядрахгүй сайн унтаж амарч байхад л болох хэрэг. Түүнээс амаржсан хүн шиг толгой түрийгээ боогоод чихэндээ хөвөн чихээд байх шаардлагагүй. Бариа ч мөн ялгаагүй.
Ямар нэгэн хавдрыг уламжлалт анагаах ухаанаар эмчилнэ гэсэн зар их байдаг юм билээ. Уламжлалт анагаах ухаанаар хавдрын өвчнийг эмчлэх боломжтой юу?
Уламжлалт эмнэлгүүдэд хавдрыг эдгээсэн тохиолдол байж болох ч, шинжлэх ухаанаар батлагдсан зүйл байхгүй. Шуудхан хэлэхэд хавдар өвчнийг уламжлалт анагаах ухаанаар эмчлэх боломжгүй. Манай монголчууд их туйлшрамтгай хүмүүс шүү дээ. Фэйсбүүкээс хэн нэгэн хүнийг “хавдар эмчилдэг” гэнэ гэсэн мэдээллийг хараад л тийшээ хошуурцгаадаг. Бизнес хөөсөн, ашгийн төлөө хүмүүс л “Хавдрыг эмчилнэ” гэж ард иргэдийн тархийг угааж байна гэж ойлгож болно. Ингэж битгий хумүүсээр тоглооч ээ гэж хэлмээр байна. Хавдар өвчнийг эрт үед нь илрүүлбэл мэс заслын арга болон химийн эмчилгээгээр зогсоох боломжтой гэж үздэг. Харин хожуу үедээ илэрсэн хавдар өөр эд эрхтэнд нь үсэрхийлчихсэн байдаг учраас эмчлэх боломж бараг байхгүй. Ер нь ард иргэддээ хандаж хэлэхэд уламжлалт аргаар хавдар эмчилнэ гэж байгаа хүмүүс дээр очиж цаг, мөнгөө битгий үрээрэй. Хэрвээ хавдартай гэж оношлогдсон л бол төрөлжсөн эмнэлэгт нь хандаж л, эмчилгээ хийлгэсэн нь дээр гэдгийг хэлэхийг хүсч байна.
Сүүлийн үед хавдрын өвчлөл их нэмэгдэж байх шиг. Дөнгөж төрсөн хүүхэд хүртэл хавдартай төрлөө гэх мэдээ их сонсогдох юм. Энэ өвчнөөс урьдчилан сэргийлэх ямар боломж байна вэ?
Хавдараас урьдчилан сэргийлнэ гэдэг зөв амьдралын хэв маяг. Бидний өдөр тутамдаа хэрэглэж байгаа зүйлс ч хавдар үүсгэх хүчин зүйл агуулсан байдаг. Улаанбаатар хотын иргэдийн амьсгалж байгаа агаар, тоосжилт зэрэг нь уушгины хорт хавдар тусахад ихээр нөлөөлдөг гэсэн судалгаа бий. Тамхидалт, архидалт гээд бүгд л хавдарын шалтгаан болдог. Гэвч хавдарын шалтгааныг шууд нэг зүйлтэй холбож ойлгож болохгүй. Олон хүчин зүйлс түүнд нөлөөлж байдаг. Уламжлалт анагаах ухаанд өвчнөөс урьдчилан сэргийлэх ёсыг онцгойлон авч үзсэн байдаг. Хүнийг эхлээд явдал мөр буюу ямар орчинд хэрхэн биеэ авч явах тухайд авч үздэг. Тухайн хүний оршин байгаа газар орон, халуун хүйтэн, чийг нойтон зэргийг хэлж байгаа хэрэг. Зүрх муутай хүнд бол өндөрлөг газар зохихгүй. Тиймээс хүн өөрийн биеийн нөхцөл байдалд амьдарч байгаа газар орноо тааруулан амьдрах ёстой болдог. Тиймээс эхлээд хүний явдал мөр зөв байх ёстой. Дараа нь идээ ундаа нь зөв байх ёстой. Идээ ундаа зөв байх гэдэг бол бидний идэж ууж байгаа бүхнийг өөртөө тааруулсан, зөв харьцаа хэмжээгээр тохируулан хэрэглэхийг хэлнэ. Уламжлалт анагаах ухаанд ходоодыг 3 хуваан 3/1 нь идээ буюу хоол, 3/1 нь ундаа буюу шингэн зүйл, 3/1 нь хоосон байх ёстой байдаг. Гэтэл бид өлсөж явж байгаад нэг идэхээрээ ходоодоо дүүртэл идэх нь бий. Мөн өөрт тохирсон, тухайн өвчнийг дарж болохоор идээ ундаа хэрэглэх хэрэгтэй. Жишээ нь хий мөн чанартай хүн түүндээ тохирсон идээ ундаа болох хий дарах 3,4 шимтийн шөл, толгой шазны шөл, битүү болгосон хоол, шимтэй тослог идээ зэргийг хэрэглэх жишээтэй. Улирал бүрт харилцан адилгүй. Улирал бүрт хүний хий, шар, бадгана, таван махбодь харилцан адилгүй хурж, хөдөлж, амирлаж байдаг гэж үздэг тул тухайн улирал, цаг агаартаа тааруулж бүх зүйлсийг зөв зохистой идэж ууж, зөв явдал мөртэй байх юм бол хүн аливаа өвчлөлд өртөх нь бага байдаг. Харин явдал мөр, идээ ундаагаар засч дийлэхгүй өвчнийг эм, заслын аргаар эмчилнэ.
