Хөлд оруулагч, бүүвэйлэгч нь хүүхдийг хөдөлгөөний хөгжлийн хоцрогдолд оруулж байна

Жил ирэх тусам эцэг эхийн  хүүхдээ харах ачааллыг хөнгөвчлөх зориулалттай төхөөрөмж хэрэгслүүдийн төрөл зүйл нэмэгдсээр байгаа билээ. Эцэг эхчүүд бид энэ нь ч амар юм, тэр нь ч хөөрхөн юм гэх мэтээр ихэнх зүйлсийг худалдан авдаг. Жишээ нь бүүвэйлэгч, саатуулагчтай суудал, хөлд оруулагч, үсрэх төхөөрөмж гэх мэтээр олон олон нэр төрөл бий.

Гэтэл эдгээр хэрэгсэл, төхөөрөмжүүдийг Европын зарим оронд хэрэглэхийг хориглосон байдаг бөгөөд Канад улсад гэхэд эцэг эхэд хариуцлага тооцох хэмжээний хуулийн зохицуулалт байдаг аж. Та бүхэн гайхаж байж магадгүй юм. Мэдээж богино хугацаагаар өдөрт нийтдээ 30 минут эдгээр төхөөрөмжүүд дээр тавин саатуулах нь хэвийн боловч үүнээс урт хугацаанд удаан хэрэглэх нь хүүхдийг хөгжлийн хоцрогдолд оруулах эрсдэлт хүчин зүйл болдог байна. Үүнтэй холбоотойгоор Сэргээн засах эмчээр тэр дундаа хүүхдийн сэргээн заслаар мэргэшин 15 дахь жилдээ мэргэжлээрээ ажиллаж буй Х.Туул эмчээс энэ тухай тодрууллаа.

БИДНИЙ ХӨЛД ОРУУЛАГЧ ГЭЖ ХЭЛЖ ЗАНШСАН ХЭРЭГСЭЛ ХҮҮХДИЙН ХӨГЖИЛД СӨРГӨӨР НӨЛӨӨЛДӨГ

Манай улсад хөлд оруулагчийг ашиглаад нэлээн удаж байна.Та мэргэжлийн нэршлээр зогсоогч гэж хэлээд байна л даа бид бол хөлд оруулахад дэм болдог хэрэгтэй зүйл гэж ойлгоод байгаа шүү дээ. Тиймээс хөлд оруулагч хүүхдийн хөгжилд хэрхэн нөлөөлдөг талаар тайлбарлаж өгөөч?

Монголчууд маань хөлд оруулагч гэж нэрлээд байдаг. Гэхдээ хөлд ороход дэм болохоосоо илүүтэй өдөрт олон цагаар суух нь хөлийн хөгжилд сөргөөр нөлөөлдөг.  Эцэг эхчүүд маань хөлийн хөгжил бүрэн гүйцэт хөгжөөгүй байхад хөлд оруулагч дээр суулгачихдаг. Хамаг ачаалал нь аарцаг нуруун дээр ирээд хөлөн дээр ямар ч ачаалал ирэхгүй болохоор хүүхдийн хөлийн хөгжил сул явагдах шалтгаан болж байна. Хөлийн хөгжил сул явагдсанаас дотогшоо гишгэлттэй, бүдэрч унамтгай, хавтгай тавхайтай хүүхдүүд олширч байна.Тиймээс би эцэг эхчүүдэд аль болох хөлд оруулагч дээр суулгахгүй байхыг зөвлөдөг.

АЛИВАА ТӨХӨӨРӨМЖҮҮДИЙГ БОГИНО ХУГАЦААНД АШИГЛАХ НЬ ЗОХИМЖТОЙ

Хөлд оруулагч гэлтгүй бүүвэйлэгч, саатуулагчтай суудал гэх мэт олон хүүхдэд зориулсан хэрэгслүүд байна. Эдгээр нь хүүхдийн биеийн хөгжилд хэрхэн сөргөөр нөлөөлж байна вэ?

Хоолоо идэж байгаа хүүхдийг хоолны ширээн дээр суулгаж болно. Гэхдээ хоолоо идүүлчхээд л бусад үед хүүхэд өнхрөөд эргэж тойроод дээшээ авирч байх тусам булчингууд нь хөгжиж байдаг. Хөнгөвчлөх төхөөрөмжүүдийг ашиглах нь эцэг эхчүүдийг амраадаг боловч тэдгээрийг аль болох богино хугацаанд 10-20 минут гараа амраах үедээ л хэрэглэвэл зохимжтой. Саатуулагчтай суудлын тухайд ийм сандал нь хүүхдийг буруу буюу бөгсөөр нь биш нуруугаар нь суулгаж нурууны үений хөгжлийг гажуудуулдаг. Энэ мэтээр аливаа төхөөрөмжүүдийг урт хугацаагаар мөн бие махбодын хөгжлийн хувьд бэлэн болоогүй байхад хэрэглэх нь өөрөө том эрсдэлт хүчин зүйл болж байгаа юм.