Шинэ залуусаар хүчээ сэлбэсэн Монголын шигшээ баг

Монгол улсын сагсан бөмбөгийн шигшээ баг түүхэндээ анх удаа Азийн АШТ-ий урьдчилсан хоёрдугаар шатанд шалгарсан билээ. Тэд “С” хэсэгт Япон, БНХАУ, Гуамын багтай учраа таараад буй. Сагсан бөмбөгийн Азийн АШТ-ий урьдчилсан шатанд Монгол улсын шигшээ баг нийт зургаан тоглолтод оролцохоос гурвыг нь хийгээд байна. Хамгийн эхний тоглолтоо манай шигшээ баг Хятадын Шэньси мужийн Шиань хотод 2024 оны хоёрдугаар сард тус улсын багтай, мөн залгуулаад Гуамын багтай хийсэн билээ. Үргэлжлүүлэн энэ оны 11-р сарын 21-ний өдөр Японы эсрэг тоглосон бол 24-ний ням гарагт өөрийн талбайдаа Хятадын шигшээг хүлээн авч тоглосон. Ингээд хэдхэн хоногийн өмнө болсон хоёр тоглолтын мэдээлэл болон 2025 онд Саудын Арабад болох сагсан бөмбөгийн Ази тивийн АШТ-ий тухай мэдээллийг хүргэхээр бэлтгэлээ.

Азийн топ баг Японы эсрэг хүчтэй өрсөлдөөнийг өрнүүлсэн тоглолт

Сагсан бөмбөгийн Азийн АШТ-ий урьдчилсан шатны ээлжит тоглолтоо манай улсын шигшээ баг Японы багийн эсрэг тус улсын нутагт очиж хийгээд байгаа. Арлын орны Үцүномия хотын 5000 хүний суудалтай “Никкан арена”-д болсон тус тоглолтод шигшээ багийн тамирчин А.Энхбаясгалан 26, О.Эрдэнэцогт 16 оноог тус тус багтаа авчирч шинэ залуусаар хүчээ сэлбэсэн гэдгээ томруунаар харуулсан.

Хүчирхэг Япон улсын шигшээ багийн эсрэг ширүүн өрсөлдөөнийг өрнүүлэхдээ А.Энхбаясгалангийн шийдэмгий тоглолт, довтолгоо болон алсын зайн шидэлтүүд тун оновчтой байж чадсан нь үзэгчдийг огшуулж байв. Тус тоглолт 93:75 онооны харьцаатай Японы шигшээгийн хожлоор өндөрлөсөн.

Ази тивийн шилдэг баг Хятадтай гал гарсан өрсөлдөөн үзүүлэв

Монгол улсын шигшээ баг Ази тивийн АШТ-ий урьдчилсан шатны хоёр дахь тоглолтоо БНХАУ-ын нэгдүгээр шигшээгийн эсрэг хийсэн. Тус тоглолт Улаанбаатар хотод “UG арена”-д хөгжөөн дэмжигчдийн уухайн дунд өрнөж 90:52 онооны харьцаатай тоглолт өндөрлөсөн. Энэ тоглолтод шигшээ багаас О.Эрдэнэцогт 16 оноог багтаа авчирсан юм.

Тэр дундаа шигшээ багтаа насны хувьд багийн ахлагч Б.Билгүүний дараа бичигддэг О.Эрдэнэцогтын хувьд “туршлага” гэж тамирчин хүнд насан туршид нь хуримтлуулж ирсэн үнэт зүйл гэдгийг яруу тодоор харуулаад авсан. Мэдээж эндээс багийн залуу тамирчид нь “туршлага” гэдэг нь тамирчныг хөглөж өгдөг гол түлхэц хүч гэдгийг бүрэн мэдэрч авсан биз ээ.

Дараагийн тоглолтууд 2025 оны хоёрдугаар сард болно

Монгол улсын шигшээ баг 2025 оны хоёрдугаар сарын 20-ны өдөр Гуам улсын шигшээ багтай зочлон тоглолт хийнэ. Тодруулбал олон цагийн нислэгээр зорчин Гуамын нутагт очиж тун хариуцлагатай тоглолтыг хийх болно. Харин хоёрдугаар сарын 23-ны өдөр Япон улсын шигшээ багийг Улаанбаатар хотод хүлээн авч тоглох хуваарьтай байна.