Голын хийгээр өвдсөн хүмүүст ямар шинж тэмдэг илрэх вэ. Эмчлүүлэхгүй удвал биед үзүүлэх сөрөг нөлөө нь юу байгаа вэ?
Голын хийтэй хүмүүс өөртөө ихэд зовиуртай байдаг. Тухайлбал, тавгүй, түгшсэн, айдастай, сандарсан, чоцимтгой, амархан уурлаж, гомдох зэрэг шинж тэмдэг илэрдэг. Эмчлүүлэхгүй даамжирсан тохиолдолд амьсгалахад түвэгтэй болж,амьсгал авагдахгүй бачуурдаг. Зарим хүмүүст шөнө нойргүй болох зэргээр илэрдэг. Голын хийтэй хүмүүс юу нь өвдсөнөө мэдэхгүй, европ анагаах ухаанаар эмчлүүлж явах нь элбэг л дээ. Зарим тохиолдолд шинж тэмдгээ арилгах төдий эмчилгээ хийлгэдэг. Нөгөө талаараа ийм өвчтэй хүмүүс зүрхээ, даралтаа, мэдрэлээ үзүүлээд бүх зүйлс нь зүгээр гардаг. Ар гэрийнх нь ч бүр үгээ хэлээд “Манай энэ хүн хэдэн жил ийм байдалтай явж байна. Юу нь өвдөөд байгаа нь мэдэгдэхгүй зовиурлаад байх юм. Эмнэлэгт үзүүлээд, шинжилгээ өгөхөөр өвдсөн юм байхгүй, зүгээр гардаг. Эрүүл байж маяглаад байдаг юм уу, хаашаа юм” гээд яриад явж байгаа хүмүүс байдаг. Энэ нь эмэгтэй хүний гармоны өөрчлөлтэй их холбоотой. Эмэгтэй хүн төрөхөөс эхлээд асуудал их шүү дээ. Төрсний дараах үеийн сэтгэл гутрал гэж бий. Тухайн үедээ төрсний дараах сэтгэл гутралаа дарж чадаагүй хүмүүс энэ өвчинд ихээр өртдөг. Төрсний дараа савны хий хөөрсөн гэж сонсч л байсан байх. Хүмүүс хий өвчнийг яг л бодит хий байдаг л гэж бодоод байдаг юм шиг байгаа юм. Яг тийм биш л дээ. Хий гэдэг бол цул эрхтнээс зүрхэнд, сав эрхтнээс эмэгтэй хүний саванд, гол судсанд хий хурдаг. Үүнийг эмчлүүлэхгүй удаан явсан хүмүүс голын хий гэдэг өвчинд удаан зовсон байдалтайгаар манай эмнэлэгт их ирдэг шүү. Тэдний ихэнх нь оношоо ололгүй хугацаа алдсан хүмүүс байдаг. Голын хийгээр удаан өвдчихсөн хүмүүс их айдастай болсон байдаг. Хэзээ мөдгүй үхэх гээд байгаа юм шиг санагдах нь ч бий. Тэр хий гэдэг зүйл өөрийг нь ерөөсөө тайван байлгадаггүй. Түүнээс болж зүрх нь дэлсдэг, даралт нь тогтворгүй болдог. Ийм зовиурууд илрээд байгаа хүмүүст уламжлалт эмнэлэгийг зориорой л гэж хэлмээр байна. Европ эмнэлгээр эм тариа хийлгээд тэр нь улам л даамжирна уу гэхээс нэг их сайн эдгэдэггүй. Тиймээс уламжлалт эмнэлэгт эртхэн хандаж хий дарах эмчилгээг хийлгэх хэрэгтэй. Манайхан мэдэхгүй хийтэй хүн байж мөстэй, хүйтэн ундаа уух зэргээр өвчнөө даамжруулах нөхцлийг бүрдүүлээд байдаг. Дөнгөж эхэн үедээ явж байгаа өвчийг идээ ундаа, явдал мөрөөр нь засах боломжтой байдаг юм шүү. Эхний ээлжинд ирж үзүүлээд зөвлөгөө авч болно. Иймэрхүү зовиур илэрдэг хүмүүс зөндөө л байгаа байх.
