Хасугийн аваргууд эргэн ирж, Финиксчүүд “аварга” болсноо тунхаглав

Гурван сарын турш хоёр тойрог үргэлжлэн явагдсан волейболын үндэсний дээд лигийн тэмцээн өчигдөр буюу нэгдүгээр сарын 29-ний өдөр өндөрлөж хөшгөө хаалаа.

Үндэсний дээд лигийн 2024-2025 оны улирлын плей-оффын тоглолтууд ширүүхэн өрсөлдөөнөөр дүүрэн болж өндөрлөв.

“Хасу Мегастарс” 2019 оны лигийн аваргын цомоо ханьтай болгов

Эрэгтэйчүүдийн лигийн аваргын төлөө “Хасу Мегастарс” болон Төв Миг багууд өрсөлдсөн. Волейболын спорт сонирхогч, хөгжөөн дэмжигчдийн итгэл болон таамгийг тэд ялалтаараа баталж чадлаа. Ингэснээр тэд 2019 оны амжилтаа давтаж, дахин Үндэсний дээд лигийн аваргаар тодорч буй нь энэ юм.

“Хасу Мегастарс” баг Дээд лигт хагас шигшээ болон шигшээ цувралд хожигдолгүй буюу 5 дараалан хожиж түрүүлсэн анхны баг болов.

“Хасу Мегастарс” финалд “Төв Миг”ийг 3-0 гэсэн харьцаатай илтэд давуу ялав.

Харин “Төв Миг” энэ улирлын хамгийн онцгой, дуулиан шуугианы эзэд байв. Учир нь тэд лигт анх удаа өрсөлдөж байгаа ч хүчирхэг “SG Hawks”-ийг хагас шигшээд буулган авч, жинхэнэ шуугианыг тарьж чадсан юм.

Эрэгтэй багуудаас лигийн хүрэл медалийн эздээр “SG Hawks” баг тодорлоо. Тэдний хувьд хүрэл медалийн төлөө өнгөрсөн жилийн аварга “Натурс Бакс” багийг буулган авсан юм.

“SG Hawks” баг улирлыг тун өнгөтэй эхлүүлсэн хэдий ч улирлын төгсгөлд тэд хүрэл медаль дээр буулаа.

Харин эмэгтэйчүүдийн лигийн аваргын цомыг “Улаанбаатар Финикс” багийнхан өргөлөө. Тэд улирлын эхнээс хүчтэй гэдгээ сайн формтой тоглолтоороо үзүүлж явсаар финалд “Ховд Ижил алтай Торгууд” багийг хожлоо.

Финиксчүүд волейболын дээд лигийн түүхэндээ “аварга” болсон 6 дахь эмэгтэй баг болов.

Хүрэл медалийг “Хөвсгөл Эрчим” баг зүүлээ. Энэ багийн хувьд 2022, 2023 оны лигийн хошой алт, мөнгө хүртсэн өмнөх амжилтаараа лигийн багц медальтай болж байна.

Улирлын шагналтнуудаар дараах тамирчид тодорлоо

• Шилдэг легионер – Мануэла Сьерра Посада /Улаанбаатар Финикс/
• Шилдэг легионер – Скляренко Евгений /Хасу Мегастарс/
• Шилдэг давуулагч – Л.Хосбаяр /Хөвсгөл Эрчим/
• Шилдэг давуулагч – Б.Анхбаяр /Төв Миг/
• Шилдэг хаагч – П.Энххүслэн /Улаанбаатар Финикс/
• Шилдэг хаагч – О.Чойжилсүрэн /SG Hawks/
• Шилдэг хамгаалагч – М.Санчирмаа /Улаанбаатар Финикс/
• Шилдэг хамгаалагч – З.Буянжаргал /Хасу Мегастарс/
• Шилдэг холбогч – Ц.Цэдэвнамбар /Улаанбаатар Финикс/
• Шилдэг холбогч – Г.Төрмандах /Хасу Мегастарс/
• Шилдэг довтлогч – Жасутейсу Яауч /Ховд Ижил алтай Торгууд/
• Шилдэг довтлогч – Г.Цэнд-Аюуш /Төв Миг/
• Шилдэг дасгалжуулагч – И Сүн Кью /Хасу Мегастарс/
• Шилдэг дасгалжуулагч Б.Мөнгөнхуяг /Улаанбаатар Финикс/
• Шилдэг шүүгч – Ц.Алтан-Өлзий
• Үнэ цэнтэй тоглогч -Б.Баярсайхан /Хасу Мегастарс/
• Үнэ цэнтэй тоглогч – Ж.Баянжаргал /Улаанбаатар Финикс/