Эдийн засгийн тэргүүлэх чиглэлд тусгагдсан салбаруудад гадаадын хөрөнгө оруулалт татна
Монголбанкны дэргэдэх Мөнгөний бодлогын хороо өнөөдөр хуралдаж, гаргасан шийдвэрээ танилцуулав.
Бодлогын хүүг 6 хувьд хэвээр хадгалах шийдвэр гаргажээ. Гэхдээ одоогийн мөнгөний зөөлөн бодлогыг дахин сулруулах буюу 6 хувиас бууруулах боломжгүй гэдгийг онцлов. Өрхүүдийн орлого хоёр улирал дараалан буурсан, 60 мянган хүн ажилгүй болсон зэргийг харгалзан бодлогын хүүг хэвээр хадгалжээ.
Шийдвэрийг Төв банкны Ерөнхийлөгч Б.Лхагвасүрэн цахимаар танилцуулсан юм. Мөн тус банкнаас хэрэгжүүлж буй репо санхүүжилтийг нэмэхээр болсон байна.
Инфляц ойрын хугацаанд зорилтот түвшинд буюу 6 хувь байна гэв. Одоогоор инфляц нийслэлд 6.7 хувь, улсын хэмжээнд 6.2 хувь байна. Үүнд эдийн засгийн өсөлт, иргэдэд олгосон бэлэн мөнгө, махны үнийн өсөлт нөлөөлжээ.
Эдийн засгийн өсөлтийг таамаглахад тодорхойгүй байдал өслөө. Гэхдээ энэ оны сүүлийн хагаст эдийн засгийн өсөлт нэмэгдэнэ. Өнгөрсөн онд зээл олголт 4-5 хувиар агшсан бол эргээд сэргэлээ. Шинээр олгосон зээлийн дундаж хүү 11 хувь болж, 4 нэгжээр буурлаа. Алт, зэс, нүүрс, төмрийн хүдрийн үнэ ихээхэн өслөө. Гадаад эргэлтийн эрч хадгалагдахаар байна. Энэ онд Манай улсын төлбөрийн тэнцэл 500 сая ам.долларын эерэг үзүүлэлттэй гарах хүлээлт байна.
Эдийн засгийн өсөлтөд нөлөөлөх хүчин зүйлc: Цэвэр экспорт буюу нүүрсний экспорт оны төгсгөлд 29 сая тоннд хүрнэ. Зэсийн баяжмалын экспорт өмнөх оноос өссөн. Санхүүгийн салбарын өсөлт 14-15 хувь байна. Уул уурхай, түүнийг дагасан салбаруудад илүү их өсөлт гарна. Улсын эдийн засгийн өсөлт 6.9 хувьд хүрэх тооцоо хийлээ.
Арван их наяд төгрөгийн хөтөлбөр хэрэгжээд гурван сар өнгөрлөө. Энэ хүрээнд нийт 1.4 их наяд төгрөгийг гурван хувийн хүүтэй зээлд олгосон байна. Зээлийг тодорхой зорилтот бүлэгт л олгоно. Банкууд өөрийн шалгуураар олгож байна. Нийт 6 их наяд төгрөгийн хүсэлт ирсэн ч бүгдэд нь зээл олгох боломжгүй юм.
Moody`s, FITCH гэх мэт олон улсын байгууллагууд энэ хөтөлбөрийн хэрэгжилтийг өндрөөр үнэлсэн. Энэ хөтөлбөрийн зээлийг хасвал зээлийн дундаж хүү 14 хувь байна. Зээлийн хүсэлт салбар бүрд харилцан адилгүй байна.
Дээрх мэдээллийг өгсний дараа сэтгүүлчдийн асуултад хариулав.
-Инфляцын өсөлтийг бүрэн хянаж чадна гэж үзэж байна уу?
-Инфляцын дарамт байна. Гадаад валютын албан нөөц 4.9 тэрбум ам.долларт хүрч, түүхэн дээд түвшинд хүрлээ. Иймд ханшийн дарамт ирэхгүй. Төгрөгийн үнэ тогтвортой байна.
-Төв банкны үнэт цаасны нийт хэмжээ 10.2 их наяд төгрөг болжээ. Сүүлийн үед өссөөр байна. Банкууд зээлээ гаргахгүй харин Төв банкны үнэт цаасанд 6 хувийн буюу бодлогын хүүгээр мөнгөө байршуулж байгаа нь зөв үү?
-Банкууд хадгаламж эзэмшигчдийн мөнгийг хаана байрлуулахаа өөрсдөө шийддэг. Төв банк зээл олголтыг нэмэх бодлого барина.
0
0
0
0
0
0
0
0
