Categories: МЭДЭЭ, ОНЦЛОХ МЭДЭЭ, СПОРТ2025-04-03

Г.Наранцэцэг: Жүдо бөхийн Дэлхийн аварга болохыг зорьж бэлтгэж байна

Нийтэлсэн: А.Алтанчимэг
2025.04.03 08:55

Олон улсын жүдогийн холбооны 2025 оны том тэмцээний эхний өрсөлдөөн Тбилисийн “Их дуулга” тэмцээнд Монгол Улсаас 20 жүдоч өрсөлдсөн.

Тэмцээний эхний өдөр эмэгтэйчүүдийн -48 кг-ын жинд Монгол Улсын тамирчин, ОУХМ Г.Наранцэцэг алтан медаль хүртсэн билээ. Тэрээр алтан медалийн төлөө Испанийн Эва Перез Солерыг ялж, хагас шигшээд Францын шилдэг бөх Ширине Буклиг ялснаар “Их дуулга”-аас алтан медаль хүртсэн. Ингэснээр ОУХМ Г.Наранцэцэг 2024 оны “Их дуулга”-ын алтан медалиа ихэрлүүлсэн юм.

Бид жүдо бөхийн үндэсний шигшээ багийн бэлтгэлийг зорин очиж, түүнтэй цөөн хором ярилцсанаа хүргэе.

-Сайн байна уу? Юуны өмнө “Их дуулга”-ын аварга болсонд нь баяр хүргэе. Оны эхний тэмцээндээ амжилт дүүрэн оролцсон сэтгэгдлээс нь хуваалцъя?

-Маш их баярлалаа. “Их дуулга” тэмцээн өргөн бүрэлдэхүүнтэй олон орон оролцсон их сайхан тэмцээн болсон. Яагаад ч юм, шинэ он гараад л Тбилис болон Анаталья “Их дуулга”-д барилдахаар ер нь л сайн барилдчихаад байдаг. Тэгээд тэр ч утгаараа юм уу, ямар ч байсан маш гоё дотно байсан тэр дэвжээ бас саяны “Их дуулга”. Тэгээд оны анхны тэмцээндээ ороод алтан медаль авсандаа баяртай байгаа.

-Бэлтгэл сургуулилт сайн хангагдсаны үр дүн бол амжилт, ялалт байдаг. Шигшээ баг бэлтгэл сургуулилт хэрхэн хангагдав?

-Ер нь Гранд сламын бэлтгэлд бид нар цагаан сарын өмнө буюу битүүний урд өдрөөс Батсүмбэр лүү гарч бэлтгэл сургуулилтаа хийсэн. Тэгээд ер нь баяр ёслол тэмдэглээгүй, бэлтгэлдээ 100% анхаарлаа хандуулаад сайн бэлдсэн учраас сайн ч оролцсон.

-Өмнө нь таарч барилдсан өрсөлдөгч нартайгаа саяны тэмцээн дээр учраа таарав уу?

-Ерөнхийдөө саяны “Их дуулга” дээр бүх тамирчидтай өмнө нь таарч барилдаж байлаа.

Яг аваргын төлөө барилдаж байсан тамирчинтайгаа болохоор өмнөх оны “Душанбе Их дуулга”-ын 8-д шалгарах дээр барилдаад би санамсаргүй өшиглөөд, тэгээд нэг Хансоки маки авсан байхгүй юу. Тэгээд ерөнхийдөө бас тэр талууд дээрээ жоохон анхаарч дэвжээнд гараад, санасныг бодоход амархан барилдаан болчихсон.

-Энэ он гарсаар 2028 оны олимпын цикл эхэлж байна. Ирэх олимпын наадмын өнгө улс орны баг тамирчдын бэлтгэл, үр дүнгээр тодорхойлогдох болов уу?

-Шинэ тамирчид ихэвчлэн саяны тэмцээнд байсан. Мөн өнгөрсөн Парисын олимпод оролцсон тамирчдаас байлаа. Тэгээд зарим нь бол бэлтгэл нь жигдрээд явж байгаа, зарим нь яг олимпын циклийн бэлтгэлжилтдээ орох гэж байгаа ч юм уу, яг тиймэрхүү зүйлүүд надад анзаарагдсан.

-Сэтгэлзүй маш өндөр байж, барилдсан байхнээ?

-Яг тийм. Миний хувьд медаль гэж ерөөсөө бодож барилдаагүй, яг л урдах барилдаануудаа чухалчилж барилдсан. Нэгдүгээр тойрог, хоёрдугаар тойрог гээд л яг тэд нарыгаа ялаад л явсан даа. Миний дархан мэх гэвэл жийгээд, сөхөж үүрэх зэрэг нь гайгүй мэх л дээ.

-Мэдээж энэ онд Жүдочдыг Ази тивийн АШТ, ДАШТ, Улаанбаатар гранд слам гээд эхний улирлыг авч үзвэл томоохон чансаатай өрсөлдөөнүүд хүлээж байгаа байх?

-Одоо миний хувьд энэ оны хамгийн том тэмцээн бол мэдээж дэлхийн аваргаа зорьж байгаа. Тэгээд наана нь оролцож байгаа тэмцээнүүд маань ерөнхийдөө тэмцээний суурь болоод явчих байх. Энэ жилийн хамгийн гол тэмцээн маань дэлхийн аварга болохоор тэрэндээ л зориулж бэлтгэл сургуулилтаа хийж байгаа.

-Өөрийн тань хувьд жүдо бөхийн спортоор хэдэн жил хичээллэж байна вэ?

Жүдогийн спортоор хичээллээд яг 15 жил болж байна. Олон жил зүтгэснийх дэлхийн аваргаас медаль авахыг л маш их зорьж байна даа.

-Дотооддоо зохион байгуулах чансаа өндөр, өрсөлдөөн ихтэй тэмцээн олон байх тусам тэр хэрээр тамирчдын ур чадвар, өрсөлдөх арга барил ахидаг. Энэ сарын 19-нд Монголын Жүдо бөхийн холбооноос зохион байгуулах “Тoп-6” тэмцээний тухайд?

-Ер нь дотоодын өрсөлдөөн маш чухал. Манай жинд Анударь гээд охин маш сайн барилдаж байгаа. Тэгээд ер нь 48кг-ыг харах юм бол манай жинд ундарга сайтай. Дотооддоо нэлээн чансаа өндөр болдог учраас дараагийн тамирчид бэлэн байдаг нь их авууштай сайхан санагдаж байгаа.

-Олон жил спортод зүтгэж яваагийнх тамирчны сахилга бат маш чухал. Энэ ч утгаараа дараагийн үедээ та бүхэн зөв үлгэр дуурайлал болж өгдөг байх?

-Мэдээж бүтэн нэг үе солигдож байгаа. Тэгээд доод үеэсээ заалан дотроо хамгийн том нь болчихсон л байна. Ер нь бол цөөхүүлээ үлдсэн л дээ.

Тэгээд бид нар бэлтгэл сургуулилтаа маш сайн хийгээд, залгамж халаа болсон олон дүү нартаа маш сайн зааж сургаж, үлгэр дуурайлал болохсон л гэж боддог доо. Үргэлжлэл болох юм сан гэж боддог. Тэгээд мэдээж ингээд хүч сэлбэж байгаа болохоор бас авууштай зүйл ч байгаа, дутагдалтай тал ч бас бий.

Алдаа дутагдал нь хурдан засраад, манай дүү нар улам сайхан амжилт гаргах байхаа гэж бодож байна даа.

Ярилцсанд баярлалаа.