“Шинэ хоршоо” хөрөнгө оруулалтын зээл Увс аймагт амжилттай хэрэгжиж байна

“Шинэ хоршоо” хөдөлгөөний Увс аймагт олгосон хөрөнгө оруулалтын зээл 15.0 тэрбумыг давжээ

Шинэ хоршоо-чинээлэг малчин хөтөлбөр хэрэгжиж эхлээд хагас жилийн нүүрийг үзэж байна. Энэ хүрээнд Увс аймгийн Улаангом хотын “Их цүнхэг” хоршооний үйл ажиллагаанаас бэлтгэсэн мэдээллийг хүргэе.

Өнөөдөр малчид нэг жил зургаан сар тэжээсэн үхрээ нэг сая гаруй төгрөгөөр борлуулдаг. Нэг сая төгрөгөөр авсан үхрийг махны ченжүүд 4-5 сая төгрөгөөр борлуулдаг байна. Нэг үгээр хэлбэл гол ашиг хүртэгч нь малчин биш ченж болж байна гэсэн үг юм.  Хөдөлмөрлөж байгаа нь биш, дамлаж байгаа нь ашиг хүртэж байгаа энэ буруу тогтолцоог арилгаж малчид ашиг хүртэх нөхцлийг бүрдүүлэх зорилгоор Шинэ хоршоо хөдөлгөөн өрнөж эхэлсэн юм. Малчид хөдөлмөрөө нэгтгэн хоршиж жилийн 6 хувийн хөрөнгө оруулалтын зээл авч өрхийн сарын орлогоо 5.0 сая ба түүнээс өндөр хэмжээнд хүргэх боломж бүрдсэн. Увс аймгийн хэмжээнд 349 хоршоо байгуулагдаж нийт 15.0 гаруй тэрбум төгрөгийн хөрөнгө оруулалтын зээл олгожээ.

Увс аймгийн тухайд малчид Хөдөө аж ахуй, газар тариалангийн чиглэлээр зээлд түлхүү хамрагдсан бол “Их цүнхэг” хооршоо малчдын гар дээрээс махыг хэрхэн зах зээлд үнэтэй нийлүүлэх, нэмүү өртөг шингэсэн бүтээгдэхүүн болгож хэрэглэгдчийн гар дээр хэрхэн хүргэх талаар ажиллаж байгаа ажээ.

“Их цүнхэг” хоршооны гишүүд мал, махаа хоршоондоо тэгш нийлүүлэн сум, орон нутгийн иргэддээ бууз, банш, котлетны мах, ангилсан мах гэх мэт 10 гаруй нэр төрлийн мах махан бүтээгдэхүүн үйлдвэрлэн хэрэглэгчдэд хүргэж байна. Засгийн газраас хэрэгжүүлж эхлүүлсэн шинэ хоршоо хөдөлгөөний үйл ажиллагаанд иргэд ам сайтай байгаа ажээ.

Хэрэгтэй цаг үедээ хэрэгжиж эхэлсэн төсөл хөтөлбөр болохыг хэлэх малчид цөөнгүй байна.

Хөдөө орон нутгийн иргэд, малчид руу чиглэсэн энэ мэт арга хэмжээнүүд орон нутагт ажлын байрыг бий болгоод зогсохгүй орон нутгийн иргэдийн амжиргааны түвшинд тохирхон үнэ тарифтай бүтээгдэхүүн нийлүүлэгдэх боломж бүрдэж байгааг онцолж байна.