Сэтгэл санааны тайван бус, тогтворгүй байдлыг өвчин гэж ойлгож болох нь ээ?
Тийм. Тухайн хүний зан чанараас их зүйл шалтгаална. Хүн нь өөрөө тайван, дөлгөөн зантай бол хэчнээн хийтэй байсан ч гэсэн өөрөө түүнийгээ зохицуулаад байж чаддаг. Тухайн хүн нь өөрөө төрөлхийн сэтгэлийн хөдөлгөөн ихтэй бол өвчинд их автамтгай байдаг. Амархан сэтгэл санаагаар унаад, хурдан стрессдэж голын хий өвчнөө даамжруулаад байх талтай.
Антибиотекийн хэрэглээний хувьд нэг эрхтний өвчнийг намдааж, дарж байгаа боловч, нөгөө эрхтнийг гэмтээж байдаг гэж сонссон. Энэ үнэн үү?
Энгийнээр тайлбарлахад антибиотек гэдэг бол нянгийн эсрэг бэлдмэл юм. Тухайн үедээ антибиотекийг нээсэн нээлт бол үнэхээр мундаг. Тэр үедээ эмчилж чадахгүй байсан бүхий л өвчнийг аварч байсан анагаах ухааны том нээлт болж байлаа. Монголын уламжлалт анагаах ухааны хувьд олон мянган жилийн өмнөөс л нян, хорхой гээч зүйлийг нээж олоод түүний эсрэг уламжлалт аргуудаа хэрэглэдэг байсан юм билээ. Үүнийг бид мэддэггүй байж байгаад сүүлийн 30 гаруй жил уламжлалт анагаах ухаан маань буцаад сэргэж байна. Харин энэ цаг үед антибиотекийн хэрэглээ маш замбараагүй болсон. Ханиад хүрсэн ч, энгийн өвчлөлд антибиотекээр дарчихдаг гэж ойлгодог болжээ. Антибиотек өөрөө хоёр янзын үйлчилгээтэй. Хүнд ашигтай, ашиггүй хоёр төрлийн нян байдаг. Дархлаа систем гэж бий. Зарим өвчинд ашигтай нянгууд нь байж байх хэрэгтэй байдаг бол антибиотек нь ашигтай тэдгээр нянгуудыг нь устгачихдаг. Антибиотекийг удаан хэрэглэснээс болоод мөөгөнцөрдөөд салахаа байсан хүмүүс байдаг шүү дээ. Мөөгөнцөрийн эсрэг нян тэр хүнд байхгүй болсон гэсэн үг. Мөн удаан хэрэглээд ирэхээр дасал гэж зүйл үүснэ. Ер нь гарах сөрөг үр дагаварууд нь олон бий.
Энэ байдлыг халах цаг болсон. Ер нь дэлхий нийтээрээ үүний эсрэг явж байгаа шүү дээ. Европ эмийг бүр хоол шиг иддэг хүмүүс байдаг. Жишээлбэл, манай эмнэлэгт хэвтэж байгаа зарим хүмүүс бүр тор дүүрэн европ эмтэйгээ ирдэг. Тэрийгээ хоол шиг идээд л, бие организм нь тэр эмэндээ дасал болчихсон эсвэл уудаг эмэндээ өвчин нь намдахаа больмогц түүнийхээ хүчийг нэмэгдүүлээд, эмийн хамааралтай болсон эсвэл гүн хордлогонд орсон хүмүүс их байдаг.
Мацаг барина гээд байдаг. Олон хоног хоолгүй явах зэрэг асуудал үүсдэг. Ер нь мацаг барина гэж юу вэ?
