Манай улс НҮБ-ын Хүний эрхийн зөвлөлд дөрөв дэх тайлангаа хүргүүлнэ
Хошин урлагийн салбарт өөрийн гэсэн орон зайг бий болгож чадсан авьяаслаг, гал цогтой жүжигчдийн нэг бол Б.Отгонтуяа. Түүнийг “Шинэ үе”-ийн Отгоо гэдгээр нь хэн хүнгүй андахгүй. Соёлын тэргүүний ажилтан, "Азтай Бадарчин-2017" наадмын "Шилдэг эмэгтэй жүжигчин" номинацийн эзэн, цангинасан хоолойтой цоглог, сэргэлэн дүр төрхөөрөө сэтгэлд буудаг энэ л бүсгүйтэй амьдрал, уран бүтээлийнх нь талаар “Тэр” буландаа урьж ярилцлаа.
-Өөрийгөө товч танилцуулахгүй юу. Жүжигчин болох таны багийн мөрөөдөл байсан уу?
-Базаргүр овогтой Отгонтуяа, жүжигчин. СУИС-ийн жүжигчний ангийг найруулагч Н.Ганхуяг багшийн удирдлага дор төгссөн. Би хоёр эгч, гурван ахтай. Айлын бага. Багаасаа л Архангай аймагт зохиогддог байсан бүх тэмцээнд ордог, ороод алт мөнгөн медаль заавал авдаг. Жүжигчин болно гэж их хүсэж мөрөөдөж байсан.
1998 онд 10 дугаар ангиа Архангай аймагт төгссөн. Төгсөөд СУИС-ийн хуваарь Архангай аймагт ирээгүй. Аймгийн театртаа анх дагалдан жүжигчнээр ажлын гараагаа эхлэн жүжигчнээр дөрвөн жил ажилласан.
Уг нь би жүжигчин болчхоод байгаа шүү дээ. Гэсэн ч би заавал мэргэжлийн дипломтой, хотод мундаг жүжигчин болно гээд боддог байсан. Ээжийгээ өнгөрөхөд би заавал жүжигчин болно гэж амласан. Тэр ч утгаараа би ажил хийгээд өөрөө төлбөрөө төлнө гээд өглөө нь театртаа, орой бааранд ажилладаг байсан. Маш их ажилладаг байсан. Нэг өглөө босоод ирсэн би ярьж чадахаа байчихсан, ам зуурч яриад л. Өөрөө маш их гайхаад мэдрэлийн ядаргаанд орсон юм шиг байгаа юм. Өөрийгөө хөдөлмөрч хүн юм уу даа гэж боддог.
-Нөхөртэйгөө нэг сургуульд суралцаж байгаад дотноссон гэж сонссон. Хүнд анхны сэтгэгдэл их чухал байдаг шүү дээ. Анх хаана хэрхэн уулзаж байсан бэ?
-Манай нөхөр 2003 онд СУИС-ийн жүжигчин, найруулагчийн ангид ирсэн. Би 2002 онд СУИС-д орчихсон дээд курсийн эгч. СУИС чинь курсийн ялгаатай. Манай тасгийн охид хажуугийн тасагт Дарханаас шинэ хүүхдүүд ирсэн. Орж танилцья гээд л. Тасгийнхаа охидтой яваад ортол “Сайн байна уу та” гээд хөөрхөн инээдэг хүү, намайг эгчээ, эгээ гээд л. “Ямар хөөрхөн инээдэг юм бэ” гэж тухайн үед дотроо бодож байсан. Бид хоёр чинь дөнгөж танилцаад үерхэж байснаа нуухгүй юу. Яагаад гэхээр доод курсийн хүүхэдтэй эгч хүн болохгүй гээд л. Гэтэл ангийнхандаа баригдчихлаа. Тэгсэн манай нөхрийг манай ангийн Алтаншагай, Батуушка нар дуудаж уулзсан байгаа юм. Хэдэн жилийн дараа надад энэ тухай манай хүн хэлсэн. “Хайр, танай ангийн хөвгүүд чамтай үерхэж байхад намайг буланд дуудаж уулзаад л “Маяглаад байгаарай” гээд цохих гээд л байдаг байсан” гэсэн. Тэр үедээ л ангийнхаа охиныг харамласан юм шиг байгаа юм.
