Монгол Улсын арслан М.Мөнгөн агсаны нэрэмжит xүчит бөxийн барилдаан болно
“Токио-2020” зуны олимпын наадмаас Ц.Цогтбаатар Канадын Артур Маргелидоныг ялж хүрэл медаль хүртлээ. Энэ нь түүний анхны олимпын медаль, Токиогийн олимп дахь Монголын хоёр дахь медаль юм.
Токио-2020 олимпын Хүрэл медалийн эзэн болсон Ц.Цогтбаатарын талаар мэдээллийг нэгтгэн хүргэж байна.
- Цэнд-Очирын Цогтбаатар нь 1996 оны 10 сарын 16-нд төрсөн. Баянхонгор аймгийн Хүрээмарал сумын уугуул иргэн.
Ц.Цогтбаатар 2013 онд АНУ-ын Майами хотноо болсон өсвөр үеийн жүдо бөхийн дэлхийн аварга шалгаруулах тэмцээнээс 60 кг-ын жинд хүрэл медаль хүртсэн. Монголын жүдогийн спортын түүхэн дэх анхны медальтан болсноор бөх сонирхогчдын анхааралд өртөж эхэлсэн.
- 2014 оны УАШТ-ий эрэгтэйчүүдийн 60 кг-ын жинд 40 бөх өрсөлдсөн байдаг. 40 бөхөөс Ц.Цогтбаатар тодорч, хүрэл медаль хүртсэн юм.
Тэрбээр 2015 онд 19 настайдаа нэр хүнд, чансаагаараа ДАШТ-ий дараа эрэмбэлэгддэг залуучуудын дэлхийн аварга шалгаруулах Абу Дабигийн “Их дуулга”-аас мөнгөн медалийг эх орондоо авчирч байсан.
- 2016 онд Азийн аварга шалгаруулах тэмцээнээс Хүрэл медаль хүртсэн.
- Ц.Цогтбаатар “Рио 2016” олимпын наадамд 60 кг-д барилдаж, гуравдугаар тойрогт дэлхийн аваргын хошой хүрэл медальт БНСУ-ын Ким Вон Жинд ялагдан тэмцээнээ өндөрлүүлж байсан юм.
Ийнхүү 2016 оны Риогийн олимпод ялагдчихаад уйлаад сууж байсан Монгол хүү дэлхийн хэмжээний жүдоч болсон гэдгээ зарлан тунхаглаж чадлаа.
ОУХМ Ц.Цогтбаатар 2021 оны гуравдугаар сард Ташкент болон Тбилисийн Их дуулгад түрүүлж, нэг сард хоёр алтан медаль хүртсэн амжилттайгаар олимпыг зорьсон юм. Тэрбээр олимпыг зорихоос хоёрхон сарын өмнө бүл нэмж анхны хүүхдээ өлгийдөн авчээ.
Амжилт:
– Азийн аваргын алт, хүрэл,
– Залуучуудын ДАШТ-ий хошой мөнгө,
– Мастерс, Их дуулга, Гранпри тэмцээний 3 алт, 2 мөнгө, 7 хүрэл медалийн эзэн
– Улсын 4 удаагийн аварга
Монголын жүдочид "Мюнхен – 1972" олимпоос эхлэн нийт 11 удаагийн наадамд оролцож, 1 алт, 3 мөнгө, 4 хүрэл медаль хүртсэн түүхтэй.
Хүрэл медаль хүртсэн олон улсын хэмжээний мастер Цэнд-Очирын Цогтбаатарт болон түүний гэр бүл, багш дасгалжуулагчид, Монголын жүдо бөхийн холбооны нийт хамт олонд халуун баяр хүргэе.
0
0
0
0
0
0
0
0