Хавар цаг гэдэг улирлын хувьд хий босдог улирал. Хаврын улиралд хийтэй хүмүүсийн хий нь хөдлөөд, сэтгэцийн өөрчлөлттэй хүмүүс өвчин нь хөдөлдөг гэж ярьдаг шүү дээ. Угаасаа өөрөө их эгзэгтэй улирал байхгүй юу. Хүмүүс их ядардаг, амин дэмийн дутагдалд ордог. Хүйтэнийг давсан хүний бие организм ядруу байдаг энэ үед мацаг барих нь маш зохимжгүй. Хаврын цагт цэвэрлэгээний зорилгоор элэг, цөсөө цэвэрлэж болно. Гэхдээ элэг, цөсний цэвэрлэгээг намар цагт хийвэл зохилтой байдаг. Уламжлалт анагаах ухааны одон зурхайд шороо, ус, гал, хий, огторгуй гээд таван махбодь байдаг. Энэ таван махбодь хоорондоо уялдаж байдгаас гадна улирал бүрт энэ таван махбодьтой холбоотой эрхтнүүдийн судас оношлогоо өөр өөр байдаг. Эдгээр таван махбодиуд тус бүртээ өөр, өөрийн гэсэн эрхтэнтэй. Гал махбодийх гэхэд элэг байх жишээтэй. Шороо махбодийх дэлүү (Нойр булчирхай), усан махбодийх бөөр, хий махбодийх уушги, огторгуй махбодийх зүрх байдаг. Энэ мэт бүх л зүйлс хоорондоо уялдаа холбоотой. Түүнээс биш нэг мэдээлэл үзээд түүндээ туйлшраад байж болохгүй. Өлөн хоосон байна гэдэг өөрөө хийг маш ихээр хөдөлгөж байдаг зүйл. Учраа мэдэхгүй мацаг бариад тэжээлийн дутагдалд ороод ирж байгаа хүмүүс эмнэлгүүдээр олон байна гэж сонсогдсон. Мацаг барих нь өөрөө сайн зүйл. Гэхдээ ямар ч байсан эмчид үзүүлж, хяналтан дор мацаг барих хэрэгтэй. Хүн бүр өөр өөрийн билэг чанараасаа шалтгаалаад хийх эмчилгээ ч бас харилцан адилгүй шүү дээ.
Уламжлалт анагаах ухаанд судас оношилгоогоор аливаа өвчнийг оношилдог. Судас оношилгооны давуу тал нь юу байдаг вэ?
Судас оношилгоогоор аливаа өвчнийг эрт илрүүлэх боломжтой. Багажийн шинжилгээ, ЭХО оношилгоо болон лабораторийн шинжилгээнээс өмнө илрүүлэх боломжтой гэж ойлгож болно. Миний нэг үйлчлүүлэгч хэдэн жилийн өмнө судсыг нь барихад нь бөөрний үйл ажиллагаа нь хэвийн биш байсан. Ингээд энэ байдлыг нь өөрт нь хэлээд яаралтай эмчлүүлээрэй гэж хэлтэл тэрээр "Би саяхан шинжилгээ хийлгээд ЭХО-д харуулахад миний бөөр зүгээр гарсан. Өвдөх ёсгүй дээ" гэж байсан. Гэтэл хэсэг хугацааны дараа нөгөө үйлчлүүлэгч маань надад хандаад "Эмч ээ, үнэхээр миний бөөр өвдсөн байсан байна лээ. Эмчилгээ хийлгэсэн. Та тэр үед яг хэлсэн байна лээ шүү" гэж байсан. Ер нь ийм тохиолдлууд их байдаг л даа.
Биеэ их чагнадаг хүмүүс байдаг шүү дээ. Энэ нь ер нь сэтгэлзүй талаасаа ч гэдэг юм уу, эрүүл мэнд талаасаа зөв үү, буруу юу?
Ерөөсөө өвчин хэлэхгүй байж байгаад гэнэт өвчнөөр бурхан болдог хүн ч байна. Зарим нь байнга шинжилгээ өгөөд байнга эмнэлгээр яваад байдаг. Энэ хүмүүс харин өвчнөө эрт мэдээд эмчлүүлж эдгэрэх тохиолдол ч бий. Манайхны нэг алдаа нь “би насаараа эмнэлэгийн хаалгаар шагайж байгаагүй, эмнэлэгт очиж үзээгүй. Эрүүл хүн” гэдгээрээ их бахархаж ярьдаг. Энэ бол буруу зүйл. Учир нь хүн өвчнөөс урьдчилан сэргийлэх шаардлагатай. Тиймээс жилдээ нэг удаа эмнэлэгт очоод урьдчилан сэргийлэх үзлэгт хамрагдаж байх хэрэгтэй. Энэ нь хавдар болон бусад өвчнөөс урьдчилан сэргийлэх арга хэмжээ болж чадна. Эмнэлэгт үзүүлдэггүй болохоор л хүмүүс хавдар өвчинд өртдөг. Хавдарын эмнэлгээр яваа хүмүүс дийлэнх нь л эцсийн шатандаа орчихсон тохиолдлууд олон байна. Тиймээс эмнэлэгт очиж үзээгүйгээрээ бахархаж ярих буруу шүү гэж хэлмээр байна.
0
0
0
0
0
0
0
0