-Та хэр сайн гэрийн эзэгтэй вэ?
-Би аравдугаар ангиа төгсөөд тогоо дүүрэн цай чанах болоод давсыг нь тааруулж чадахгүй чимх чимхээр амсаж үзээд л байдаг. Би тийм л хоол ч хийж мэдэхгүй хүүхэд байлаа. Тэгээд оюутан болоод оюутны байранд амьдраад хоол хийж эхэлсэн. Одоо хоол, ундыг гайхалтай хийнэ. Бүх төрлийн ямар ч хоолыг хийнэ. Хоол хийх бол цэвэр мэдрэмжийн урлаг гэж боддог. Хөгжүүлэх тусам л улам л гайхалтай болдог. Хүн үргэлж амьдралаас суралцдаг гэж боддог.
-Оюутан байхдаа таныг нөхрийнхөө ахаас мөнгө зээлэн цагаан утас ажиллуулж байсан тухай фейсбүүкээс тань уншиж байсан?
-Би чинь их баян оюутан. Нөхрийнхөө ахаас мөнгө гуйж байгаад хоёулаа цагаан утас аваад ажиллуулъя, яг "алах" юм байна гээд. /инээв/ Хажуугийн СУИС-ийн үйлчлэгч эгчийн нөхрийг дуудаж авч ирээд үүдэн дээрээ ажиллуулаад. Хөөрхөн нь Чамиа багш мэргэжлийн хичээл орж байхад үүд нүдэн “Отгоо оо, миний дүү орлогоо аваарай” гээд л. Би их ичээд багш “Өө нөгөө баян, гарч орлогоо ав” гээд. Тухайн үед 100, 50 төгрөгөөр ордог байсан орлого их мөнгө, ардаа нуугаад л орж ирнэ. Манайхан “Паа ямар их мөнгөтэй юм бэ” гэж байлаа. /инээв/
-“Шинэ үе” продакшнтай хэрхэн амьдрал, уран бүтээлээ холбосон бэ?
-Манай Одноо багш “Шинэ үе”-ийн менежер хийдэг байсан юм. Нэг шинэ жилээр багш жирэмсэн, цасан охин болох хүнгүй өөрийнхөө оронд намайг санал болгоод би анх цасан охин болж байсан. Зөндөө хүн сууж байхад гаднаас “Алсын алсаас өвөө” гээд аймаар чанга дуудаж орж ирээд л. Хүмүүс бүр эргэж хардаг. Одоо бодохоор ичээд байдаг.
“Шинэ үе” продакшны шинэ жил дээр очиж таараад тэдэндээ тоогдох гэж их хичээсэн. Дараа нь Боёо ах, Хүрлээ ах хоёр манай сургууль дээр ирээд “За ангийнхан босоорой” гээд олон охин босоход тэр дундаас намайг харж байснаа “Чи нөгөө цасан охин болдог охин мөн үү” гэхэд нь “Мөн байна” гэсэн чинь “Өнөөдөр орой хичээлээ тараад МҮЭСТО дээр ирээрэй” гээд л. Ангийнхаа бүх охидын гоё гэсэн хувцсыг өмсөөд нүүрээ будуулж аваад анх очсон. Тэгж хамгийн анх тоглолтод нь орж байлаа. 2003-2016 он хүртэл ажилласан. Одоог хүртэл намайг “Шинэ үе”-ийн Отгоо гэдэг.
-Та одоо аль нэг продакшнд харьяалалтай байгаа юу?
-Одоо сайхан бие даасан уран бүтээлч. Өөрөө хувиараа кино хийж, арай өөр салбар руу ажилладаг юм билүү гэсэн бодолтой байгаа.
-Нөхөр тань яагаад урлагаараа яваагүй юм бэ?
