Д.Сүхбаатарын талбайн зүүн, баруун талын авто замын хөдөлгөөнийг түр хаана
Зохиолч Б.Шүүдэрцэцэг болон түүний охин Б.Анхилмаа нарын хос номын нээлт өчигдөр “Интерном” дэлгүүрийн төв салбарт боллоо.
Б.Шүүдэрцэцэг зохиолчийн “Ялагсад” нэртэй бүтээл нь эмэгтэйчүүдийн өмнө тулгардаг саад бэрхшээл, ялгаварлан гадуурхалт, нийгэм соёлын дарамтыг ялж энэ цагийг эзэлсэн 20 сод эмэгтэйн түүхийг өгүүлэх юм.
Харин түүний охин Б.Анхилмаагийн орчуулан хэвлүүлж буй “Гүн ахайтан ба Инжаан” ном нь Английн алдарт зохиолч Виржиниа Вульфийн шилмэл өгүүллэгийн түүвэр юм. 1920-иод оны Англи бүсгүйчүүд цугларч эрчүүдийн бүтээсэн ном соёлд дүн шинжилгээ хийж буй тухай феминист агуулгатай энэхүү өгүүллэг нь Английн оюун сэтгэлгээний амьдралд тэсрэлт болсон зохиолуудын нэг.
Номын нээлтэд зохиолч Б.Шүүдэрцэцэг “Охинтойгоо хамт ном бичээд хэвлүүлж байна гэж огт төсөөлж байсангүй. Охин маань өөрийнхөө номын хавтасны зургийг өөрөө зурсан. Миний номын гол дүр болох 20-н бүсгүйн хөргийг ч охин маань бүтээсэн. 2019 оны намар Москвад аялж байх үедээ Московский дом книги номын дэлгүүрээс охиндоо зориулж Виржиниа Вульфийн “Шилмэл өгүүллэгийн түүвэр”-ийг авчирч өгсөн юм. Охин маань 14 хоногт уншиж дуусаад “Энэ номыг заавал орчуулна аа” гэж надад хэлж байсан юм. Тэр аялал охины маань анхны бүтээлийн сэдлийг төрүүлэх өгөөжтэй аялал байж дээ гэж одоо боддог” хэмээн онцолсон юм.
Түүний охин Б.Анхилмаа “Юуны өмнө анхны номын нээлтээ хийх боломжийг олгосон аав ээждээ маш их баярлалаа. Уг өгүүллэгийн эхний хэсэг болох “Нийгэмлэг”-ийг уншаад орчуулах сэдэл төрсөн. Зохиолч Виржиниа Вульфийн бичлэгийн онцлог нь маш этгээд, содон. 1920-иод оны уран зохиолын хэллэгээр бичигдсэн өгүүллэгийг Монголын хөрсөнд буулгах нэлээн хүндрэлтэй байлаа. Гэхдээ өнөөдөр ингээд номын нээлтээ хийгээд зогсож байгаадаа маш их баяртай байна” хэмээлээ.
Тэдний номын нээлтэд МУСТА А.Цэгмид, УИХ-ын гишүүн Ж.Чинбүрэн тэргүүтэй олон уншигчид хүрэлцэн ирсэн юм.
0
0
0
0
0
0
0
0
