Categories: МЭДЭЭ, СПОРТ2025-02-10

Улсын аварга О.Хангай заалны барилдаанд 37 дахь удаагаа түрүүллээ

Нийтэлсэн: Б.Дэлгэрмаа
2025.02.10 11:35

Монгол бөхийн өргөөнд өнгөрсөн амралтын өдрүүдэд дараалсан улс, аймгийн алдар цолтой 128 бөхийн барилдаан боллоо.

Бямба гарагт Архангай аймгийн Эрдэнэмандал сумын 100 жил, самбо, жүдо бөхийн олон улсын хэмжээний мастер, улсын начин “Муухай” хэмээх Б.Ганбаатарын нэрэмжит барилдаан болсон бөгөөд улсын аварга О.Хангай, П.Бүрэнтөгс тэргүүтэй бөхчүүд зодоглолоо. Энэ нь 2025 он гарснаас хойш болж буй улсын цолтнууд оролцсон хоёр дахь барилдаан гэдгээрээ онцлог байв. Уг барилдаанд Ховд аймгийн Буянт сумын харьяат, “Аврагч” спорт хороо, “Ховд” дэвжээний бөх улсын аварга О.Хангай түрүүлж, Архангай аймгийн Батцэнгэл сумын харьяат, “Алдар” спорт хороо, “Бөхбилэгт” дэвжээний бөх улсын үнэн зоригт харцага Б.Зоригтбаатар үзүүрлэлээ. О.Хангай аваргын хувьд бөхийн өргөөнд болсон барилдаанд 37 дахиа түрүүлж байгаа энэ юм.

Зохион байгуулагчдын зүгээс “Уран барилдааны шагнал”-ыг улсын харцага Б.Зоригтбаатарт, “Улсын цолд ойрхон бөх”-ийн шагналыг Архангай аймгийн Цэнхэр сумын харьяат, аймгийн арслан Б.Батсайханд, “Өсөх ирээдүйтэй бөх”-ийн шагналыг Дундговь аймгийн Эрдэнэдалай сумын харьяат, аймгийн арслан Н.Амгаланбаатарт тус тус гардууллаа.

Тус барилдааны түрүү бөх 8.000.000, үзүүр бөх 4.000.000, дөрөвт үлдсэн хоёр бөх тус бүр 2.000.000 төгрөгийн бай шагнал гардсан бөгөөд барилдааныг Эрдэнэмандал сумын ЗДТГ, “Нутгийн хурд гал уяа” МҮБХ-той хамтран зохион байгуулсан юм.

Тэгвэл өчигдөр болсон Баянзүрх дүүргийн 30 жилийн ойд зориулсан “Баянзүрх хайрханы хишиг” бөхчүүдэд чансаа олгох барилдаанд Өвөрхангай аймгийн Төгрөг сумын харьяат, Алдар спорт хороо, “Их Монголын хүчтэн” дэвжээний бөх улсын арслан Ц.Бямба-Отгон түрүүлж, Ховд аймгийн Зэрэг сумын харьяат, “Аврагч” спорт хороо, “Ховд” дэвжээний бөх, улсын заан Б.Бат-Өлзий үзүүрлэв. Ц.Бямба-Отгон улсын арслан цолыг албан ёсоор авснаасаа хойших анхны түрүүгээ өнөөдөр Баянзүрх хайрханы хишиг барилдаанаас гардлаа. Тэрбээр заалны барилдаанд таван өөр цолтойгоор зодоглож, долоо дахь түрүүгээ авч байна. Харин улсын заан Б.Бат-Өлзий хоёр өдөр дараалан барилдахдаа ийнхүү үзүүрлэж, их шөвөгт шалгарлаа. Түүний хувьд 18 дахь удаагаа үзүүрлэсэн нь энэ.

Зохион байгуулагчдын зүгээс “Улсын цолд ойрхон бөх”-ийн шагналыг Булган аймгийн Сайхан сумын харьяат, аймгийн арслан Н.Намнансүрэнд гардуулсан бол түрүү бөх 6 сая, үзүүр бөх 4 сая, дөрөвт үлдсэн бөхчүүд тус бүр 2 сая төгрөг гардсан юм.

Ирэх долоо хоногийн бямба гараг буюу хоёрдугаар сарын 15-ны 13:00 цагаас Халх Нөмрөгийн Буриад хошууны 100 жил, Дорнод аймгийн Хөдөлмөрийн гавьяаны улаан тугийн одонт Цагаан-Овоо сумын 90 жилийн ойд зориулсан Улсын начин Дондогийн Цогзолдоржийн нэрэмжит Улс, аймаг, цэргийн алдар цолтой хүчит 128 бөхийн барилдаантай.