-Манай нөхөр намайг маш сайн ойлгодог, хайрладаг. Хүний хувь тавилан гэдэг сонин. Учрах ёстой хүмүүс учирдаг, уулзах ёстой хүмүүс уулздаг. Нөхөр маань найруулагч Б.Мөнхдорж багшийн шавь. Бид нэг л өдөр ярилцан “Урлагаар хоёулаа явбал хэцүү. Амьдрал хэцүү, урлаг нам зогсвол яах уу. Нэг нь урлагаар явья, нэг нь бизнес хийе” гэж тохироод шөнөжин хоёулаа ярилцаад манай нөхөр “Чамайг хүн болгон таньдаг. Урлагтаа надаас хамаагүй илүү. Тийм болохоор миний хайр урлагаараа яв гээд.
Уйгагүй бизнес эрхэлнэ гэж байдаг шүү дээ. Оюутан байхдаа цагаан утас ажиллуулан, хажуу өрөөнд хоёулаа амьдраад Тумбааш дээр хувцасны лангуу ажиллуулдаг байлаа. Хоёулаа тарагны үйлдвэр хүнээс сая гаран төгрөгөөр ярьж байгаад шөнөжингөө сордог тараг хийн Бөмбөгөр дээр аваачиж зарж байлаа. Цэмцгэр хими цэвэрлэгээ ажиллуулдаг байлаа.
Попкорн оруулж ирж гэр бүлээрээ рекламанд нь тоглон зардаг байлаа. Гоёлын даашинзны бизнес хүртэл хийлээ. Солонгосоос хүртэл оймс бөөндөж оруулж ирж зарж байлаа. Бүхий л бизнесээ хоёулаа босгоё зүтгэе гэж хийж байсан. Энэ их хөдөлмөрлөсний минь ач гавьяа сайхан л амьдарч байна.
-“Алдарт эх”-ийн хоёрдугаар одонгоо Төрийн ордонд Ерөнхийлөгчөөс гардан авсан. Одонгоо гардан аваад ямар сэтгэгдэл төрж байсан бэ?
-Хамгийн сүүлд би одонгоо авах болоод Ерөнхийлөгчид “Би хамгийн сүүлийн хүн шүү та надтай удаан зургаа авахуулаарай” гэж хэлсэн. Чи яагаад Ерөнхийлөгчийг ганцаараа инээлгэв, юу яриад инээлгэв гээд. Яг үнэндээ Ерөнхийлөгч намайг нуруунаас минь түлхээд байхад би гүрийгээд зогсоод байсан болохоор хүн чинь инээчихдэг юм билээ. Хамгийн гоё шагнал. Ямар ч арын хаалгагүй авдаг. Гоё, үнэ хүндтэй авдаг шагналыг би авсан. Их баяртай байсан. Алдарт эхийн одонгоо авлаа гэсэн энэ юу хийсэн гэж одон авч байгаа юм бэ гээд хүмүүс сошиалд ороод ирсэн. Хүмүүс доор нь “angry” дараад “Чи юу яриад байгаа юм бэ, наад хүн чинь дөрвөн хүүхдээ төрүүлээд авсан” гээд л.
Би чинь айлын бага шүү дээ. Ээжийнхээ “Алдарт эх”-ийн нэгдүгээр одонгийн хүүхэд. Ээжийгээ хамгийн түрүүнд бодсон. Яг л амьдрал төвхнөөд гоё болсон үед ээж, аав хоёр минь байхгүй болохоор түүнд их харамсдаг. Хэрвээ байсан бол гээд л. /уйлав/
-Таны амьдралдаа баримталдаг зарчим?
-Хүнд муу санаж, муу юм хийхгүй юмсан гэж боддог.
-Залуустаа хандаад юуг захимаар байна?
-Сайхан хосуудаа, залуучуудаа, нэг хаалга хаагдахад, нэг хаалга нээгддэг. Бидэнд зөндөө гоё боломжууд байна. Гоё амьдрал хүлээж байгаа учраас тэр болгонд тууштай гар гараасаа хөтлөөд амьдралынхаа төлөө тэмцээрэй. Бие биенээ хайрлаад бие биедээ итгээд хүндлээрэй гэж хүсдэг.
0
0
0
0
0
0
0
0
