Ж.Бүжинлхам: Лигийн тамирчдаас их зүйлийг сурч, дуурайлал авч байна

Монголын Оюутны Спортын холбооноос дотооддоо УАШТ-ийг спортын төрлүүдээр зохион байгуулж байна. Учир нь Монголын оюутан тамирчид энэ жил Дэлхийн Универсиад наадамд өрсөлдөнө.

Дэлхийн Оюутны Универсиад XXXII наадам 2025 оны долоодугаар сарын 16-27-ны өдрүүдэд ХБНГУ-ын Рейн Рурынд болох товтой байгаа.

Энэ наадмын волейболын төрөлд Монгол Улсаас эмэгтэй оюутан тамирчдын багийг илгээх учраас дотоодын их, дээд сургуулиудын дунд жинхэнэ ширүүн өрсөлдөөн өрнөж байна. Ингээд бид Монголын Оюутны улсын аварга шалгаруулах волейболын тэмцээнийг зорин очиж дараах сурвалжилгыг бэлтгэлээ.

“Алтиус Винерс” багийн холбон тоглогч Ж.Бүжинлхам: Багуудад лигийн тамирчид өрсөлдөж буй нь бид нарт тэднээс суралцах маш том давуу тал

-Сайн байцгаана уу? Бүгдэд нь энэ өдрийн мэндийг хүргэе. Намайг Жаргалсайханы Бүжинлхам гэдэг. Мөн Алтиус биеийн тамирын дээд сургуулийн нэгдүгээр курст суралцдаг. “Алтиус Винерс” багийн холбон тоглогч. Бид хэсгийн шатны хоёр дахь тоглолтоо хийх гэж байна. Одоо ШУТИС-тай тоглох гэж байна. Манайх болохоор энэ жил анхны баг бөгөөд анхны тэмцээндээ оролцож байна. “Алтиус Винерс” гээд шинэ клубээ нээгээд тэмцээн уралдаанд ингээд орж байгаадаа маш их баяртай байна. Дасгалжуулагч болохоор ОУХМ Хулан багш байгаа. Манайх ихэвчлэн дандаа нэгдүгээр курсээс багийн тамирчдаа бүрдүүлсэн. Тэгээд хоёрдугаар курсийн 1-2 эгч, 3 дугаар курсийн нэг эгчтэй байна. Анхны тэмцээн гэхэд гар нийлж бэлтгэл сургуулилтаа хийгээд, ингээд орж ирсэнд үнэхээр их гоё байгаа.

Яагаад гэвэл анхны тэмцээн болохоор зарим багуудад лигт тоглодог тамирчид тоглож байна. Тэр хүмүүсээс волейбол ингэж тоглодог юм байна, сэтгэлзүй нь тийм байдаг юм байна гээд аягүй маш гоё, эерэг үлгэр дуурайлал авч байгаа.

“Зохиомж” багийн ахлагч П.Батмонгол: Сургуулиас волейболын спортоор хичээллэхэд нөөц боломжоор хангаж, маш их дэмждэг

Би яг “Зохиомж” сургуульдаа орсноос хойш хоёр дахь жилдээ энэ тэмцээнд орж байна. Манай сургуулийн волейболын шигшээ баг энэ жилдээ нийлээд 3 дахь жилдээ орж байна. Шигшээ 8-аас хойшоо ер нь бол чанга л байх болов уу. Бараг бүх багуудад дээд лигт тоглодог тамирчид байгаа. Тийм болохоор бэлтгэл сургуулилтаа давхар хийгээд явж буй учраас ер нь өрсөлдөгч нар чанга байх. Манай багш волейболд маш сонирхолтой. Бид нарыг анх “Зохиомж” багийг үүсгэхэд маш том түлхэц, нэмэртэй тусалж дэмжиж өгсөн Даваадаш гээд дасгалжуулагч байгаа даа. Ер нь манай сургууль спортыг маш өндөр дэмжиж өгдөг. Ялангуяа хамгийн сайн дэмжиж өгдөг спортын төрөл нь волейбол, дараа нь сагс орно байх. Тэгэхдээ манай сургууль сагсан бөмбөгөөр одоогоор оюутны лигт хараахан орж чадаагүй байгаа. Тиймээс ганц волейболоор л явж байна даа.

Тэмцээний ерөнхий шүүгч Э.Галхүү: Оюутны УАШТ-д багууд лигт өрсөлддөг тамирчдаар багаа бүрдүүлсэн нь онцгой байна

2025 оны Монголын оюутны аварга шалгаруулах волейболын тэмцээн 3 сарын 31-нээс 4 сарын 5-ны өдрүүдэд МУИС-ийн спорт зааланд зохион байгуулагдаж байна. Энэ удаагийн тэмцээнд эрэгтэй, эмэгтэй нийт 28 баг өрсөлдөн тоглож байгаа. Энэхүү тэмцээнээс шалгарсан эмэгтэй баг маань энэ оны 7 сард Герман улсад зохион байгуулагдах Оюутны Универсиад наадамд оролцох ийм гол шалгууртай тэмцээн болж байна.

Тэмцээний урьдчилсан шатын тоглолтууд эхний гурван өдөр явагдаад, дахиад хэсгээсээ шалгарсан дөрвөн багууд нийт 8 баг өрсөлдөн, тоглоно. Ингээд нийт 4 баг шалгараад, энэ амралтын өдрүүдэд шигшээ болон финалын тоглолтуудад өрсөлдөнө. Тэгэхээр Үндэсний дээд лигт тоглодог ийм оюутнууд багуудад их байна. Жишээ нь АШУҮИС, МУБИС, МУИС, СЭЗИС, Зохиомж дээд сургууль гээд ер нь онцлох багууд гэвэл эдгээр багууд байна.

Мөн олон чадварлаг оюутан тамирчдаар багаа бүрдүүлсэн нь талархууштай. Нийт 5 шүүгч тэмцээнийг шүүн явуулж байгаа. Ерөнхий шүүгчээр Монголын волейболын холбооны улсын шүүгч, миний бие Хүрэлмандалын Галхүү, Лхагвасүрэнгийн Отгонцэцэг, Улсын шүүгч Ганхуягийн Ууганчимэг, Волейболын холбооны шүүгч Атархүүгийн Солонго, Номин гэсэн бүрэлдэхүүнтэй шүүн явуулж байна.

Дэлхийн Оюутны Универсиад наадам спортын 18 төрлөөр болно. Наадамд 150 гаруй орны 8,500 тамирчид оролцохоор ерөнхий мэдүүлгээ илгээжээ.

Манай улсын оюутны шигшээ баг спортын  11 төрөлд 150 хүний бүрэлдэхүүнтэй оролцохоор бэлтгэл ажлаа Монголын оюутны спортын холбооноос хангаж байгаа аж

Монголын баг тамирчдын Рейн Рурын Универсиад наадамд оролцох төрлүүд:

• Байт харваа
• Волейбол, эмэгтэй баг

• Жүдо бөх
• Сагсан бөмбөг, эрэгтэй баг/ Хүлээх жагсаалтад буй/
• Сагсан бөмбөг 3х3 төрлийн эмэгтэй, эрэгтэй баг
• Таеквондо
• Хөнгөн атлетик
• Усанд сэлэлт
• Теннис
• Туялзуур сэлэм
• Ширээний теннис зэрэг төрлүүдэд өрсөлдөхөөр бэлтгэл сургуулилтаа хангаж байгаа ажээ.