Б.Ганхайч жиндээ гуравт бичигдлээ

Олон улсын жүдо бөхийн холбооны энэ оны сүүлийн чансаа гарлаа. Унгарт болсон жүдо бөхийн насанд хүрэгчдийн дэлхийн аварга шалгаруулах тэмцээний дараа “Парис”, “Абу Даби”, “Токио” зэрэг “Их дуулга”-аар энэ жилийн тэмцээн өндөрлөсөн.

Монголын жүдочдоос эмэгтэйчүүдийн 63 кг-д ДАШТ-ий хүрэл медальт Б.Ганхайч гуравт жагссан нь хамгийн өндөр үзүүлэлт боллоо. Энэ жинд ДАШТ-ий хошой хүрэл медальт Л.Энхрийлэн бий. Түүний хувьд 12-р байрт бичигджээ. Харин хамгийн хөнгөн жин болох 48 кг-д Г.Наранцэцэг наймдугаар байрт бичигдсэн бол олимпын мөнгө, дэлхийн аварга, гавьяат тамирчин Б.Баасанхүү 2980 оноогоор 13-р байрт жагслаа. 52 кг-д Б.Хорлоодой 15, Л.Сосорбарам 24, М.Нандин-Эрдэнэ 26, Б.Уранзаяа 27-р байрт бичигдсэн байна. 57 кг-д Л.Энхрийлэн 32, Т.Ариунзаяа 35, Л.Сосорбарам 49-р байр, 70 кг-д Д.Есүй 39, 78 кг-д О.Хүслэн 54-р байрт бичигджээ. Харин хамгийн хүнд жин болох +78 кг-д А.Адьяасүрэн, Д.Номинзул нар 23-24-р байрт жагслаа.

Эрчүүдээс 60 кг-д Э.Ариунболд 16-р байр, К.Ёолк 31, 66 кг-д Ё.Басхүү 17, Б.Эрхэмбаяр 19, -73 кг-д О.Уранбаяр 15, Л.Анхзаяа 16-р байраар чансаанд бичигдлээ. 81 кг-д О.Шинэбаяр 61, 90 кг-д Г.Алтанбагана 98, 100 кг-д Б.Гончигсүрэн 47, Б.Хүдэрчулуун 48-р байрт эрэмбэлэгдсэн байна. Харин 100 кг-д барилддаг Б.Гончигсүрэн +100 кг руу өгсөж 69-р байраас 7-р байр руу орсон нь хамгийн өндөр ахисан үзүүлэлт боллоо.