Шигшээ багийн бүрэлдэхүүнийг танилцуулъя

Б.Билгүүн шигшээ багийн ахлагч, “Хасын хүлэгүүд”

О.Эрдэнэцогт “BCH Knights”

М.Өлзий-Орших “SP Apes”

Т.Ууганбаяр “Бишрэлт Металл”

Н.Батбаяр “Сэлэнгэ Бодонс”

Б.Тулуй “SP Apes”

М.Баасандорж “Завхан Бродерс”

Ч.Ихбаяр “Хасын хүлэгүүд”

Г.Болор-Эрдэнэ “Эрдэнэт Майнерс”

А.Азбаяр “Хасын хүлэгүүд”

Э.Энхбаясгалан “Бишрэлт Металл”

Э.Саруул-Эрдэнэ “Хасын хүлэгүүд”

Ч.Тэмүүлэн “Хасын хүлэгүүд”

Г.Мандахбаяр “Inut Yes TLG”

Г.Одбаяр “Эрдэнэт Майнерс”

Г.Балжинням “Дархан Юнайтед”

Б.Энх-Амар “Этүгэн Ирвэсүүд”

Ч.Маргад “Fairfax High School”

Дасгалжуулагчдын нэрсийг танилцуулбал:

Вассилис Фрагкиас ахлах дасгалжуулагч

Ц.Азбаяр туслах дасгалжуулагч

Б.Тамжид туслах дасгалжуулагч

В.Велибор туслах дасгалжуулагч

С.Эрхбаяр туслах дасгалжуулагч

С.Намуунаа багийн эмч

Шигшээ багийн ахлах дасгалжуулагчийн танилцуулга мэдээллийг товчлон хүргэе.

Грек улсын иргэн тэрээр тус улсын сагсан бөмбөгийн холбооны дасгалжуулагч, Дэлхийн сагсан бөмбөгийн холбооны дасгалжуулагчаар ажиллаж байсан туршлагатай. Сагсан бөмбөгийн спортод түүний дасгалжуулагчийн замнал 1991 оноос эхэлжээ. Фрагкиас Вассилис нь 1985-1991 онд Грекийн сагсан бөмбөгийн өсвөрийн багт тамирчин байсан аж. Монгол улсын сагсан бөмбөгийн ахлах дасгалжуулагчаар уригдан ажиллаж буй түүний хувьд 2014-2017 онд Катар улсын үндэсний багт дасгалжуулагчаар ажиллаж байв. Харин манай улсын багийн спорттой холбогдож эхэлсэн нь “Эрдэнэт Майнерс” багийг 2020-2023 оны үндэсний дээд лигийн улиралд дасгалжуулж байсан юм.

Монголын шигшээ багийн шинэхэн тамирчдын дундаж нас болон өндөр

Япон улсын шигшээ багтай тоглосон манай улсын шигшээ багийн тоглогчдын дундаж нас 24.5, өндөр нь 192.3см байв.

Монгол улсын шигшээ баг Олон улсын сагсан бөмбөгийн холбооны чансаагаар дэлхийд 108-д, Ази тивдээ 23-д эрэмбэлэгдэж байна.

Япон улсын шигшээ багийн ахлах дасгалжуулагчаар АНУ-ын иргэн Том Ховассе ажиллаж байгаа. Тус багийн хувьд 2025 оны Ази тивийн аварга шалгаруулах тэмцээний урьдчилсан шатны “С” хэсгийг нэг ч хожигдолгүй тэргүүлж явна. Энэ багийн тухайд Том Ховассын удирдлага дор “Парис-2024” зуны олимпын наадамд оролцож, мөн сагсан бөмбөгийн ДАШТ-д гурав хожиж, хоёр хожигдсон амжилтаар 19 дүгээр байрт эрэмбэлэгдэж байна.

БНХАУ-ын нэгдүгээр  шигшээ баг чансаагаараа дэлхийд 30-д, Азидаа 6-д бичигдэж байна.

Сагсан бөмбөгийн Азийн АШТ Саудын Арабад болно

2025 оны Азийн аварга шалгаруулах тэмцээнд 16 баг оролцоно. Харин эрхийн төлөө 24 баг өрсөлдөх юм. Эдгээр багууд дөрөв, дөрвөөрөө зургаан хэсэгт хуваагдан өрсөлдөх бөгөөд нэг багтай тус бүр хоёр тоглолт хийх хуваарьтай. Хэсэг бүрээс эхний хоёр баг буюу нийт 12 баг шууд Азийн АШТ-д оролцох эрхээ авч шалгарна. Тэгвэл хэсэгтээ гуравдугаарт бичигдсэн зургаан баг дахин гурав гурваар хоёр хэсэг болон хоорондоо тоглож дөрвөн баг эрхээ авна. Ирэх онд болох Азийн АШТ-д орсон 16 баг 2027 оны Дэлхийн аварга шалгаруулах тэмцээний урьдчилсан шатанд өрсөлдөх эрхийг шууд авах учиртай.

Сагсан бөмбөгийн 20 дахь удаагийн ДАШТ 2027 оны наймдугаар сарын 27-ноос есдүгээр сарын 12-ны өдрүүдэд Катар улсад болох юм.